📢وەزیری دەرەوەی ئەمریکا: بەردەوام دەبین لە پشتیوانیی هێزەکانی سووریای دیموکرات لە جێبەجێکردنی ئەرکەکەی ئێستای دا. بلینکن گوتی "10 هەزار گیراوی داعش لەژێر چاودێریی دۆستە کوردەکانمان دان. ئیدارەی داهاتووی ترەمپیش بەرژەوەندیی لەوەدایە، داعش سەرهەڵنەداتەوە." تورکیا "نیگەرانیی رەوای لە پەکەکە و تیرۆر هەیە. لە بەرژەوەندیی هیچ لایەکدا نییە تەنگژە لە سووریا هەبێت، ئێمەش هەموو هەوڵێک دەدەین ئەوە روونەدات." لێدوانی بلینکن لەکاتێکدایە، هێزەکانی سووریای دیموکرات و سوپای نیشتمانیی سووریا لە نزیک بەنداوی تشرین لە پێکدادانی بەردەوام دان. بەنداوی تشرین، سەرچاوەی سەرەکیی ئاو و کارەبای خەڵکی باکووری رۆژهەڵاتی سووریایە، هەسەدە دەڵێ "کاروانی هاووڵاتیانی سڤیل لە ناوچەکانی دیکەوە بۆ مەبەستی رێگری لە هێرشەکانی تورکیا بۆ سەر بەنداوی تشرین، (ئەمڕۆ) بەرەو بەنداوەکە چوون؛ بەڵام لەلایەن تورکیاوە بە درۆن کراونەتە ئامانج." بەنداوی تشرین لەنێوان منبج و کۆبانێیە و لەژێر دەسەڵاتی هەسەدەیە. 80 کیلۆمەتر لە سنوورەکانی تورکیاوە دوورە. لە 1999ـوە کارەبای ناوچەکانی باکووری رۆژهەڵاتی سووریا دابین دەکات. rudaw.net/sorani/world/080120252