📢ڕێزگرتن لە مامۆستا ئیبراهیم مەردۆخی لە لایەن "ئەنجومەنی فەرهەنگی ئەدەبیی - مەریوان"ەوە ✅ئەندامانی کومیتەی فەرهەنگی و بەشێک لە ئەندامانی دستەی بەڕێوەبەری ئەنجومەنی فەرهەنگی- ئەدەبیی مەریوان و بەشێک لە ئەندامانی ڕێکخراوە مەدەنییەکانی مەریوان لە ڕێکەوتی ٢٧٢٤/١٠/٣ی کوردی، بۆ ڕێزگرتن لە تەمەنێک نووسین و تێکۆشان و خەباتی کەسایەتی ماندوویی نەناس مامۆستا " ئیبراهیم مەردۆخی" کە یەکێک بووە لە دامەزرێنەرانی ئەنجومەن، سەردانی ماڵی مامۆستایان کرد. چەن کەس لە بەشداربووان سەبارەت بە دەوری کاریگەر و گرنگی مامۆستا ئیبراهیم مەردۆخی لە ئەنجومەنی فەرهەنگی ئەدەبیی مەریوان و دیکەی ڕێکخراوە مەدەنییەکانی مەریوان قسەوباسیان کرد. پاشان سپاسنامەی ئەنجومەن لە ڕێگەی خاتوو منیرە، هاوسەر و خێزانی مامۆستاوە، بە مامۆستا ئیبراهیم مەردۆخی بەخشرا. 📜دەقی سپاسنامەی ئەنجومەنی فەرهەنگی- ئەدەبیی مەریوان بۆ مامۆستا ئیبراهیم مەردۆخی:👇 «سپـاسنــامــە» ڕێزدار و خۆشەویست مامۆستا "ئیبراهیم مەردۆخی"! ئەنجومەنەکەی گشتمان وەک هەمیشە شانازی بە ڕۆڵەی مەزنی وەک ئێوە دەکات کە لە پاڵ مزگەوتە سوورەی قەڵا ئەردەڵانییەکەی دراوسێی مەلا ئیبراهیمی شارانییەوە، شنەی بەرامەیەکی شێخی خاڵ و ڕۆحسووکییەکی مەلا مودەڕیسی بیارەمانی پێ گەییوە. ئێوە مێژوویەکی زیندووی ئەم نیوسەدەیەی مەریوانتان لە خۆتاندا کۆ کردوەتەوە، میراجی شایەتی دەدات بۆ بەگژداچوونەوەت دژ بە زۆرداری و ناهەقی. ئەو بوێرییەت بە ڕەگەز دەچێتەوە سەر شێخی پیران و نەهری و سەید ڕەزای دەرسیم. ئێوە، هێندە زمانی کوردی لاتان خۆشەویست بووە، حەزتان کردووە، تیشکێ لەو پیرۆزییانەی نێو دڵتانی پێ ببەخشن و گەورەیی زمانی نەتەوەکەتان بخەنەوە پێش چاوانی ئەوانەی چاویان بە ڕوویدا هەڵنایەت. ئەم گشتە ساڵەی هاوڕێیەتی هەمیشەییتان لەگەڵ ئەنجومەن و ئەو گشتە هەوڵی بێوچان و چالاکییە بێ‌چاوەڕوانییەتان بۆ فەرهەنگ و زمانی کوردی بەرز دەنرخێنین، دڵنیاین ناوی ئێوەی ئازیز کە تەمەنێکتان لە پێناو گەشەی فەرهەنگی، پێشکەوتنی زمان و سەربەرزی نەتەوەکەمان دانا و نیشتمان بەشێکی نەبڕاوەی گریان و پێکەنینەکانتان بووە، بە سیمای ئەم شارەوە دەمێنێتەوە. ئەم سپاسنامەیە پێزانینێکی بچووکە بۆ گەورەیی ئێوەی هێژامان کە کۆڵەکەیەک بوون لە چالاکییەکانی ئەم مەریوانی بێسارانی و قانعە بەرەو داهاتوویەکی ڕوون.  ئەنجومەنی فەرهەنگی_ئەدەبیی مەریوان ٣ی بەفرانباری ۱٤۰۳ی ک. هەتاوی (٢٧٢٤ی کوردی) 🆔 @meriwan_edebi https://t.center/Midyafayl/771 ـــــــــــــــــــــــــــــ 🌅لە میدیای سەربەرزی هاوڕێمان بن Telegram | Instagram