Dreamer 🌏💜

• رح نأجل نشر السلسلة (ميراث النبوة) حتى إشعار آخر.

_
• أمضيت في الصباح وقتي وأنا استمع لهذا البودكاست.. اللي هو عبارة عن أسئلة وإجابات.

نصيحة من مايا اسمعوه نصيحة
وإذا خايفين من الشيخ أحمد
اسمعوا هالبودكاست واحكموا بذاتكم

أنا لحد الآن مذهولة من السلاسل اللي عم ينزلها، عكتر الفائدة اللي فيها (ومقررة بإذن الله كل فترة نختار سلسلة ونبدأ نسمعها سوا)

شرح الأحاديث والآيات اللي سمعته بسلسلة ميراث النبوة وقت سجلت بالبناء المنهجي، فتحلي بصيرتي بكتير أمور وكان الكلام رائع رائع وترك فيي أثر انعكس على شخصيتي الحالية.

وكل يوم بقرأ عقنواته بالتليغرام البوستات وبسمع التسجيلات، بقول سبحان الله هالشيخ كيف رب العالمين فاتح عليه بجانب التزكية والإصلاح وتربية الجيل الصاعد.

واثقة ١٠٠٠٪ مو بس ١٠٠٪ إنو إلا ما يغير هالكلام فيكم ولو ١٪ ويفتّح عيونكم على كتير أمور وقصص.

_
• لو كنت في بداية التزامك بالأذكار
واستثقلتها عليك لكثرتها
لا تضيع على الأقل استشعار بعض الأدعية
لا تقل أنها كثيرة طويلة لا أقدر عليها
ابني العادة بناء، دعاء فوق دعاء
يوم بعد يوم.. تجد نفسك تكررها مع الوقت
دون الحاجة لتذكير أحد أو قراءة من الهاتف.

ولنذكر أنفسنا دومًا أن:
ما لا يدرك كله، لا يترك جُله.


صبّحكم الله بكل خير أصدقائي 🌱.

• قال الإمام الشافعي رحمهُ الله :

إذا كنتَ في الطَّريقِ إلى اللهِ فاركضْ، ‏وإذا صعب عليك فهَروِلْ، ‏وإذا تعبتَ فامشِ، ‏وإذا لم تستطِعْ فسِرْ ولو حبوًا، ‏ولكن إيَّاكَ والرُّجُوع..

إياكَ والرجوع..

• ليش بترجف وقت تحس بالبرد، سألت حالك شي مرة؟ ❄️

- رح نبدأ بمعلومة بسيطة: (خليكم معي المعلومة مُبهرة)

الحرارة بتتدفق دائماً من الجسم السخن للبارد.
فلما جسمنا الدافي يتعرض للهوا البارد فالحرارة رح تتدفق من جسمنا (الساخن) للهواء "هي بشكل عام".

فوقت يكون هالهوا بارد كتييير، رح يبلش ياخد من حرارة جسمنا وبالتالي رح نحس بالبرد.

❄️ طيب كيف جسمنا بحاول يأنقذنا من البرد؟

رح يعمل ردة فعل واللي هي (الارتجاف والرعشة) ليصير في توازن داخلي بجسمنا ويأنتج الحرارة عن طريق هالرجفة.


❄️ معقول الرجفة رح تتولد الحرارة؟ كيف؟

- وقت تتحرك عضلاتنا بتولد حرارة، صح؟
+ صح.

[فلما نحس بالبرد.. بتصير هالمحادثة البسيطة بجسمنا بين أعضاء وأجهزة جسمنا]: 📞

💭 أجهزة الاسشتعار بالبشرة بتبعت رسالة (للدماغ):
نحن بحاجة للإحماء لحقنا.
💭 الدماغ بيبعت رسالة (للعضلات):
بدنا حركات سريعة من التقلص والارتخاء وبفترات قصيرة.
💭 جسمنا بيستجيب فورا: وببلش يرجف من الحركات السريعة للعضلات، فبتتولد (طاقة) بتطلق (هالحرارة) اللي بتخلي الجسم يتوازن داخليًا من حيث درجات الحرارة.


❄️ طيب حدا لاحظ وقت الرجفة كيف بشكّل جلدنا حبوب القشعريرة (المعروف بجلد الإوزة)؟

+ السبب اللي وجدته (وكان مُبهر): ✨

ارتفعت بصيلات الشعر ⬅️ أُغلقت مسامات الجلد ⬅️ الشعر المنتصب حبس طبقة من الهواء ⬅️ وأخيراً صار في حبس لحرارة الجسم ⬅️ (حافظ جسمنا عدرجة حرارته وأمّن التوازن الداخلي).

- ختاماً، خلونا نقول سبحان الله العظيم.

#مايا_بركات.
#معلومة_عالسريع.

_
• من يومين كنت عم فكّر، إنو سبحانك يا رب كيف حياة نبيك اللهم صل عليه وصلتنا كاملة موثقة بأدق التفاصيل، وكيف سبحانه كتب لنا ثواب لمجرد منقلده ﷺ بكل شي كان يساويه!

واتباع النبي والمشي على نهجه ﷺ مو بس فيه أجر.. وإنما كمان يُكسبنا محبة الله عز وجل إلنا وفيه مغفرة لذنوبنا ♥️.

قال تعالى في سورة آل عمران:
﴿قُلْ إِن كُنتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ ۗ وَاللَّهُ غَفُورٌ رَّحِيمٌ﴾

صلوا على خير الأنام.
اللهم صلّ وسلم وبارك عليك يا رسول الله ♥️☘.

• من السُنن المهجورة عن النبي ﷺ: 🍂

عند خلع الحذاء نبدأ بالشمال
وعند لبسه نبدأ باليمين.

وكذلك عند الدخول إلى المسجد
ندخل باليُمنى ونخرج منه باليسرى.

- عن عَائِشَة رضي الله عنها قَالت:
"كان النَّبِي صلى الله عليه وسلم يُعجبهُ التَّيَمُّن في تنعله وَترَجّله وَطهُوره وَفِي شَأْنه كُله.

تنعله: لبس الحذاء.
ترجّله: تمشيط الشعر.

#سنة.
#قال_رسول_الله.

البرد برا مميت،
وهي نحن عنا بيوت وعم نقول هيك
وما عم نصدق نفوت عالبيوت لندفى

ما عم اقدر استوعب إنو في عالم ساكنة بخيم عالبحر بهالظروف القاسية.

يا الله شو مؤلم هالتصور، اللهم فرج اللهم فرج 💔

• سؤال دريمر اليوم: 📚

كيف تحققون أقصى استفادة عند قراءتكم الكتب (حصرًا)، هلّا أفدتموني من فضلكم؟

لأن القراءة الكثيرة دون تطبيق ٥٠٪ كأدنى حد، يجعلني أشعر أنها غير مُجدية، وبالتالي أحبّ أن أقرأ عم طريقتكم في الاستفادة من الكتب..

كيف تعصرونها لاستخلاص الفائدة منها؟

• ‏علىٰ المرء عيش تجربته الخاصة، فالتّجربة لا تُورّث.

صباحُكم سكّر 🌸

• لمن دخل من جديد لقناة دريمر،
القناة ليست متخصصة بنوع معين من المنشورات وإنما أنشرُ على حسب ما أشعر به، وأحبّ أن نعيشُ الحماس معاً ونتشارك اللحظات الجميلة سويًا لعل وعسى تكونُ سبباً في شحذ حماسكم وهمتكم، وأحبّ مشاركة ما أحبّ من صور - أناشيد - قنوات - مؤثرين .. والكثير من الفائدة.

وأما عن المعلومات التي أنشرها، فكما يُقال.. "زكاة العلم نشره"..
وهي من ضمن اختصاصي، وبسبب ولعي بما أدرس أحب مشاركتكم المعلومات من باب إثراء العقول وإنارة البقع المظلمة فيها وكي نحارب الجهل ونصحح المفاهيم المغلوطة بما يتعلق بالغذاء ♥️.

وأخيرًا، لمن لا يعلم.. أنا أدرس في كلية الزراعة (دمشق) واختصاصي علوم أغذية.

ولأي سؤال، رابط الصراحة مُثبّت وهذا يعني أن بإمكانكم إرسال النصائح - النقد البنّاء - وكل ما هو لطيف 📬♥️.

- ملاحظات هامة:
• لا أقوم بالتبادل، أنشر القنوات التي أحبها فقط.
• لا أقبل في كروب المناقشة سوى الأسماء الواضحة الصريحة.
• لا أستطيع المساعدة في حال كانت مشكلتك شخصية نفسية.

• سألت حالك شي مرة وأنت عم تغلي الجبنة.. "ليش منغليها؟" 🤔

▪️هالسؤال دائماً كان يتكرر بعقلي بكل مرة بغلي فيها الجبنة، وبقول غريب؟ مو يفترض انغلى الحليب بعدين انصنع منه الجبن، بقا لشو الغلي مرتين ما فهمت؟

▪️ومن وين بتجي جرثومة البروسيلا اللي بتسبب "الحمى المالطية" اللي بضلوا بحذروا منها ونحن أصلاً يفترض قتلناها بعملية غلي الحليب قبل التصنيع؟؟

- رح نثقب فقاعة التساؤل بإجابتي هلأ (ركزوا معي شوي):

🧀 نحن منصنّع الأجبان بطريقتين:

1)_ تجبن حامضي: بتتم العملية لما نضيف حمض شو ما كان نوعه للحليب.
2)_ تجبن أنزيمي: منضيف المنفحة للحليب وبتكون ع شكل أقراص.

🧀 والإجابة المُبهرة موجودة هون:

▪️التجبن الحامضي:
أول نوع تجبن منغلي فيه الحليب.. يعني بتوصل حرارته للدرجة 100 مْ.
- وبينتج عنه: الجبنة الشركسية والأجبان الطرية.

▪️أما التجبن الأنزيمي:
ما منغلي الحليب قبل التصنيع، بكفي يوصل للدرجة 63- 73 (درجة حرارة البسترة).
- وبينتج عنه: الجبن الابيض البلدي والأجبان القاسية.

🧀وبالتالي، نحن منغلي الأجبان القاسية لأن بكون الحليب مو وصلان لدرجة الغليان قبل ما نستخدمه للتصنيع، وهاد يعني إنو ما بتكون ماتت كل الميكروبات الممرضة.

⁉️ صحيح مايا..
فوق ذكرتِ كلمة منفحة، فشو هالمادة؟ وشو مصدرها الأساسي؟

▪️ المنفحة: ببساطة هيّ أنزيم بيجي غالبًا عشكل أقراص منستخدمها لما نصنّع الجبن الأنزيمي.

أما استخراجها فبكون من المعدة الرابعة لصغار الحيوانات اللبونة اللي بتتغذى فقط عالحليب (كنتوا بتعرفوا مصدرها)؟

🧀 لهيك قلنا عن التجبّن اللي منضفله منفحة (أنزيمي) لأنه أنزيم مستخرج من المعدة.

بدها الكثير من سبحان الله مهيك؟
إنه كيف من نفس الكائن عم نحصل على أكتر من منتج وكلها مليئة بالقيم التغذوية الكبيرة.

#مايا_بركات.
#تغذية.

• صدقًا وقت أعرف هيك معلومات متل اللي رح انشرها هلأ، بحس بشعور لا يمكن وصفه من السعادة إني عرفت معلومة جديدة بهالتفصيل وبينتفض عقلي نفضة رهيبة 🏌🏼‍♀♥️.

وفعليًا كتير بيتغير مزاجي لما احضر لدكتور/ة عرفانين يعطوا المادة عن فهم مو بصم، وبيضلوا يسألونا ليش هيك صار؟ شو سبب كذا؟ وبتكون المحاضرة تفاعلية ولو طولت.

ممتع ورائع شعور المعرفة والتعلم..
الحمد لله على هالنعمة عنجد 💥


جاهزين للمعلومات الظريفة؟ ♥️

• سؤال جَدّي ويا ريت اي حدا ممكن يفيدني يجاوبني بكل منطقية وشفافية.

إذا في طلاب ماستر ودكتوراه بقناتي، معلش تحكولي إيجابيات الموضوع وسلبياته؟

بدي وصف كامل بدون ما تحكولي شعوركم، بدي بس العوائق والأمور المميزة اللي عم تلمسوها بهالرحلة أو لمستوها.