Dreamer 🌏💜

آخر شغلة.. كرمال الفلم اللي وعدتكم فيه الصبح
فكرمال ما تروح القناة بسبب حقوق النشر والقصص اللي مدقق عليها تلغرام من جديد..

عملت قناة خصوصي لانشر عليها الفلم 🌱

@Dreamerfilm

وجهوه عالسحابة لعندكن وحملوه وادعولي 💘.

• أي وبس شغلة عالسريع..

أول شغلة: أنا عاملة البوت للتواصل صح؟
إذا في موضوع ضروري فأهلا فيكم عالخاص غير هيك بالله خليكم عالبوت.

شغلة تانية: كروب دريمر مو لنشر الاقتباسات، ف الله يرضى عليكم حاجة تنشروا اقتباسات عليه (شو ما كان نوعها) أو روابط أو قنواتكم بلا إذن لأن ما حابة زعل حدا واحظره..

شغلة تالتة: أنا بحاول ساعد لما تبعتولي عالبوت قد ما بقدر.. أحيانا ما بقدر رد عليكم بسرعة فلا تزعلوا مني لأن كلنا عنا مية قصة بحياتنا

شغلة رابعة: أنا ما بنضم لقناة حدا انبعتتلي وقالولي انضمي، تلغرامي كتير صاير محدد وما عم انضم لمحل إلا لفعلاً لاقيه رح يفيدني (فهاد ما بيعني إنو قناتكم مو مفيدة بس أنا حاليًا ما رح استفيد منها)

شغلة خامسة: ما عدت عم أعمل تبادل، ولما انشر لحدا هون بكون نشرت لأني أنا بدي انشر مو لأن متفقة مع حدا.

شغلة سادسة: أنا ما بعرف حل المشاكل العاطفية ولا النفسية ولا أي مشاكل شخصية، أنا بساعد بقصص بسيطة وع قد معرفتي فلا تزعلوا لو ما رديت إذا كانت المشكلة مخربطة 🥹

شغلة سابعة: إذا اسمك مو واضح ما بقبل طلبك بكروب دريمر، ما شرط يكون اسمك كامل بس عالأقل مو نقطة ولا فجر الزمان.

شغلة تامنة: غادرت بعض القنوات اللي ما بتنشر محتوى أبداً، أو اللي فيها ليستات فاعذروني عنجد بس عم خفف العجقة.

شغلة أخيرة: لا تجوا تسألوني إفتاءات عالبوت، أنا طالبة لساتني وما عندي العلم الكافي بهيك شي + مو مسموح تسألوني أسئلة شخصية ولو بنات وشكرا لحضراتكم يا حلوين 🌱.

• عم تلاقوا صعوبة بحفظ القرآن الكريم وربط آياته وتذكر الحفظ القديم عم يكون شبه مستحيل؟

رح أعطيكم وسيلة تساعدكم كتير عالحفظ، بس قبل بدي قول شكرًا وجزاكِ الله خيراً وإن شاء الله بتكون بميزان حسانتها لرفيقتي "رغد" لأنها دلتني عهالوسيلة الرائعة اللي سهلت عليي الموضوع ٩٥٪..

كتير فادتني هالقصة كتير..
- صرت أحفظ الصفحة بوقت أقصر ✔️
- ربطي للآيات صار ممتاز وما عاد وقفت وأنا عم سمّع الحمد لله ✔️
- وحتى الآنسة فرقت حفظي كتير وأنا فرقت حالي بفضل من الله ✔️.

بالإضافة إني لما عم راجع حاليًا حفظي القديم، لقيت حالي متذكرة كل شي بس بدهن شوية تظبيط وتكرار 🥹.

🔵 رح نرتب الخطوات سوا:

🔷 ضروري قبل ما تحفظوا الصفحة تسمعوها لأي شيخ (وأنا بفضّل وبنصح بالشيخ أيمن سويد).

🔷 بعد ما سمعناها مرة، منسمعها مرة تانية ونحن عم نقرأ معه..

🔷 بعدين منفتح على أحد هالرابطين ومنشوف ربط آيات الصفحة اللي بدنا نحفظها (وهاد الشي اللي ساعدني كتير):

🔹 أنا مرتاحة لهالإنسانة الله يجزيها الخير، بس للأسف مالها وصلانة غير للأنعام يمكن..
https://youtube.com/channel/UCDEhJVtj9KU1LLhG88QkovQ?si=GPECHIW2d3wgwoay

🔹 بينما هون عاملة أغلب السور، وربطها حلو بس طويل..
https://youtube.com/@amirayosry?si=GqJo0CHe9cgCaQnJ

بعد الربط رح تلاقوا الصفحة بلشت تكرج معكم بإذن الله ✔️.

🔷 وأهم شي تقرأوا بصوت عالي، كل ما عليتوا صوتكم رح تلاقوا المخارج صارت أوضح وأزبط.

🔷 لتتأكدوا من حفظكم، يا بتسمّعوا الصفحة لحدا، أو سجلوا صوتكم وسمعوا الصفحة وحطوا إشارات عند أخطائكم.

🔷 وأخيراً، هي بتكون الصفحة صارت ماكنة إن شاء الله وفيكم تقرأوها بالصلاة لتمكنوها عالتمام.

(وطبعاً أنا ما ذكرت ضرورة استحضار النية قبل الحفظ، واختيار الوقت المناسب ويكون في هدوء، والالتزام بكل الآداب لتلاوة وحفظ القران)

أسأل الله أن ينفع بي وبكم ويستخدمنا بكل خير 💙.


#رسائل_من_الله 🕊.

• سابقًا سألت إذا بتحبوا انشرلكم فلم حلو عالقناة لتحضروه (بما إنه كان خميس).. فكرة هالفلم مميزة وبتشبه هالمنشور اللي عملت رد عليه.

ورجعت تراجعت بوقتها بعد ما حسيت البوست غير متناسب مع الأحداث الصعبة اللي عم نعيشها حاليًا.. وخجلت إني انشر هيك شي.

بس اليوم قررت انشره مساءً لأن فكرته عظيمة، (ولو إني ما استسغت تجسيد بعض الأفكار بالصورة اللي رح تشوفوها وما تقبلتها) إلا إنو في فكرة حلوة جداً فيه ومُستفادة 💕.

ولو ما حسيتو لطيف ومفيد، فما كنت رح قرر انشر هيك شي بهالوقت.

الفلم معروف كتير ويمكن تكونوا شايفينو، بس حابة اللي ما حضرانو لسا يتفرج عليه بس يفضى 🌸.

#أفلام.

• يقول الدكتور حاتم الأنصاري:
المرءُ لا يصِلُ بجُهده، أنت تبذِلُ جهدَك ثمَّ يفتحُ اللهُ عليك.‏

- يا صباح الخيرات دريمرز،
أرجو لكم يوماً مليئاً بالتوفيق والسداد 💛.

• كلنا منقول بيننا وبين حالنا..

- لخلص هالشغلة رح حس بالسعادة
- لما اتخرج رح انبسط
- لما رح اخد راتبي رح افرح
- وقت خلص الكتاب رح اشعر بالسعادة
- بس اوصل لكذا رح ارتاح وانبسط.

والحقيقة.. ✨
"هالكلام هو أعظم طريقة لإهدار حياتنا"

(بعرف إنو السعادة الحقيقية بالآخرة)
وهون مقصدي السعادة الدنيوية

من أسبوع كنت عم قول لرفيقتي، ع كتر الضغط بمهامي اللي عليي بطلت عم حس بلذة وأنا عم ساوي كل الأشياء، حتى الأمور اللي بحب اعملها وأنا اخترت فوت فيها بطلت ممتعة!

لهيك هالفترة عم حاول ما انتظر النهاية لأشعر بالسعادة، لأنها حتكون مرافقتنا بكل لحظة لما نحن نختار نعيش اللحظة صح ونستمتع بكل مهمة عم نعملها.

لما نشعر إننا تحت ضغط، طبيعي رح تبلش تتلاشى لذة الأمور ورح نبلش نلاقي طريقة لنخلصها بسرعة، وبالتالي منكون وصلنا للآخير بس ما حسينا كيف مرق الوقت!

وبما إنو كلنا منعرف هالكلام، عم ذكّر فيه لأننا ياما مننساه ومنفكر إنو بس نخلص اللي بين إيدنا رح نرتاح وننبسط..

وفعليًا السعادة الحقيقية إنو نمضي الرحلة بوعي للحظة الحالية، مع حمد الله على كل حركة وقصة عم تصير معنا (خير كانت أم شر).


#نصيحة_مايية 🩶.

• وبالرغم من كل هاد..

عم اشتغل على تصنيع منتج جديد (بسوريا)، استنوا عليي لخلص قراءة الأبحاث وطبق التجربة العملية بالبيت وشوف النتيجة 🤭♥️

_
وتهزمك فكرة إنو شغلك قد ما كان احترافي ما رح يتقدّر هون والعلامات نفسها للكل..

وتهزمك فكرة إنو في عالم بتشتري مشروعها جاهز وبتجيب علامة عالية أعلى من علامتك وأنت بتكون هلكت وتعبت عليه 🫡

• بتكون متحمس لمشروع التخرج،
وعم تدور على بحث مو مشغول عليه لتشتغل عليه كفكرة جديدة وتعمل تجربة عملية.

ثم تهزمك فكرة إنك عايش بسوريا 🫠💔 .

‏• الحمدُ للهِ الذِي أَذِن لنَا بيومٍ جَديد لِنعبده ونشكره ونَتوب إليه.

صباحكم سكّر يا أصدقاء 🤍.

- ‏متى تتوقف عن التعلّق بالأشياء؟

+ عندما تتوقّف عن البحث عن قيمتك بالأشياء.

_
يعني من الأمور اللي بتساعد الإنسان يتطوّر ويمشي بطريق التغيير الإيجابي:

يرسم الشخصية اللي بدو يكونها بباله
ويبلش يوميًا يحط أهداف صغيرة ليوصل إلها 💘.

يعني شو اللي بقربني من الشخصية الصبورة مثلاً؟

منحط تلت نقاط بسيطة -مثلاً- بتساعدنا لنمشي بهالطريق ومنتابع تحرّكاتنا لنشوف فعلاً عم نمشي ولا بحاجة تبديل الخطة؟

وعلى هالأساس منقيس كل شي (تقريبًا) سواء كان خُلُق أو مهارة "المهم يكون فعلاً بدنا نتغير مو بس عم نحلم بدون ما نطبّق" ✨.

_
• الأسئلة إلها إجابات ها 😁
اللي ما بلاقي إجابات للأسئلة: ٢-٣-٤
فأكيد هو بحاجة تفكير عميق أكبر ليوصل لإجابة حقيقية..

وإذا مثلا ما لقيتوا جواب أبداً حتى بعد التفكير..

فبظن لازم نحط ببالنا مهارة معينة حابين نمتلكها، ونبلش نشتغل عحالنا حتى فعلاً تصير جزء من شخصيتنا الجميلة ✨.

• تحدّي شهر تشرين الأول لتعزيز شعور الثقة ✨.

تأخرت من نشر التحدي اعذروني،
بس ما انتبهت انو كان نازل

💡 رح وضح للأشخاص الجدد طبيعة التحدي:

الموضوع بيحتاج دفتر للتدوين، وكل يوم رح تجاوبوا على سؤال بعد ما تفكروا فيه منيح ✔️.

هالتحدي بساعدكم تتعرفوا على حالكم أكتر، وبالتالي تعرفوا نقاط القوة عندكم وتفهموا سبب تصرفاتكم لمجرد عم تقضوا مع حالكم شوية وقت لتجابوا عالأسئلة.

واللي بحب يشوف بقية التحديات، بتلاقوها مثبتة فوق لكل الأشهر ☄.

#التدوين.

• اختر أن ترافق الأشخاص الذين:


وطبعاً هنا نقصد الصديق الحقيقي، الذي نمضي معه وقتاً طويلاً ويُعد من الدائرة القريبة ونأمن معه على أنفسنا..

أما الزمالة سواء كانت دراسة أم عمل، قد لا تتوفر معظم هذه الصفات، المهم ألا تكون علاقتنا بهم سامة وتترك مشاعرًا سيئة عندنا عند الجلوس معهم..

وطبعًا، كي تُوفّق لتجد صديقًا بهذه الصفات التي في الصورة، حاول أن تكون هذا الشخص قبل أن تبحث عنه! 🏌🏼‍♀

• نبدأ بالإنجاز الصباحي العظيم
(ومن قلبنا) في حال لم تقرأ أذكارك حتى الآن: 💫♥️

سبحان الله، والحمد لله، ولا إله إلا الله، والله أكبر.

حسبي الله لا إله إلا هو، عليه توكلت وهو رب العرش العظيم.

أعوذ بكلمات الله التامات من شر ما خلق.

يا حي يا قيوم برحمتك أستغيث، أصلح لي شأني كله، ولا تكلني إلى نفسي طرفة عين.

رضيت بالله ربا، وبالإسلام دينا، وبمحمد ﷺ نبياً ورسولاً.

بسم الله الذي لا يضر مع اسمه شيء في الأرض ولا في السماء وهو السميع العليم.

اللهم صل وسلم وبارك على سيدنا محمد وعلى آله وصحبه وسلم.

ولا ننسى نية طلب العلم، وبالتوفيق بكل تحركاتكم وصباح الخيرات ♥️🌱.

• ركعتي التوبة والاستغفار جزء من الإدمان وليست الحل!


هلأ سمعت هالبودكاست قبل ما انشره،
الكلام جداً منطقي بعيداً عن الكلام النظري اللي منسمعه كتير.. وبيتحدث عن مراحل تشكل الإدمان شو ما كان نوعه، وشو الحل؟

جدًا مؤثر جدًا وسُيعين إن شاء الله عالتوبة بشكلها الصحيح بحيث تبطل توبتنا جزء من ارتكاب المُحرمات ✅.

#أحمد_الصابوني.
#بودكاست.
@MayaDreamer.