قناة خطباء المنبر الحسيني للقصائد

#محرم
#العباس ع
#لسان كال العقيلة(ع) عندما رأت الحسين(ع) و قد عاد وحيدا من الميدان بعد شهادة العباس(ع) ..
(طور لمّن حدى الحادي..)

ليش الظهر مكسور .. ليش الدمع منثور .. چنّ الگمر منحور .. يا خويه جاوبني
وحدك يبو النوماس .. وين البطل عباس .. فرحانه اشوف الناس .. وينه الكفل ظعني
راجع مِنِ الميدان .. دمعك شبه طوفان .. وينه گمر عدنان .. خافن رحل عنّي

جواب الحسين(ع)

راح الگمر نوحي .. فگده فِجَع روحي .. واكتملتِ جروحي .. منه انگطع ظنّي
شفت السهم بالعين .. شفت العمد بجبين .. و مگطّعه الچفين .. مْصابَه خُطَف لوني
بعده شمت بيّه .. شمر و گصد ليّه .. ظل ينظر عْليَّه .. و عنّه يسايلني

العقيله (ع)

خل اگصده بدمعي .. خل اخْبِرَه بْوضعي .. يمه اگعد و أنعي .. بلچن يلبّيني
خل اجمع اوصاله .. وَ اداوي دلّاله .. وَ احَلفَه بعياله .. وَ اسَمِّعه وْنيني
يم النهر اوصل .. من ريحِتَه أندَلّ .. اسأل اذا يقبل .. عدوانه تسبيني

جواب الحسين(ع)

رحميني يا زينب .. گلبي ترى تعذب .. فقد الأخو يصعب .. يا روحي عذريني
لا ما تِلِحگينه .. غُمضَت ترى عيونه .. يا ريت انا دونه .. بْسَهم انطفت عيني
وا ويلي عالعباس .. ويلي عْلى جَرْحِ الراس .. ويلي عْلى بو النوماس .. وين اليعزّيني

#فاطمة_رزق

#محرم
#العباس ع
#شكوى زينب(ع) عند جسد العباس(ع)..

اجيتك خويه و عتابي أدري يجرح الخاطر
لكن همي ما ينشال راواني العجب عاشر

لمن غابت عيونك عن عيني و توادعنا
رد وحده ابو الأكبر باحوالك يخبّرنا
گال چفوفك عْلى الگاع و شنهو اللي يصبّرنا
فگدك يعني فگد حسين يعني طايح الساتر

لن ساعه و شفتها الخيل گصدَت خويه لِخيامي
وْ بِن سعد اعتنه بالنار حِرَق داري عْلى أيتامي
شَذكُر يا أبو فاضل تكثر خويه آلامي
بفگدك يا عزيز الروح ريت افگد ضوا الناظر

و الأصعب يبو فاضل نظرات الغرب لينا
واحد شفته لرجاله بيأشر عَلى سكينه
واحد بيده شايل سوط وْ شامت ينظر علينا
وين اتوجه و لِحسين شِفْت بْصدرَه اْثَر حافر

#فاطمة_رزق