#السلام(٤) المعنى الثاني لاسم الله السلام معنى يشعرك بالراحة والسكينة والاطمئنان والشعور بالأمان. عارفين كده ولله المثل الأعلى لما يجي ابنك الصغير اللي عنده ٦سنين عاوز يشتري عجلة كبيرة وليها مواصفات سرعة معينة، وانت شايف إن المنطقة اللي انت ساكن فيها خطر لأنها طريق عربيات رايح جاي وهو طفل ومش بيعرف يسوق وكمان من صفاته إنه قليل التركيز والاهتمام ومتسرع وبيحب يخاطر. يا ترى هتشتريله العجلة ولا هتأجلها لحد ما يكبر شوية او لحد ما تشترك في نادي تحسي فيه بالأمان على طفلك؟ 🌱اكيد هتأجلها ساعتها ابنك هيغضب اوي وممكن بينه وبين نفسه يتهمك بالظلم أو إنك مش حنين و اي صفة من اللي ولادنا بيوصفونا بيها لما نحاول نحميهم من نفسهم. هل أنت كده فيك نقص او ظلم؟ اطلاقا تعرف امتى يكون عندك نقص وظلم وقصور؟ 🌾لما تشتري لابنك العجلة وانت عارف انها ممكن تكون سبب هلاكه وضياعه. 🍃ولله المثل الأعلى ربنا سبحانه وتعالى بيمنع عنا حاجات بتبان لبعضنا ان وجودها خير لكن ربنا بسابق علمه عالم إن الحاجة اللي نفسك فيها بالشكل الكبير ده لو حصلتلك هتحمل معاها كل الشر فبيمنعها عنك رحمة ولطفا بيك. 🍂أحنا عشان مش مدركين أبعاد الموضوع بنحزن ونتأثر بس للأسف بعضنا اللي ايمانه ضعيف بيبدأ يكلم نفسه كلام لا يجوز شرعا زي : ليه ربنا بيعمل فيا كده وتبدأ الوساوس والظنون السيئة تشتغل وتأثر على القلب. 🌾بس لو عرفنا معنى اسم الله السلام وعشناه بقلبنا وبدأ اليقين يتغلغل جوانا هنشعر بالسلام النفسي وهيصبح الشيء اللي ربنا بيمنعه عننا احب الينا من حدوثه لينا. المعني الثاني لاسم الله السلام ⬅️السلام هو الذي سلِم المخلوقين من ظلمه 🌾يعنى وانت مع ربنا تطمن تماما 🌾 متخافيش من اي ظلم في الدنيا ولا في الأخرة. 🌾تتيقن إن كل حدث بيحدث لك في حياتك هو منحة من الله حتى وان كان ظاهره ابتلاء 🌾تتيقن ان الأمر الصعب اللي بتمر بيه ووصلت معاه لمرحلة التوحد مع الحزن والانصهار في بوتقة الألم .. الأمر ده ربنا وضعه في طريقك مش عشان يظلمك حاشا لله، او يعذبك.. ولكن هي رسالة لك 🌱رسالة تقربك منه سبحانه وتعالى. 🌱او تبعدك عن معاصي بتعملها 💫او تقوي شخصيتك وتغير من طباع ملتصقة فيك بتهدر طاقتك النفسية وبتسبب لك عدم السلام النفسي.. وبتعيشك في حزن دائم أو خوف أو عذاب نفسي 🍃مفيش حاجة بتيجي من ربنا شر ابدا بس الذكي اللي يفهم الرسائل الربانية النبي صلى الله عليه وسلم كان بيقول في دعاء من ادعية الاستفتاح👇👇👇 "لَبَّيْكَ وَسَعْدَيْكَ وَالْخَيْرُ كُلُّهُ فِي يَدَيكَ ، وَالشَّرُّ لَيْسَ إِلَيْك" يعنى مفيش شر جاي منك يارب افعالك كلها محض خير حتى لو احنا مفهمناش الحكمة منها. ⁉️طيب ايه اللي بيخلينا ساعات مش بنحس بالسلام النفسي ده؟ ⚠️سبب كبير إن بعضنا للأسف بيعبد الله للأسف بمبدأ غريب يعنى لو ربنا اداله خير يبقا زي الفل في عبادته لله، وأول ما يحصله ابتلاء خفيف يبدأ يبعد عن ربنا وده بيخليه ميحسش بالرضا عن الله وبالتالي عمره ما هيحس بالسلام بينه وبين نفسه. ⚠️يعنى لما يصاب بمرض يقول هو انا هفضل طول عمري كده ويبقا معترض ومتضايق وبالتالي يفضل علطول حاسس بالم المرض(الألم النفسي قبل الجسدي) ⚠️البعض مش بيدرك حكمة ربنا وبالتالي مش بيرضى عن قضاء الله وبالتالي مش بيكون في حسن ظن ولا يقين. كل المشاعر السلبية دي بتتفاعل وتعمل احساس بالضياع النفسي والشتات وعدم الاستقرار النفسي ⬅️ مثال 🔸امرأة جميلة اوي في اخلاقها وطباعها ولكن للأسف بتعاني من صراعات داخلية فظيعة السبب ايه خطوة معينة مهمة في حياتها كانت هتخليها في مصاف الناس المميزة بالفعل على حاجة بسيطة خالص خالص لا تُذكر ضاعت منها الفرصة فرق ربع درجة بينها وبين كلية الطب اللي كان نفسها فيها. بعدها عاشت اختنا دي حياة عادية حست فيها بانعدام القيمة حست بالدونية انها ولا شيء بدأت تشعر بالاكتئاب والتوتر والضيق النفسي المستمر 💡لو حللنا الموقف ده هنلاقي ان ربنا منع عنها فرصة في نظرها هي كل الخير بس محدش عارف ممكن كانت تكون سبب فتنة ليها او انشغال عن دينها او ولادها فولادها يضيعوا او اي سبب احنا لا ندركه. ✍🏻هي تركت نفسها فريسة للاكتئا عشان ما احسنتش الظن بالله عز وجل لو قالت انا لله وانا اليه راجعون اللهم اجرني في مصيبتي واخلف لي خيرا منها وحمدت ربنا على كل افعاله وبدأت تغير المسار كانت ممكن تلاقي ابواب تانية روعة تتفتح لها وتحمل كل الخير ليها ⚡️بس هي ضيقت افق تفكيرها ونظرتها للأمور ولم ترض عن الله فلم تحصل على السلام النفسي للاسف. 🌿طيب عشان مكونش من النوعية دي وموصلش للمرحلة دي يبقا لازم اثق في معنى اسم الله السلام وأن السلام هو الذي سلم المخلوقين من ظلمه. 🌱يعني مش بيظلم 🌱يعنى كل ما يحصل لك حاجة في نظرك سيئة اعكس الصورة وبص للجانب الحلو فيها 🌱احسن الظن في الله 🌱خلي عندك يقين فيه 🌱ردد دايما والشر ليس إليك. رضا الجنيدي #أسماء_الله_الحسنى