القريب 🔟 اسم الله القريب من خلاله بتوصل لنا رسائل📩 عظيمة. رسائل 📩 بتنبهنا إننا لازم ننتبه لمدى قربنا أو بعدنا من الأمور اللي بتحي قلوبنا أو تميتها. 🌟ودي رسائل برسلها لنفسي أولا ثم لكل مسلم ومسلمة .. رسائل عنوانها👇 (خليك قريب) 💞خليك قريب من مصحفك هتلاقي فيه السكينة والهدوء النفسي والسعادة.. راقب مدى علاقتك بكتاب الله وشوف نفسك.. يا ترى مبيعديش يوم إلا وبيكون لك لقاء مع مصحفك وبتكون قريب ليه، ولا بتعدي أيام وأنت هاجره وناسيه؟😔 قربك من مصحفك هيقربك من السعادة الحقيقية في الدنيا والآخرة😁.. خد قرار وابدأ من دلوقتي علاقة قرب وحب جديدة مع كتاب الله وثق إن كل ما قربت من مصحفك بإخلاص و تدبر وحب واهتمام هتكون بإذن الله ممن يحبهم الله وافتكر" وما زال عبدي يتقرب إلى بالنوافل حتى أحبه" 💞خليك قريب من الفقراء والمساكين وتذكر إن الساعي على الارملة والمسكين كالمجاهد في سبيل الله،. 🌺ابحث عن أرملة وتابع شؤونها. 🌺ابحث عن يتيم وقرب منه قرب معنوي وقتها قلبك هيصبح مملوء باللين والرحمة وتلاقي نفسك بتقرب خطوات من النعيم الحقيقي بإذن الله. 💞خليك قريب من اخواتك البنات بعد زواجهم.. متسبهومش يواجهوا مشاكلهم لوحدهم .. خليك معاهم بالنصيحة الحكيمة والاحتواء والمساعدة والحب والرعاية وجبر الخاطر. 💞خليك قريب من من ولادك بلاش يتسولوا منك اللحظات والدقايق اللي بتسعدهم بوجودك معاهم.. السنين بتمر وكل واحد من ولادك هيروح بيته وهتفضل أنت مع الذكريات تتمنى لو كنت قريب منهم في صغرهم عشان يقربوا منك في كبرك. 💞خليك قريب من الطاعات وافتكر إن الطاعة بتجر طاعة والمعصية بتجر معصية، افتح أبواب قلبك لطاعة جديدة علها تكون سبب قربك من القريب بإذن الله. 💞خليك قريب من نفسك وافهمها صح.. احتويها.. طبطب عليها.. عالج ضعفها.. متيأسش من إصلاحها. نفسك محتاجة منك صبر محتاجة منك قرب محتاجة منك دعم محتاجة منك إرادة إنك تساعدها وتقربها لكل ما هو جميل. 💞خليك قريب من الدعاء.. تمسك بيه.. افتكر إنه قارب نجاة.. افتكر انه تمام زي المطر اللي بيعيد للأرض الميتة الحياة.. افتكر وعد ربك "ادعوني استجب لكم" على قدر قوة دعائك وإخلاصك فيه وثقتك في ربك هتلاقي ثمرة دعائك بإذن الله. 💞خليك قريب من القريب عشان يتقرب منك.. تخيل كده قرب ربنا في منتهى الروعة ازاي! تعالوا نشوف الحديث القدسي ده: عن النبي صلى الله عليه وسلم فيما يرويه عن الله تعالى أنه قال: من تقرب مني شبرًا تقربت منه ذراعا، ومن تقرب مني ذراعا تقربت منه باعا، ومن أتاني يمشى أتيته هرولة ( رواه مسلم) احنا في منتهى الفقر إلى الله عز وجل والاحتياج إليه ومع ذلك لما بنقرب من الله خطوة يتقرب الله منا بأفضل مما نتخيل. 💞خليك قريب من القريب بإنك تستشعر قربه منك.. قربه بعلمه وبقدرته فاحفظ بصرك وسمعك وجوارحك. 💞خليك قريب من القريب عز وجل بإنك تتعود تحكي وتشكي له عز وجل وثق إنه مُطلع على حالك، ويعلم ما أنت فيه من ضعف وثق إن القريب هيرزقك كل الخير ولكن عليك الصبر وعدم التعجل 🌟اللهم اجعلنا من المقربين. 🌟اللهم اجعلنا ممن يعبدك كأنه يراك 🌟اللهم ارزقنا خشيتك وتقواك. رضا الجنيدي #أسماء_الله_الحسنى #فإني_قريب #إطلالة_على_اسم_الله_القريب ✍ كلنا راحلون ويبقى الأثر.. فلنترك أثرا قبل الرحيل. قناة الكاتبة رضا الجنيدي على التلجرام @Redaalgeneedy صفحة الفيس بوك https://m.facebook.com/Reda.Geneedy