الشاعر ظاهر حبيب الهليجي

استشهاد التابعي الجليل سعيد ابن جبير رضوان الله عليه

الشاعر ظاهر حبيب الهليجي (سعيد بن جبير ع)

منهاج الطف منهاجك ----- شيدته ابدم اوداجك
يسعيد وأصبح تاجك ----- بدم الشريان
---
مظلوم وصبح نحرك ثمن حبــــك
شلت حب الحسين بروحك وكلبك
عاشك للشهاده واصبحت دربــــك
وعليت ابهل النهج مولاي يم ربـــــك
لا للحجاج وحكمه ----- دمك خط هاي الجلمه
هيهات النهج وظلمه ----- بدم الشريان
---
يا ثالث ذيبح وراسه يتكلـــــــــــــــم
نطق بأسم الجلاله واشتكه امن الهم
سعيد ابن الجبير وللفخر معلــــــــــم
نبع نحرك سليل الزود يوســـــــــــم
وثق تاريخه بنحره ----- مكصد للهايم گبره
وفاي الأبن الزهره ----- بدم الشريان
---

امتله گلبك يعالي الشان وتصــــــدر
على العالم عشگ للمرتضى الاطهر
وثمن حبك هديته من دمه المنحــــر
هنيأ يا سعيد الجنه والكوثــــــــــــــر
نورك ساطع للتالي ----- كبرك شامخ ظل عالي
مهيوب ويبقى يلالي ----- بدم الشريان
---
انثلم سيف الحقد يم منحرك يسعيد
عدت طف المواجد والروايه اتشيد
صرت مثل الحسين ابموقفه أوي يزيد
رسم صوره ثباتك والزمان ايعيد
ذليت الطاغي وربعه ----- ولاهبت اسيوفه وجمعه
ويشهدلك رب السبعه ----- بدم الشريان
---
هليله الك نهمل مدامعنـــــــــه
ذكرك يالحبيب حسين يجمعنـه
عهد مولاي الك تبقه مآتمنه
بحبك عل المأتم والله عاهدنـه
مولاي بيوم امصابك ----- نادت بالحسره احبابك
حزنانه وكلهه ابابك ----- بدم الشريان

الشاعر الحسيني ظاهر حبيب الهليجي (الإمام العسكري)

يلمهدي اليوم حيلك مهدوم
بسامره اتنوح والدمع ادموم
آهاتك من تشكيها بس الله اليعرف بيها
يلمهدي اليوم يلمهدي اليوم
*
بمصاب العسكري هل الليله يم بابه
لفه المهدي ودمعته بعينه سجابه
بخياله انعاد ظلم الصار واسبابه
لبوه أونار صدره أعليه لهابه
بعينه الدمعات بصدره العبرات
مهدوم الحيل ونار الحسرات
جلماتك من تحجيها بس الله اليعرف بيها
يل مهدي اليوم يل مهدي اليوم

أنفاسه تلجمه والهوه مخنوگ
بصدره علمصيبه والگلب محروگ
وبعيونه الضوه كثر الدمع مبيوگ
المناحه للأبو من ابنه مثل الطوگ
يعيش الياويل ودموعه تسيل
يبقه أبلياه مايملك حيل
واهاته الي يحويها بس الله اليعرف بيها
يل مهدي اليوم يل مهدي اليوم
*
جم جرح ابجرح هليله تتذكره
من كسر الضلع حد يوم سامره
عشتهن لحظه لحظه وانت بلحظره
يا نار ابدليلك هسه الموجره
صرخات ايتام لودرب الشام
عايشها بنوح لونار خيام
نارك ياهو يطفيها بس الله اليعرف بيها
يل مهدي اليوم يل مهدي اليوم

ابوك احقاد صابوا جبدته بالسم
بمثل هل يوم وأنت تشوفه يتألم
البگه براسك مأسي ودوم ماترحم
جثيره إحباب فاگد أولها تتهظم
گلبك مجروح علظل مذبوح
فوك التربان والدم مسفوح
ايام الي تگظيها بس الله اليعرف بيها
يل مهدي اليوم يل مهدي اليوم
*
يل فاگد عزيزك الله الي يعينك
مظيوم وعله خدودك دمع عينك
ايام وليالي ماهده اونينك
عشتها بل مناحه سيدي اسنينك
ياراعي الثأر بخدوك صار
دمع التبجيه لجل الاطهار
لجماتك من ماضيهه بس الله العرف بيها
يل مهدي اليوم يل مهدي اليوم

الشاعر الحسيني ظاهرالهليجي (نعي أستشهاد رسول الله ص)

البنيه ابوها أيصير غالي
وبوي اليوم منه البيت خالي
يتيمه وآه يابعده أشجرالي
بعد شيردهن وياه الليالي
*

تذوب الروح وكت المغربيه
لن متعوده اشوفك كل مسيه
وحشه الدار ودموعي جريه
اشحال الزهره بويه بهل رزيه
*

يشمعة بيتي بوبه وضي العيون
تعال أولادي بخلافك يونون
زينب والحسن وحسين يبجرون
عله فراشك مدامعهم يهلون
*

ينوح الكون عل الون الاونه
ابوي الماكو بين الناس منه
راح وراحت أوياه المحنه
بعد هيهات مايلتم شملنه
*

كون الموت يأخذ روحي وياك
ادعيلي اموت وياك ارجاك
تعال الدنيه ما تسوه بلياك
ذبل عودي بكثر ما انه اانعاك


نعي استشهاد رسول الله محمد ص

الشاعر الحسيني ظاهرالهليجي
(أستشهاد رسول الله ص)

يدوي نحيبه ودع حبيبه
حدر الترايب هاي مصيبه
*
ابد ما يوم بين عل وجه همك
لاكن عل الحنين امبين أبرسمك
لأن حب النبي مولاي وي دمك
بحيث الهاب لومر ريتك أيلجمك
شيب دليله الخله وخليله
مايغفه جفنه والهم ربيبه
*
علي الليله يرد مخنوگ بل عبره
بي وداع الحبيب الي كسر ظهره
رسول الله وابن عمه وابو الزهره
يدفنه اليوم بيده وياعظم صبره
حيله تهدم دمعاته من دم
من المأسي ماخذ نصيبه
*
الدفن بيده أخيه شلون يتصبر
متخوصر يرد وجدامه تتعثر
عله فراگه ويظل الموته يتنطر
لان صعبه يعيش بدونه ما يگدر
يهوه المنيه بعد الرزيه
لجروحه صعبه يلگه طبيبه
*
علي شحالك يل شايف نبض گلبك
طبك جفنه و روحه صعدت الربك
وانت الََماتعيش بدون الي يحبك
صعب حالك علي وأظلم صبح دربك
دنياته ظلمه فگده يأامه
يصعب مثاله يكدر يجيبه
*
الله إيعينك وانت التهيل اتراب
عله گبرلحبيب ودمعك. امنخضاب
جم اصواب گلبك صابه جم صواب
بلحظة مدفنه وجرحك ابد َماطاب
جرحه مواجع هم ومدامع
موسهله گلبه. يبرد لهيبه

الشاعر ظاهر حبيب الهليجي
(استشهاد رسول الله)

اويلاه اويلاه يالمصطفى
اويلاه اويلاه يالمصطفى
--- ---
عيني تدمع يم ظريحك ماترد اجوابي
انه فاطم بويه اجيتك اشكي ناري صوابي
هشموا ظلعي يبويه والسعير ابابي
اسمع بحسرة دليلك من سمعت اعتابـي
اويلاه اويلاه يالمصطفى
اويلاه اويلاه يالمصطفى
---
شبــو النار أعلـــه بابـي وانــه شاهـد حيـدره
مكيد بحبل الوصيه صعبه اوصف منظـــره
والاشد شاف الظربني ودمعه دم أعله الجره
يمــك الليلــه اشتكيلــك بيــه نــار اموجــــره
اويلاه اويلاه يالمصطفى
اويلاه اويلاه يالمصطفى
---

طبع اصابع فوك خدي من حقــدهــم ظــل اثـر
وعيني حمره من السقيفه وهذا ظلعي الي نكسر
وهذا طفلي جبته بيدي يالله فك باب الكبـــــــر
خاطري مكسور ما اظن ينفــع جبــــــــر
اويلاه اويلاه يالمصطفى
اويلاه اويلاه يالمصطفى
---
انت انفاسي اﻻشمه صعبه بويه حالتــــــي
والله ليل ألي يمرني بصدري تلهب حسرتي
مدلي ايدك انه يمك طلبه تمسح دمعتـــــــي
عن ونيني السدره تشهد تجري دمعه لحالتي
اويلاه اويلاه يالمصطفى
اويلاه اويلاه يالمصطفى
---
كوثري من الدمع وشل يارسول الله عليــك
حزني فاق الكون كله وانه بلدمعه ارتجيك
طلبه ادعيلي يبويه يدنه موتي حته اجيــك
ظاكت الوسعه بغيابك للجليل ارفع اديـــك
اويلاه اويلاه يالمصطفى
اويلاه اويلاه يالمصطفى
-----

الشاعر الحسيني ظاهر الهليجي (استشهاد رسول الله)

ياعلي هل الليله روحك هايمه
من دفنت الهادي ياراعي الحمه
*

يعينك الله يا أمير المؤمنين
من ترد الفاطمه بدمعة العين
ياعلي بوداع سيد المرسلين
سيدي الحالك بجت أرض وسمه
*

شحال گلبك من جفن عينه غفه
شحال گلبك من دفنت المصطفه
شحال گلبك والدمع ماظن كفه
ومن تشوف الدار وحشه ومضلمه
*

شحال لو نشدوا عليه سبطينه
بويه جدنه اليوم مامر بينه
شيقنع الليله الحسن وحسبنه
هنانه انفاسك اظنها الخاتمه
*

ياصبر من تدفن الهادي بديك
وهوه عينه ياعلي تدمع عليك
يدري بعده النايبه منهم تجيك
يدري بصحاب السقيفه المجرمه
*

يا مرار أتعيشه من بعد الابي
وانت المفارگ اخو مو بس نبي
تودعها وترد اظن دارك حبي
دموع عينك سيدي نزلت دمه

*

الشاعر الحسيني ظاهرالهليجي
(أستشهاد رسول الله ص)
من بعدك يل هادي اخباري
كسرو ظلعي وحركو داري
يوصف وظعي هلت دمعي
*. * *
يم گبرك اجيت بلوعه لعتابك
حرموني البجي يل هادي لمصابك
اصحاب الظﻻله النكروا اكتابك
عدواني صفوا من بعدك اصحابك
هل ليله بمحرابك نوحي
وشكي مصابي وهاي جروحي
لكبرك اسعي هلت دمعي
*. * *
شسولفل ياعذاب بغيبتك عني
هظم والنوح مايقبل يفاركني
برسومك محرابك يذكرني
اظل انحب عليك بلوعتي وني
فكدك يلوالد مايرحم
يخلص ليلي وانه تهظم
اصبح طبعي هلت دمعي
*. * *
بحلم يل ماشي عني كون اشوفنك
وبلهفة حنيني حيل اظمنك
ومن صدرك يبويه ريت اشمنك
وروح وياك بويه وما اعوفنك
وشرحلك حالي واهاتي
ودموعي اتسولف جلماتي
اصرخ ونعي هلت دمعي
*. * *
ياشمعة حياتي الظوة اسنيني
رحت والدنيه ظلمه صارت بعيني
وينه الموت بعدك كون يلفيني
ماريدن حياتي أوياك خلبني
ريت الليله تصير اجالي
واتوسد گبرك يلغالي
للباري ادعي هلت دمعي
*. * *.
ليل انهار بعدك دمعي بعيوني
خذو حقي غصب من گاعي حرموني
أصحاب السقيفه الويل راووني
وره الباب الصحابه بغيض
عصروني
شفت بعيني وليدي المحسن
غسلته بدمعاتي السجبن
كسرت ظلعي هلت دمعي
*. * *

الشاعر الحسيني ظاهر حبيب الهليجي(أستشهاد رسول الله صلى الله عليه وآله )

يعينك الله ياعلي بهاي الرزيه
الليله دافن بل گبر سيد البريه
جرحك الماله شفه يل دفنت المصطفى
*
عظم أجرك سيدي بهذ المصاب
الليله أبو الزهره النبي حدر التراب
بهل المصاب ادموعك توزع ثواب
ويا دمع تبجي اظن دمعك خظاب
روحك وروحه اظن صعدن سويه
يعينك الله ياعلي بهاي الرزيه
ودعت نبع الوفه يل دفنت المصطفى
*
شكان حالك ليه من جفنه غفه
لو بحر دمعك عليه ماظن كفه
الكون بعيونك عليه اسود صفه
ياعلي من بعده عل الدنيا العفه
بهل الكلام السانك ترتل عزيه
يعينك الله ياعلي بهاي الرزيه
موتك ابموته صفه يل دفنت المصطفى

شحالك وطه النبي ميت بديك
ياعلي وعينه بقت تدمع عليك
يعرف بظيم السقيفه يصير بيك
أبنار دارك والزجيه تنتخيك
خبرك بيها وترك بيها بوصيه
يعينك الله ياعلي بهاي الرزيه
وانت دمعك تذرفه يل دفنت المصطفى
*
ياعلي حگك لون تهمل دمه
للمصاب ألي فجع گاع وسمه
يعينك الله من تنشدك فاطمه
بيا عذر تقنعها يا حامي الحمه
من تعزيها بأبوها هل المسيه
يعينك الله ياعلي بهاي الرزيه
ياحزن بيك اكتفه يل دفنت المصطف
*
شلون لو نشدوا عليه سبطينه
بويه جدنه الليله مامر بينه
شيقنع الليله الحسن وحسبنه
وهوه جان يحطهم بنص عينه
راح هل الليله ملاذ الهاشميه
يعينك الله ياعلي بهاي الرزيه
گلت عل الدنيه العفه من دفنت المصطفى

عظم الله اجركم باستشهاد رسول الله نبي الرحمة محمد ص

عظم الله لكم الاجر والعزاء احسن الله عزائكم بمصاب سيد الشهداء علية السلام واربعين سيد الشهداء ع

السيده رقية عليها السلام ☝️

الشاعر الحسيني ظاهر الهليجي
(رقيه ع)

تدري – مـن بعدك بنوح وشجن
تدري – وعيوني بفگدك عمن
تدري – كثر المأسي والمحن
تدري
-------------------
يل نمت بل دم انه يمك رقيـــه
جيت اشكي حالتي وظيم العليه
ماي ماينطوني بويه ال اميـــه
فوگ كل هذا بحبل شدو اديــه
حالي – من بعدك يـبجي الصخــــــر
حالي – وتغيــر بكثـــــر السهـــــــــر
حالي – ودموعي من بعدك دمن تدري
-----------------
حيل اصيحن وين ابويه ايطفي الخيـام
اركض ونار بثيابــي ويـــه الايتــــــام
سلبـو ترجيتي بويـــه نـاس ظــــلام
ليـش عايفني وحيـده بكربله انظام
بويه – اصرخ وصيح بلا وعـــــي
بويه – بسياطه طكني ابن الدعـــي
بويه – هيج اقسه وياي الزمن تدري
-----------------

انه هذا الليل ما نمته بغيابك
لأن متعوده أنامنه برحابــك
عاتبيتك والدمع رايد جوابـك
وانه ماريدن ازيد من عذابك
ظاكت – دنيانه من بعدك احــــــــس
ظاكت – وبفجري ما طلعت شمــــــس
ظاكت – اهاتي بصدري رسن
تدري
-----------------
انت كعبه بعيني وانه جيت اطوفـــــــــك
ظاميه اعيوني اعله رسمك ما تشوفـك
انت تدري الساني يلهج بس حروفــــك
هاك اخذ روحي ويروحك ما اعوفك
موتي – مشتاكه اشوفك هل گرب
موتي – يبرد غليلـي بهـل الكلـــب
موتي – طفله غريبه ابلا وطن تدري
-----------------

انه من ثغـرك اشمـك بويـــه شمنــــي
وبيــن ذرعانــك تظمنـــي علمتنــــــــي
بويه بعدك هدا سبني وذاك طكني
راح احلفــك بل الزجيــه شوف متني
ناري – مـا تهـده مـستعره تظل
ناري – مستعـره تبقـه للاجل
ناري – دلالي بلعبره نسحن تدري
--------------------------------

الشاعر الحسيني ظاهر حبيب الهليجي (ولائيه)

كتبنالك عهـد بالــذر --- يحسين بدمه المنحر
لليعشـك حبـيـبه --- يدفع دم ضريبه
*
شمى طال الـزمن يحسين --- أركاب الشيعه عالمذبح
ضريبه مـن الدموم انطــت --- لحــد اليـــوم هـل تسفح
اميـه وكـــل بــن العبــاس --- تاريخ الحقــــــد يشرح
بغضأ لليحـب حيــــدر --- قضيه أمــن الشمس اوضح
شمى سال الدمه اعله الكاع --- تخضر مـن جديـد اتباع
والحبكم عجيبه --- يدفع دم ضريبه
*
رد بينـه الـزمن مولاي --- لرض الطـف رجع بينه
هـذا الناصبي وجيشـه --- كلهــه تريـــد تولينـــــه
تحزمنـــه بمحبتكــــــم --- صحنه المــوت جاوينه
ابلبيـك النـــــداء انصيح --- يحسين انتـــــه والينه
ركاب بحبــــك انقدم --- الـك يحــــــسين مانتهم
للشيبه الخضيبه --- يدفع دم ضريبه
*

رضينـه ننذبـــح لجلك --- ونتكطع الف مـره
سرعشكك يبوالسجاد --- طلسـم الله الي يفسره
جـم حجاج مـل سيفه --- جم ايزيد مل صبره
ونجدد عهد كل يــوم --- الكم يا بني الزهــره
فرض مثل الصلاه حبكم --- دمنه يرخص الدمكم
لوداجه التريبه --- يدفع دم ضريبه
---
يا اروع مثل للنــاس --- كتبته بخاتمــت امــرك
لا هيهــــات للظـالــم --- دمــــك ردد ونحــــرك
خالد كل وكت مولاي --- باقي بكـل وكت ذكرك
نهجك تضيحه وثــوره --- خيعونـه المشـه بأمرك
ثارك والعهد موجــــــود --- للمهدي نصير اجنــــــود
ولهاي المصيبه --- يدفع دم ضريبه
*
فـرق بين اليهاب السيف --- وما بين الهد المنحر
انطينه اعله حبه اجفوف --- ورضينه بحبه نتوذر
طبـع بينــه المحبتكــم --- الشهاده جن شهد واكثر
اليموت بحب ابوالسجاد --- اله الفردوس تـتـنطــر
بعدنه بهل العهد باقيــن --- نصيح حسين لو ميتيـــن
من عشكه ولهيبه --- يدفع دم ضريبه

الشاعر الحسيني ظاهر حبيب الهليجي ( كعديه للامام السجاد ع)

يوم العاشر ميروح ياهل الناس من عيني
وانه باخر انفاس دمع العين يجويني
فوكي الرزية تحوم جرحي يظل ملجوم
*
زين العباد وسنيني ظلن بطف المأسي
محني ظهري وسيل دمعي والحزن بعروگي راسي
انه ما ينقاس همي وتتعب بحمله الرواسي
بعاشر محرم صور
خلن بخدي اثر
ومنهن كليبي انصهر
والهدب شاب ويراسي
اتجرع كاس الموت كل لحضات من عمري
نوحي وذيج العبرات ما تنزاح من صدري
حارمني لذ النوم جرحي يظل ملجوم
*

وموقف يگطع دليلي من شفت عمتي وخواتي
مگيدات اوديره غربه لحظه انهت كل حياتي
والاشد موتت رقيه الخلت الموت بلهاتي
عشت مأسات ومحن
جروحي آهات وشجن
لا احبابي ولا وطن
وادعي ساعته لمماتي
أيام اتنشف الريج طعم الموت راوتني
شبه الطير المذبوح ياهل الناس خلتني
بخدي الحزن مرسوم جرحي يظل ملجوم
*
اشما اغمض عيني يسرح فكري ويعيش المواجع
يشوف صورة طفل ضامي وصوره للأكبر يوادع
وصورة تكطع نيط كلبي بيرغ العباس واكع
الهل العلل ما ظن دوه
من مصايب نينوه
كلبي من همهن روه
هنه خلن هل المدامع
وعيني بدمعات ادموم عل الي صار ما تغفه
وجرح الطف يبقه وياي لا والله ما يشفه
اذكر ماسي الكوم جرحي يظل ملجوم
شفت برزخ يوم عاشر بذيج الأهوال الرهيبة
جم يتيمه كبالي تركض وجم محب ينعه حبيبه
وعل التراب اجساد تدمي موذره بغيض وسليبه
صوتي بالعبره اعتله
يا مصايب كربله
البيج عمتي مكبله
وأنه اصبرهه الغريبه
انه وعمتي الحسرات جاسمناهه بالغربه
مامرت كل انسان هاي اهوالنه الصعبه
وهذا الألم للدوم جرحي يظل ملجوم
*
جم عزيز بأيدي المه وكتم بكلبي الرزية
وبالحوافر عيني شافت لحم ابوي الضاع ضيه
وشفت اخوتي اولد عمي موذره بذيج المسيه
وحدي والموقف صعب
يادمع يطفى الكلب
انظر بعمتي الضرب
عل هزل راحت سبيه
وانه بحديد انكاد لرض الشام بالعبره
واكظي الدرب بل أه تلوه الاه والحسرة
وعل الخد تسيل ادموم جرحي يظل ملجوم

الشاعر الحسيني ظاهر حبيب الهليجي (للقاسم ع)

بزود اثنيها الزلم
وهزم الما ينهزم
تحزمت الها بعزم وانه جسام
*

انه شبل الحسن نسل الطاهرين
اهدي نفسي قربتا لجل الحسين
حسين عمي وارث الحق المبين
وهل وصيه منل حسن منذ سنين
اليوم آفرح مهجته
بدمي اوفي آوصيته
بصايت الله وصايته وآنه جسام
*
انه وعدي بكربلاء اهديله روح
عازم الها وصارمي بجفي يلوح
اليوم عـرسي اليوم للميدان اروح
جسمي اريده يكون مرتع للجروح
اليوم يوم الملحمه
والله اذلها الموزمه
بسيفي اجيب الغانمه وانه جسام
*
هاي نعمه من السمه ادمي النحر
وعل تراب امنيتي لو أصبح وذر
هذا يم جدي علي لييه الفخر
ورضي جدي المصطفى خير البشر
ما اهم الهل عدد
اي وحگ رب الصمد
دام من الله المدد وانه جسام
*
سيفي عطشان وطلب دم الرگاب
بآل اميه اسوي ثامنها العجاب
بقوة الله بسيفي اراويهم عذاب
وعد أسوي الگاع حمره أمنل خظاب

بقوة الله وهمتي
اليوم أعلي رايتي
هاي بلطف غايتي وآنه جسام
*
راح ارد بدر وحنين بهل القتال
اليوم اطشنها الجثث فوگ الرمال
ارد اراويها الحرب معنا الرجال
ومعنه عزمه الهاشمي عند النزال
ما تهمني النايبه
وانه ابن المجتبه
اسمي بلدم أكتبه انه جسام

الشاعر الحسيني ظاهر حبيب الهليجي (للامام العباس ع)

ردتك أوياي ماردت ماي
انه زينب ياخو زينب
مادريت بحالي علذي يجرالي
*

من عله التل يابو فاضل صوتي
والله كل اللحظه اضوگن موتي
النوح والهم خويه اصبح قوتي
يبن ابوي افزع الي بتابوتي
انظر احباب فوگ التراب
انه زينب ياخو زينب
الاجل يحلالي علذي يجرالي
*
مو هوى حسرات ترست رييتي
الف مره الموت شفته بغربتي
يشهد الله اليوم صعبه حالتي
يابو فاضل خويه من دم دمعتي
غربه حراس جمره الانفاس
انه زينب ياخو زينب
والحزن للتالي علذي يجرالي
*
بكل حرف يطلع دمع لمن حجيت
لون تسمع جلمتي بيك انتخيت
ها يخويه راتعه بحزني بقيت
والمواجع بـيهـن الليلـه ارتويت
واليتيمات نوح واهات
انه زينب ياخو زينب
دمعتي تبرالي علذي يجرالي
*
راح اسولف وادري يجرح هل الكلام
طگوا اسكينه بحقد ولد الحرام
أي يعباس وبعد حرگوا خيام
وانه عل تل وحدي ودنيه ظلام
والاميرات اي سبيات
انه زينب ياخو زينب
تغيرت احوالي علذي يجرالي
*
الموت أهون هسه لو بيي يحل
افزع الزينب يمن كونك عدل
ياوكت اختك يجتفوها بحبل
والاشد ياخويه امشي علهزل
وحر الإرمال وبيدي احبال
انه زينب ياخو زينب
عبرتي بدلالي علذي يجرالي

الشاعر الحسيني ظاهر حبيب الهليجي (للانصار رض)

صائدي والحظرمي
وزهير الخزعمي
وابنه قيس النهمي
صحبة حسين           صحبة حسين
*

أبتدي بهاي الاسامي بعابس وجون وبرير
وحنضله وابن مظاهر وبن عوسج وزهير
عشگ ابو اليمه بدماهم واعلنوا بلطف نفير
گالو بدمنه نضحي من أجل نهج البشير
العائذي والارحبي
وابن عمرو الراسبي
وكنانة التغلبي
صحبة حسين          صحبة حسين
*

عله تراب الغاضريه كتبوا بدمهم ولاء
من صميم العشگ رادو هل منيه بكربلاء
رادو يوثقون ذكره بلدمه معنه الوفاء
ذكره لليوفي بصحبته بأسمه ايات الوفاء
أبن عمرو النمري
وشبيب الجابري
جهني والشاكري
صحبة حسين          صحبة حسين
*

اسلم التركي بشخصه فعلآ احتار القلم
وأبن يقطر بلرجوله وابن سمعان الاشم
وابن عجلان وشبيب الكاتب بگلبه وشم
انه خادم مو صحابي للحسين اقسم قسم
جندبا والبجلي
وغفاري اوكاهلي
المازني والجملي
صحبة حسين           صحبة حسين
*

وهب نعلم بي مسيحي بكل فخر بلطف وكف
انه لحسين الفدائي وسط ميدانه هتف
راد ويه حسين موته ينول بلطف الشرف
طلگ الدنيه وتركها ومن نعيم العـز قطف
رفضهم للظالمين
ناصرو الحق المبين
في الجنان خالدين
صحبة حسين           صحبة حسين
*

وقصة الحر الرياحي يم امام المتقين
انه قائد يا امامي وجندي يمك يا حسين
تنقبل هل توبه ليه يم اله العالمين
ومن بعدها موتي كبلك يبن سيد المرسلين
سيدي يبن الحجج
بين كفيك المهج
نفتديكم بل ودج
صحبة حسين           صحبة حسين

الشاعر الحسيني ظاهر حبيب الهليجي (للهلال)

صرت يهلال جتالي صرت يهلال
دمع همال للتالي دمع همال
أويرد الماضي گدامي
جحيم اخيامي وايتامي
*

انه زينب يهلال أمنشوف اتهل
تهيج الروح والدمعات دم اهمل
اليه ذكريات بعاشرك تكتل
لو مرن عليه الموت بي ايحل
عذاب لروح من تطلع عذاب الروح
تهيج اجروح واتلوع تهيج اجروح
اشوفك واذكر آلامي
جحيم اخيامي وايتامي
*

ترد بخاطري ذكره وتأذيني
ذكره امنل عده بحرگت صواويني وعويل أيتام من تطلع تراويني
وانه وحيده بوكتها ودمعتي بعيني
عليي ظلام منجمعه عليي ظلام
وحرم وايتام منفجعه حرم وايتام
واشوف موذره ازلامي
وجحيم اخيامي وايتامي
*

من تهل ترد جم صوره بضنوني
يرد بيه الزمان أو تهمل اعيوني
يهلال الاثر لي هسه بمتوني
وصدى الشمات اسمعهم يشتموني
بدليلي النار لهابه بدليلي النار
عله الي صار بحبابه عله الي صار
جم ضامي ونحر دامي
جحيم اخيامي وايتامي
*

مصيبه ابالي منها گليبي يتفطر
لخوي حسين شفته إعله ثره موذر
وشفت ألي يذبحه ويگطع المنحر
وشفت شيبة لحيته البيضه لون احمر
اشوف اشفاه متفطـره اشوف اشفاه
واشوف اعضاه متطشره اشوف اعضاه
دامي ومنذبح ضامي
جحيم اخيامي ويتامي
*

لهسه انه انتضر يهلال اخوي يعود
وتخيل يجي الاخته ويرد اردود
منصوب لشريعه وبيده شايل جود
حلم هذا اعيشه ويشهد المعبود
حلم عباس اشوفنه حلم عباس
واطش الياس اتمنه وطش الياس
واسولف ضيم ايامي
جحيم اخيامي وايتامي