★•• نخوة لمولاتنا أم البنين "ع" ••★
#وزن_الهجريننخاچ ياأم البنين .... بحماچ ياأم البنين
-------------------------------
أنتي باب الله بابچ والوفه عندچ درس
ماكو مقياس لوفائچ عالي واعله من الشمس
يالوفيه ولو اذكرچ احچي وي روحي همس
يا مره وصلت مكانچ جنچ الزهره أحس
انطاچ ياأم البنين .... بحماچ ياأم البنين
❁•━━❁━━❁━━❁━━•❁
مضرب أمثال نعرفتي الكون لجلچ يفتخر
حتماً لساني يتوضئ لون اسمچ ينذكر
والله يامولاتي خيرچ تارس الدنيا شكثر
من قريت الحَمدُ انه بيچ مولاتي ابتشر
عَلّاچ ياأم البنين .... بحماچ يااأم البنين
❁•━━❁━━❁━━❁━━•❁
عن يقين وعن درايه اختاروا لحيدر نسب
وفاطمه اسمچ تمَّيز وانتي ردتي هل لقب
ياهي مثلچ خلفتهم وجابت اسباع العرب
سند لحسين انتي جبتي اربعه وچنهم شعب
حياچ ياأم البنين .... بحماج ياأم البنين
❁•━━❁━━❁━━❁━━•❁
شما يضيگ الوكت بينه الچ بس نقرا الحمد
بكلشي يتسهل امرنه نريد تگضي هالشدد
نحَلفچ بحسين احنه ومنج نريد المدد
انتي مفتاح الجنان وخصچ الباري الصمد
نرجاچ ياأم البنين .... بحماچ ياأم البنين
❁•━━❁━━❁━━❁━━•❁
انطاچ الله هالكرامة يالخدمتي الطاهرين
وكلها تلجأ على بابچ واليجي مترجعين
حاجته تگضيها وبساع لو رفعلچ هالأدين
يالوفية وانتي حلها لكل شددنة تحضرين
جيناچ ياأم البنين .... بحماچ ياأم البنين
❁•━━❁━━❁━━❁━━•❁
تمت بأقلام خدام أهل البيت
✍🏻#باقر_جبار_الشويلي✍🏻#ولائـية_وافتـخر (دعاء العامري)
للتواصل والاستفسارللقصائد
@MolatyzeenabBBB1_bothttps://t.center/lAfiteamoun