The First 20 hours by Josh Kaufman في الكتاب ده الكاتب بيقول أننا نقدر نتقن أي مهارة جديدة في أول 20 ساعة من بداية ممارستها، بس طبعاً فيه بعض الشروط زي: ال20 ساعة دول بيتم حسابهم للممارسة فقط، يعنى لو قرأت إزاي تمارس المهارة أو معلومات٦ عامة مرتبطة بالمهارة فالوقت اللي اخدته في القراءة ميتحسبش من وقت الممارسة. لازم تحدد الهدف اللي انت عايز توصل له في المهارة دي واللي هو بالطبع مش هيكون الاحتراف في خلال العشرين ساعة لكن الهدف في الأول يُفضل يكون بسيط، يعنى لو هتتعلم لغة جديدة مثلاً فممكن يكون هدفك تتواصل لمدة خمس دقائق مع واحد من أصحاب اللغة بعد 20 ساعة ممارسة لكن صعب أن الهدف يبقى تتكلم زيك زي أصحاب اللغة بالضبط. لو حسيت بصعوبة في تعلم المهارة ماتستسلمش قبل مرور 20 ساعة من الممارسة لأن طبيعى أنك في الأول هتحس بصعوبة في التعلم، ممكن بعد كده لو لقيت نفسك برضه مش حابب الموضوع أو مستصعبه متكملش. مهم أنك تحسب بالضبط الوقت اللي بتستخدمه في المهارة لأن المخ ممكن يصور لك أنك ضيعت وقت طويل في الممارسة بينما في الحقيقة انت استهلكت وقت قليل فلو استخدمت "ستوب ووتش" مثلاً هتعرف تحسب الوقت بالضبط لحد ما تكمل ال20 ساعة. الأفضل الممارسة في اليوم متزدش عن 90 دقيقة، فلو حسبتها هتلاقي أن ال20 ساعة هيخلصوا في حوالي أسبوعين بس. طبعاً لازم تكون شغوف أوي بالمهارة دي وحابب أنك تتعلمها علشان تقدر تكمل. الكاتب اتكلم في أول 3 فصول عن إزاي هو بيحب التعلم ومهتم بتعلم حاجات كتير لكن بسبب مسئولياته العائلية وضيق وقته كان بيجد صعوبة في الموضوع ده لكن عن طريق الاستراتيجيات اللي هو بيتكلم عنها في الكتاب قدر أنه يتعلم 6 مهارات مختلفة، كل مهارة فيهم اتعلمها في 20 ساعة. بعد كده اتكلم عن ال10 مبادىء لاكتساب أي مهارة في وقت سريع وهم الشغف، التركيز،تحديد الأهداف، التفكيك، الأدوات المستخدمة، التعامل مع المعوقات، ادارة الوقت، دراسة ردود الأفعال، تحديد الفترات الزمنية للتطبيق و الكمية مع السرعة. الكاتب برضه اهتم بأنه يتكلم عن تعلم المهارة في الأول قبل ممارستها لكن التعلم بطريقة سريعة ووضح برضه 10 مبادىء للتعلم السريع وهم البحث، الفحص السريع والتخطي، عمل نموذج عقلي، التفكير بالعكس، الاستعانة بالخبراء، التخلص من المشتتات، تطوير التعامل مع الذاكرة، تحديد قوائم، إجراء التجارب و الاهتمام بالصحة الجسدية. بعد كده الكاتب وضح ست مهارات اتعلمهم فعلا باستخدام الاستراتيجيات دي وهم ، اليوجا، البرمجة، لعبة “GO” وهي لعبة شبيهة شوية بالشطرنج، الكتابة على الكيبورد بطريقة سريعة، العزف على القيثارة واستخدام الطائرة الشراعية.