قصيده گعديه.. لمناسبة استشهاد الامام موسى ابن جعفر عليه السلام عمر الظالم مايتهنه وانطيك البرهان كل ظالم متمادي برايه مايفلح گالتها الأيه وانطيك البرهان --------------------------------------- حبل كل ظالم گصير بحكم دستور الجلاله هيچ ربك راد عدله ونفذت چف العداله وهيچ مايظلم عباده يحاسب الجاني بفعاله اوجد لكل ظالم خصم مايرضه بافعال الظلم ولايخضع الأهل الحكم لون حكموا بالجهاله ربك مايترك كل ظالم حاشاه النسيان يمد الطاغي ومايستعجل ربك يمهل لا مايهمل وانطيك البرهان ----------------------------------------- وين فرعون وجنوده وين عاد الي تجبر وين هارون وزمرته گلي بالله اذا تگدر اترك التاريخ يكذب تدري تاريخك مزور بس انظر الصوب الجسر وتمعن وشغل الفكر عاين السيل المنحدر گاصد الموسى ابن جعفر لا موناس التسعي الگبره يسعيله الوجدان صدگ لوعينك مكشوفه تشوف ارواح الناس اطوفه وانطيك البرهان -------------------------------------- صح غريب وگضه عمره بالسجن والگيد بيده لكن بايمانه هدم هالعروش الارشيده وحرر عقول البرايه وفك الاغلال العتيده بصوت السلاسل كل وكت تتكسر اطواق الصمت وتنادي يامنصور امت وحيي بالناس العقيده من عزمه وايمانه وصبره شيد هالبنيان من توصل اوكف بالحضره وتذكر هارون وگبره ونطيك البرهان ----------------------------------------- حفرة المسجون صارت صرح يزخر بالمناقب وقصر هارون المزخرف ضاع مابين الخرايب هذا حال الظلم هذا لاتعده من العجايب موعجبه دهرك يبتسم والظالم يضل بس اسم من الطاغي ربك ينتقم بالعدل الله يحاسب الكاظم يصبح باب الحاجه ومذلول السجان منصف عادل رب القدره يهدم قصر ويرفع حفره وانطيك البرهان ----------------------------------------- شوف افهم زين واعقل وخذ من الزمن درسك وكبل لا يوصل حسابك اوزن بميزان نفسك دير بالك ياموالي تتبع الفاسد يبخسك لاتركن الظالم ابد مهما جمع ناس وعدد ميفيدك بيوم الوعد بس علي حيدر يحرسك حيدر ميزان الله وعدله ومقياس الايمان اترك كل سارق لتعاند صدك ميفيدك كل فاسد وانطيك البرهان جواد كاظم الگرعاوي