يا قلب قداش صبار ••• و قداش حامل هوايل و قداش مكوي بنار ••• و قداش كامي علايل و قداش ضايق مرار ••• وأيامك زينة قلايل و قداش دافن أسرار ••• و قاصر ما نكش طايل و قداش حامل أقهار ••• ولا والي عليك سايل طلبته اللي سماه قهار ••• ما نعيش عيشة قهاير
اللي ما ايحس بداك ماتحكيله .. مرات عند الناس يحكي بيك واللي عديم احساس ما تشكيله .. في طيحتك تلقاه شامت فيك واللي قليل الاصل ما تمشيله .. محال ما ينشد نهار عليك واللي امقصر من اسنين طويله .. في الضيق ماتعبى عليه ايجيك واللي كلامه كذب ما تصغيله .. اوقات عازتك لوتقصده يرخيك اللي ما ايحس بداك ماتحكيله .. مرات عند الناس يحكي بيك
