#Study_Skills >> أَوقدِ نارَ حماستك 💪🏼 #Motivation السلام عليكم أصدقائي 👋🏻 إذا نظرنا للناس الناجحين والملهمين بالعالم وبالمقابل الناس الفاشلين والمحبطين، يا ترا شو الفرق بيناتن ؟ تأكدوا انه الفرق ما هو بالذكاء ولا بالقدرات الموروثة، الحقيقة الفرق بيناتن هو الحافز والرغبة الداخلية بالنجاح .. الشخص الناجح ويلي محقق إنجازات مهمة بحياته بنلاقيه دائم المحاولة انه يحفز نفسه للأفضل ويستمر بالسير على درب أهدافه .. بيرفض يترك سفينته للحياة تحركه متل ما بدها وشعاره دوماً (احرصْ على ما ينفعُك واستعنْ بالله ولا تعجز) ✊🏻 بينما الشخص الفاشل بتنعدم دوافعه ودفاعاته الداخلية، فبصير متل السفينة بدون محرك بوسط البحر، بتحركها الأمواج متل ما بدها بدون مقاومة ! أكيد ما حدا فينا بيتمنى يكون الشخص الكسول يلي بعاني دوماً من مشاعر الندم والذنب لأنه عنده مهام متراكمة عليه إنجازها وهو تاركها وسارد عالفيس بوك .. من هي المقدمة كلها بتجي أهمية #الحافز_الذاتي يلي هو موضوعنا لليوم ~ ليش الدافع مهم هالقد ؟ مهم لأنه أي فعل بحياتنا بيتبع هي السلسلة: دافع >> فعل >> نتيجة بالتالي عند انعدام الدافع ينعدم الفعل، لهيك الدافع هو شي كتير ضروري وما بقدر انتظر الآخرين ليعطوني ياه >> هالشي بوضح لنا أهمية الدافع *الذاتي* بشكل خاص القدرة على تحفيز الذات هي مهارة بتمكنك من التحكم بكتير جوانب بحياتك، لأنه الاستسلام للكسل والمماطلة ممكن يجعل حياتك هباءً منثوراً .. - لحتى نشعل الحافز الذاتي رح نتبع 3 خطوات: 1- ركز على قيمة الفعل: لما تكون قيمة الفعل واضحة بالنسبة الك بكون الحافز قوي.. فمثلاً انت لما تجوع ما رح تماطل وتأجل الأكل، لانه أهمية "فعل الأكل" واضحة جداً بهاللحظة .. على نفس النمط، أي مهمة عم تأجل إنجازها ارجع خطوة للوراء وفكر بقيمتها أكتر .. وهي فرصة لنغير نظرتنا عن طلب العلم يلي اتحول لبصم مناهج وتقديم امتحانات .. 📖 طلب العلم غاية سامية جداً لأنه فيها تحيا الأمم ويحيا البشر .. متل ما الأمة بحاجة لمين يدافع عنها ويموت كرمالها؛ هيي بحاجة أكتر لمين يعيش في سبيلها ويهديها العلم النافع .. رب العالمين غرس فينا حب العلم بدليل إذا حدا نعتك بالجاهل رح تغضب !! بينما اذا مدحك بالعلم (حتى لو كذب ومجاملة) رح تنسرّ ^^ دليل على أنه الإنسان مفطور على حب العلم .. رح اتركك تفكر بباقي قيم العلم بعد ما قلك هالبيت: إن الأكابرَ يحكمون على الورى ~ وعلى الأكابرِ يحكمُ العلماءُ 2- اجعل هدفك ذا صلة بالواقع: الإنسان خُلِق من عجل .. بده نتائج فورية .. هدا واحد من الأسباب يلي تخلينا نأجل الدراسة ونتحجج بأنه الامتحان مطول .. وبصراحة هي حقيقة وموجودة عند الكل .. الحل انه نربط الهدف البعيد بشي من الحاضر .. خلونا نجرب .. دراستك لمادة ما رح تخليك تقدم منيح بالامتحان وبالتالي ترفع معدلك .. كتير حلو .. لكن شو فائدة هالشي بغير أوقات الامتحان !! فائدته انه تعلم شي جديد بغير الوصلات العصبية بالدماغ وبالتالي بيرفع كفاءة دماغك .. التعلم بحد ذاته بلبي حاجة دفينة بالإنسان هي حاجة الإدراك والمعرفة يلي بفضلها رب العالمين كرمنا على سائر مخلوقاته .. إضافة إلى أنه العلم بقربنا من رب العالمين وبيكشف لنا أسرار الخلق .. فمثلاً مادة الفيزيولوجيا بتعرفك على آلية عمل أجهزة الجسم .. كيف بيتحول التنبيه لإشارة يفهمها الدماغ وكيف بصير نقل الدم والتنفس وكيف بتشتغل الكلية وغيره .. شي ممتع الصراحة 🤩 3- غير تسمية الهدف: نظرتك للهدف بحد ذاتها بتفرق .. خلي تسمية هدفك دائماً فريش وممتعة ومحفزة بالنسبة الك لتقوم بواجبك .. >> هي الخطوات التلاتة يلي ذكرها الأستاذ Simon Lee تحت عنوان Activate your motivation .. وهي الخطوات بتفيدنا وقت نعاني من عدم الرغبة بالقيام بمَهمّاتنا .. فإذا طبقت هي الخطوات رح تشعر بالحماس من جديد 🔥 لكن .. الموضوع مو كبسة زر وهو بحاجة للممارسة بشكل مستمر لحتى يؤتي ثماره ويصير تلقائي 😉 طيب بعد ما صار الحافز أقوى من الممانعة شو لازم اعمل ؟؟ لتخلي شعلة الحافز تشعل عنجد وتتحول لنار تحرق المماطلة والسلبية؛ لازم تتبع هدا الحافز بخطوة عملية .. خطوة تثبت صدق عزيمتك وإرادتك "فإذا فرغتَ فانصبْ"👌🏻 الحقيقة انه تشجيع نفسك لأخذ هي الخطوات الصغيرة كتير مهم .. لانه بس تحقق نجاح صغير بفهم فقرة أو فصل ما؛ رح تزيد ثقتك بنفسك .. زيادة الثقة رح يعقبها عمل بجدّ أكتر، ووقت تلاقي حالك وصلت لمستوى جيد وفهمان كل التفاصيل فهدا بحد ذاته دافع لتكمّل .. الناس دائماً عندها الرغبة بالقيام فيما تُحسِن خلي ببالك انه التحول من أقصى اليسار لأقصى اليمين فوراً شي مستحيل .. وكذلك التحول من الكسل إلى النشاط والهمة العالية .. لذلك نحنا بحاجة للمثابرة وإتباع الخَطوة الخَطوة لتحصيل نتائج مرضية بإذن الله إشراقة تتمنى لكم همماً عليّة تليق بكم وبأهدافكم 🙏🏻✨ #إشراقة ~ #Activate_Your_Motivation 🌟