قاعدة بردانة بهالليل، وملّيت من الدراسة "(( قمت بحبشت بهالخزانة ولاقيت أخيراً ظرف هوت شوكلت يدفّيني بهالبردات 🥶 والله ما كذبت خبر، ساويته وسرقت بسكوتة من أختي وبعد هالكوب الساخن اللذيذ صار مزاجي عال العال 😌✌🏻 •• كم نِعمة توجد في هذا السيناريو (المُخترع:") ؟؟ ١- نعمة انه الإنسان الطبيعي بيقدر ياكل ويشرب شو ما بده (ضمن الحدود الطبيعية طبعاً) بدون ما يفكر انه هي فيها سكر زيادة أو ملح زيادة أو أو .. وبيقدر يشرب سوائل بدون ما يفكر شو حيصير بهي السوائل داخل جسمه.. وهي نعمة محروم منها مريض الداء الكلوي المزمن، يعني يلي بيعملوا غسيل كلية.. مريض الداء الكلوي المزمن محطوط على حمية فما بيقدر ياكل يلي بده ياه أبداً، ولما يشرب سوائل بيتذكر انه ما عنده كلية تتخلص من فائض السوائل وغالبا بالمراحل الأخيرة بعاني من فرط حمل سوائل، ف بصير يحسب حساب كاسة المي إذا بده يشربها ! ٢- نعمة الشهيّة ! نعمة كتير كبيرة انك تجوع، وانك تشتهي شي أكلة.. ياما وياما ناس معها مصاري كتيير بس ما عندها أي شهية تجاه الطعام وفاقدة لشعور اللذة يلي برافق الأكل بشكل طبيعي.. وهي كمان من أعراض الداء الكلوي المزمن.. هدا المريض عنده فقدان شهية شديد ٣- بعد ما شربت المشروب اللذيذ تحسّن مزاجي، و المزاج المعتدل كمان نعمة كبيرة.. لانه مريضنا هاد نفسه بعاني من اضطرابات نفسية ممكن توصل فيه للانتحار.. وبصير بده علاج ودعم نفسي مو بس هو، وإنما هو وكل عيلته.. هاد جزء كتير كتييير بسيط من المتاعب الناتجة عن قصور عضو واحد بجسمنا.. جسمنا يلي فيه آلاف آلاف الخلايا والمركبات والإنزيمات يلي شغالة عال٢٤ ومالنا حاسّين فيها، بالعكس مفكرين انه هاد الطبيعي.. اعملك نزلة عالمشفى (بتمعُّن وتفكُّر) لتكتشف انه مو هاد الطبيعي، بدليل ملايين الناس المرضى ! بس انت ربّ العالمين راد لك انه ما يكون ابتلاءك بصحتك.. قولوا الحمد لله يا جماعة، إذا بتقدروا تحمدوا الله مع كلّ نفس لا تقصروا.. الحمدُ لله الحمدُ لله 🤲🏻 #نفحات_طبية 🩺❤️‍🩹