#Study_Skills 📚🎓 >> NOT to Forget Again 😌 السلام عليكم ورحمة الله 👋🏻 #التعلم فعل مركب بيعتمد على فهمنا للمفاهيم ومن ثمَّ #حفظها .. لأنه مو معقول بعملك المستقبلي كل ما بدك شغلة تفتح المرجع، لازم تكون انت المرجع 😎 هدا سبب اهتمامنا المباشر بموضوع #الذاكرة الذاكرة شي بيشبه المستودع .. حفظك للمعلومة هو إدخالك لشيء ما إلى المستودع .. بس شو فائدة غرض محفوظ بالمستودع وما عم تقدر بوقت حاجتك اله تطالعه وتستفاد منه ؟؟ المعنى شو الفائدة من معلومة محفوظة جوات مخك بس ما عم تقدر تسترجعها ؟!! من هون كانت قوة الذاكرة مو بس بتعتمد على إدخال المعلومات وإنما على القدرة في استرجاعها أيضاً 🤔 الخطأ يلي بيرتكبه معظم الطلاب هو الاهتمام الزائد بالحفظ المجرد على حساب الاستذكار أو الاسترجاع Retrieval عند حاجتك لمعلومة محفوظة عندك، فأمر استذكارها أكبر من كبسة زر أو عمل research عالكمبيوتر !! المعلومة بتكون محفوظة بأكتر من جزء داخل المخ، هالأجزاء بيجمعهن مع بعض الحُصين وبعدين بينقلن لمجال وعيك .. فالأمر معقد نوعا ما .. وإذا ما كنت مدرب عقلك من قبل على استرجاع المعلومة ممكن تستصعب هالشي بالامتحان .. إذن >> لازم تدرب عقلك وتفكيرك على جمع شتات المعلومة واسترجاعها بمرونة 🌱 كيف بتم هالشي ؟؟ بتم من وقت دراستك أول مرة، غلط تعتمد عالنظر والقراءة لوحدن، لازم تسكر الكتاب وتشوف مقدار المعلومات يلي لزقت بمخك واديش عم تقدر تستحضر منها .. سواءً بالكتابة أو الكلام ثانياً خصص يوم من الأسبوع لتراجع كل شي درسته خلال الأسبوع عن طريق أداء الاختبار يعني بدل ما تفتح الفصل وتراجعه؛ حاول لوحدك تسترجع المعلومات على ورقة أو تحل أتمتة .. ممكن تطلب من حدا يفتح الكتاب ويسألك 3 أسئلة لا على التعيين .. ثالثاً وقت تكون بدك تراجع مادة دارسها من زمان لا تعتمد عالنظر للاستذكار .. حاول تعمل عصف ذهني أو تحل أسئلة عليها لتستذكر منها قدر الإمكان قبل ما تقراها مرة تانية ° بهالطريقة بتكون: 1- مكّنت المعلومات بذاكرتك لمدّة أطول 2- حددت نقاط ضعفك بدقة 3- مريت بتجربة الامتحان وهالشي فعّال بتخفيف التوتر بالامتحان الفعلي بالمناسبة 💡 الغايات الحميدة توجد في خبايا الأسباب المكروهة الشاقة .. وبقدر ما تتعنّى تنال ما تتمنّى .. بالوقت يلي المعظم فيه بملّ وبيتعب وبيرخي؛ خليك انت *المثابر* على الدراسة الصابر عليها، لأنه ربنا جل وعلا قال لأهل الجنة: { سلامٌ عليكم بما صبرتم 👌🏻 فنعمَ عُقبى الدار} بالتوفيق جميعاً 🙏🏻 ..🍃 #إشراقة ✨