من ٦ سنين، وقت كنت بالثانوية، كان فيه إنسانة بتعنيلي كتير فقلتلها عطيني نصيحة اتذكرها كلما تذكرتك .. قالتلي: لا تنظري إلى ما في أيدي الناس، ركزي عاللي بإيدك بتحققي نجاح وبتحرقي مراحل 🔥 من وقتها لهلأ كل ما مريت بمرحلة من اليأس وضعف الإنجاز بلاقي الحل بهالنصيحة ! يمكن يخطرلك انها عم تنصحني ما اتطلّع على "النعم" يلي بإيد الناس على نمط {ولا تمدنّ عينيك إلى ما متعنا به أزواجا منهم زهرة الحياة الدنيا لنفتنهم فيه ..} صحيح، لكن القصد أوسع من هيك .. القصة مو قصة مادّة أو مصاري، القصة قصة اختيار ! انت شو اخترت الك هدف بهالحياة؟ شو دربك؟ ليش عايش؟ ركّز عالدرب يلي اخترته والتزم فيه .. 🗞 التشتُّت من المعوِّقات شديدة التأثير على حياة الإنسان .. كلنا جرّبنا نقعد ندرس والموبايل بإيدنا، أو ندرس وبالنا مشغول بشي تاني .. طيب كيف لو حدا مقضي حياته كلها هيك؟ حياته كلها قائمة على "لو" و "يا ريت" !! وقتها التمن ما رح يكون ساعتين دراسة أو رسوب بمادة، رح يكون عمر بحاله .. بس يصير بال٥٠ رح يتطلع لورا ويلاقي انه ما حقق نجاح ولا على صعيد .. لا كان من الشاطرين، ولا من الفاقسين، ولا من الملتزمين، عمره كان عبارة عن خليط من هدول كلهن، يوم مزح ويوم جد، يوم بهدا المجال ويوم بهداك، وهكذا !! كابوس صح؟ لهيك حدّد دربك من هلأ، ما في مانع تبحث وتتقصّى وتجرّب بس بالآخير لازم تقرّر انت شو؟ لما رب العالمين يوقفك يوم القيامة ويسألك عن عمرك وعن شبابه شو رح تجاوبه؟ يا رب عشت وانا عم ربّي متابعين على انستاغرام، يا رب عشت وانا عم حاول جمع مصاري مشان سافر، يا رب عشت وأنا عم اجتهد ساعد الناس، يا رب عشت وأنا متمسك بمبادئي وديني؟؟ قرّر 🗞 تحمُّل المسؤولية .. بعد ما اخترت طريقك عن قناعة لازم تتحمّل مسؤوليته وتكون عنيف جدّا بالدفاع عنه .. °° مثال: شخص اختار يُفني عمره وصحته في طلب العلم، لازم يتحمّل توابع هالقرار لانه رح يتطلب سهر وجهد وتخلّي عن كتييير من متع الحياة الُّدنيا .. ما بينفع يندم ويتحسّر ويقتل بحاله لما يلاقي ميسّي قبض ٥٠٠ مليون دولار، أو لمّا يشوف بنت ال١٦ سنة عالتيكتوك اشترت رانج روفر موديل ال٢٠٥٠ ")) إذا بدك تقضيها حسرة وبكي ببساطة لفّ واختار هداك الطريق ! ما حدا جابرك على شي .. °° مثال ٢ : شخص قرّر انه هو ما بده يتعلم، بده يشتغل ويجمّع مصاري كتير ويعيش برفاهية .. ما رح ينفع يتحسّر وقت يشوف رفيقه صار عالِم كبير ومُحاضِر ووو .. انت اخترت طريق العمل فاستمرّ فيه. 🗞 امضِ ولا تلتفت .. علّمونا بالفقه انه تعليق النية يُبطل العمل .. حتى بالنية رب العالمين ما بده ياك تكون متردّد ! بده تكون حازم، وحاسم، وتأخذ الكتاب بقوّة 💪🏻 🗞 السوشال ميديا عظّمت هالمشكلة بشكل غير مسبوق .. بتفوت دقيقتين بتطلع بمليون مُدخَل مختلف .. بتشوف يلي عم يدرس بتصير بدك تدرس، بتشوف يلي معه مصاري بتصير بدك تشتغل، بتشوف رفيقك فايت غير فرع بتندم على فرعك وهيييك لحتى يفرجها الله .. لا تنسَ انه كل واحد من هدول دافع التمن غالي ! يلي اشتغل ضحّى بالعلم، ويلي تعلّم يمكن مر عليه أيام بلا أكل، ويلي هاجر نفد من بين آلاف غرقت !! انت ما فيك تكون كل هدول سوا يا صديقي، يستحيل .. 📃 الحل الوحيد .. انك تحدّد شو بدك ✅ مع أي زمرة حابب تُحشَر يوم القيامة؟ وحط ببالك انه أي طريق رح تختاره قد ما كان من برا مورّد؛ اله أثمان لازم تندفع !  بعد ما تحسم قرارك أغلق كل الأبواب يلي بتجبلك أخبار المجالات التانية لحدّ ما يقوى عودك وتصير قادر تواجه وتدافع عن خَيارك. #إشراقة || @Ishraaqaa