#Study_Skills 🤹🏻‍♀️📚 هل تعلم أخي الطالب انك لما تحاول تحل مشكلة #الملل أثناء الدراسة عن طريق تصفح السوشال ميديا؛ فأنت بهالطريقة عم تضاعف المشكلة ؟!! 🤔 السلام عليكم ورحمة الله وبركاته 👋🏻 #الملل مشكلة شائعة بين الطلاب في أثناء الدراسة، والملل هو شي طبيعي جداً وبيعني فقدان المتعة أثناء أداء عمل ما .. الشائع أكتر بعد انتشار الهواتف الذكية ووسائل التواصل هو انه هالملل زاد و صرنا كل ما نمل تروح ايدينا تلقائياً للجوال >> فيس، انستا، سناب شات وغيره !! فالسؤال الذي يطرح نفسه، هل هالوسائل هيي فعلاً علاج للملل ؟! الجواب قطعاً لاء .. مو بس مالها حل، بل بتفاقم المشكلة أضعاف مضاعفة وبتخليك تمل بزيادة على المدى البعيد من زمان (قبل الميديا) كان تركيز الفرد ممكن يمتد لساعات .. الآن متوسط التركيز دقائق معدودة !! السبب انه أي أداة بتدخل على حياة الإنسان بتعمل تغيير على آلية عمل المخ وبالتالي اللايف ستايل تبعه .. فمثلاً، العرب قبل انتشار الكتابة كانت ذاكرتهم حرفياً متل الحديد، لدرجة يقال عن شاعر (حاولت اتذكر اسمه ما قدرت 🌝) أنه كان يحفظ ١١ ألف بيت شعر على كل حرف روي من حروف العربية !! لأن المخ كان شايف انه الحفظ هو الطريقة الوحيدة للاحتفاظ بالمعلومات يلي بتهمه وبتساعده عالبقاء بأمان .. لكن مع انتشار الكتابة لوحظ انخفاض جودة الذاكرة لأنه الاعتماد عليها قل وتحول للتدوين ✍🏼 فهدا مثال عن تأثير أي أداة بتستخدمها عالآلية يلي بيشتغل فيها المخ .. > بنرجع لموضوعنا 🏃🏻‍♀️ الإنترنت بشكل ^عاام^ بساعد المخ على التشتت .. فأنت لما تفتح أي مادة عالإنترنت بتلاقي الإعلانات من كل حدب وصوب، والرموز يلي بتكون بالأعلى، والنوافذ المنبثقة يلي بتطلع بخلقتك .. هالشي من طبيعة الإنترنت يلي بيتعمد على الروابط التشعبية .. وإذا فاتح فيس مثلاً كل شوي لازم يجيك إشعار اله لايت معين وصوت معين .. كللل هدول الشغلات عم يخاطبوا عقلك اللاواعي انك اذا كبست على هدا الرمز أو الإعلان أيا يكن؛ رح تطلعلك معلومة جديدة ظريفة .. والمخ يعشق ال Novelety يعني التجديد ~ طيب وين المشكلة ؟!! المشكلة انه على المدى البعيد المخ رح يتغير فعلياً وبيولوجياً بحيث يصير بده معلومة جديدة كل بضعة ثواني أو دقائق بأفضل الأحوال .. بصير هيك نمطه .. سواءً كنت فاتح انترنت أو حتى عم تقرا قرآن !! تشبيهاً صار العقل كإنسان عم يمشي على بحيرة لكن ما عم يغوص للأعماق وإنما عم يبقى عالسطح .. ويؤسفني قلك أنه السطح هاد لا يسمن ولا يغني من جوع. يعني مو شي حلو ؟!! 🙄 والله حلو التجديد .. لااا مو حلو .. لأنه ما في شي بهالدنيا بيمشي بهالطريقة يا أخي .. هي الثمار السريعة مستحيلة التحقق على أرض الواقع ومن طبيعة الإنسان أساساً أنه خُلق من عجل، فأنت عم تتآمر مع الإنترنت على نفسك ومستقبلك .. ممكن تنشر بوست عالفيس بوك ويجيك مئات الإعجابات خلال ساعات قليلة .. لكن إذا بدك تعمل شركة على أرض الواقع بدك تستنى ايام وشهور ويمكن سنوات لتحقق أرباح !! إذا بدك تتعلم علم بدك تصبر وتصابر وترابط لتفهم تفاصيله وإشكالاته وتصير بارع ومتمكن منه .. العالم لا يقوم على هذا العلم السطحي التافه في كثير من الأحيان .. عودة مرة أخرى 🙂 ف يلي عم يصير .. بتكون قاعد بأمان الله عم تدرس وإذ فجأة بتفقد المتعة وبتشعر بالملل .. بظنك انه أسهل طريقة لطرد هذا الملل هو السوشال ميديا .. بتفتح السوشال ميديا وبتكون بهالطريقة عم تعزز التشتت بمخك وتقلل قدرته على التركيز من دون ما تحس .. بالإضافة للعدد الهائل من المُدخَلات يلي بتمدك فيه الميديا خلال دقائق معدودة .. برأيك وبعد ما قلتلك كل الحقائق العلمية من شوي، انت بهالطريقة دحضت الملل ولا ضاعفته وضاعفت آثاره السلبية ؟؟ أكيد ما رح خليكن بلا حل 💡 بدايةً بدي منك تتقبل الملل .. الملل موجود بمرحلة ما من أي عمل مهما كان مُحبّب بالنسبة الك .. بأي مشروع بدك تقوم فيه مستقبلاً أو اي مهارة بدك تتعلمها رح يكون فيهن جزء ممل .. فتقبل الملل برحابة صدر ثانياً .. شيل من بالك فكرة طرد الملل عن طريق الموبايل .. وأساسا كيف بتسمح بوجود الموبايل قريب منك وانت عم تدرس ؟!! 🤨 استبدله بأي شي تاني .. لما تمل قوم وقف عالشباك وتأمل بالسما .. قوم توضى لتصحصح .. اعمل اي نشاط بدني خفيف لتتنشط .. المهممم من فضلك انس فكرة معالجة الملل عن طريق الهاتف 📵 ثالثاً العلاج الجوهري للملل هو الدافع القوي والهدف الواضح .. كل يوم راجع أهدافك .. انت اساسا ليش عم تدرس ؟!! لشو هالعذاب ؟!! طالما دافعيتك مو قوية رح تلاقي صعوبة بتعلم حتى أسهل وأبسط المفاهيم بأي علم ولو أنه البوست طويل بس بتمنى يكون حقق الفائدة المرجوّة منه 🙏🏻 بالتوفيق لكل طالب عم يصبر على مرارة طلب العلم ✨✨ #إشراقة ✨