قصيدة محاورة بين مولاتي زينب عليها السلام و مولاي ابن الحسن الامام المهدي (عجل الله فرجه): يا عمه يمهدي الغربة اذتني وجارحني السبي والشام تعبني ———————————— عمه مهدي گلي منين ابديلك ومن ياهي يعمه انا اشكيلك كل اليوجعني يهدمّن حيلك ومالك حيل يبني يابعد متني ———————————— ياعمه يزينب آه يا عمه عشتي بالحزن والآه والغمه عن حسين انشدج غارگ بدمه وحزني ما يفض وآهاتي و وني ———————————— شسولف عن اخوي الغربته غربه وكلنه مثله عشنه ومتنه ابدربه لو عن ابو فاضل صاحب الجربه لو باقي المصايب كلها جرحتني ———————————— اخذ روحي يعمه العاشر ويومه وفرهدني وكسرني وعشت ملچومه المن باقيه بلا حسين وارسومه عشت بس بجسد والدنيا كسرتني ———————————— شگلك عمه من هجموا على اخيمنه حرگوها الخيم وابكربلا ضعنه ومن ذبحوا حسين ابضمينه عشنه وبنيته رقيه حيل هدتني ———————————— واحجيلك يعمه عن جرح گلبي مشيت انه بدرب لا والله مو دربي وكعدونا بخرايب والزلم تربي مو سهلة عليه هاي يا يبني ———————————— تره جروحي چبيره هواي هدتني واكبرهن يعمه غربتي ومتني بموتي حسين ما مرني وسئل عني ولا عباس شيّع هاي هضمتني ———————————— عجّل يابو صالح غيبتك طالت وفراگك صعب والدنيا هم مالت كلها بشيعتك يالمهدي هل عالت عجّل عمه واخذ بثارنه يبني ———————————— أبيات بقلم المقصرة دوماً... زينب الفياض لعل تشفع لي عند آل محمد في يوم لا ينفع مالاً ولا بنون... https://t.center/zainab_alfayaad