يسعد أيامكم يارب💙 بالنسبه لى موضوع حايم كتير في الفتره دي وكلام كتييير بتقال سبب بين الناس مشاحنات وزعل وكان سبب في قطع علاقات ومشاكل ماليها أول ماليها اخر إنو الولايات ونقعد ننتقد فيها وفي طريقة العيشه أو في ناسه أو تفكيرهم أو كده يعني بتلقى لمن تقول مثلا الخرطوم مافي زيها بلدكم دي ماسمحه الناس بتاخد الموضوع بحساسيه زيادة إنو طيب وقت الخرطوم عاجباك الجابك شنو؟؟بلدنا لمتكم وبلدنا فعلت! مافي زول ناكر إنو الولايات ضمت ناس كتار والولايات إستقبلت الناس بصدر رحب فأنته ي إنسان الخرطوم لازم تعرف وتخت في بالك إنو الانسان مهما مشا ولفه ماحايحس بى إنتماء زي المكان الاتربى فيهو .بيتك سريرك تفاصيل يومك كلها المواصلات الجامعه المرمطه الجري وكلو الليله لمن يجي زول مغترب ونلقاهو زعلان ويقول كرهته البلد دي والبلد دي ماسمحه بنقول ديل ناس جاحدين خليهم يجو يقعدو هنا ويضوقو الضقناهو عشان يعرفو الحكايه كلها مافي البلد ولا في الناس ولا في غيرو الحكايه جواك الإنسان ابن بيئته يعني مكان اتربيت فيهو وقمته فيهو ماف مكان في العالم بضمك غيرو ولا يكون ليك راحه زيو ونخت في بالنا برضو إنو انت اتربيت على نمط معين وأسلوب حياه معين وناس معينين مجرد مامشيت مكان تأني حاتلقى اسلوب حياه مختلف ناس طريقه تفكيره مختلفه فالازم تتقبل الحاجه دي ماتلاقيها بنفور وإنو اتصدمت في الناس دي وتنفر وتخلي علاقاتك ركيكه . خليك إنسان متقبل لفكره إنو انت ماكنت عايش مع الناس ديل ولا فاهم طباعهم فماتجي في فتره بسيطه ترفض فكره انك تتقبل بالنفور والمقاطع والمشاحنه والزعل 💙 وإنت برضو لمن تسمع زول يقول لي والله أسمح الخرطوم ماتاخد الموضوع شخصي خت برضو إعتبار ده مكان اتربيت فيهو وكل تفاصيل حياتي كانت فيهو الموضوع مامشاحنات ولا مكان احسن من مكان ولا ناس افضل من ناس كلنا مميزين وكلنا عندنا عيوب ومزايا بس العنصر الوحيد البشاركنا نتحد التقبل. ماتخلي الفتره دي تخلي نسيج العلاقات ضعيف حاول اتقبل الناس بى بيئتم وبي طباعهم خليها فتره تكون فيها علاقات سليمه لا القريب البضر ولا البعيد المقاطع خليك في الوسط لا تأذي لا يأذووك في النهايه دنيا ماشين منها مانرسخ مفهوم إنو الحرب صدمتنا في ناسنا وإنو كانت سبب في قطع علاقات وغيرو اتقبل الناس واتغاضى عن عيوبهم وخليك عارف انها كانت سبب في تقوية صله الرحم وسبب لباب من أبواب الجنه فما تقطعو بسبب مهاترات وكلام ساي #Nosiba