القصيدة: جينه ننشد كربلاء
✒الشاعر: المرحوم الملا زاير
المناسبة : أربعينية الإمام الحسين
🍃🍃🍃🍃🍃🍃🍃🍃🍃🍃🍃جينه ننشد كربلا مضيعينها
بيها زينب گالوا ميسرينها
▪▪▪▪▪يسروها ولا لها واحد فزع
شال حادي ضعونها بساع وگطع
جينه ننشد وين ابو فاضل وگع
ما تدلوني الشريعه وينها
▪▪▪▪▪بس اشوفه والعتب مني يزول
وادري ابو فاضل على النخوه يجود
عذره حگه يگول مگطوع الزنود
وحال ملك الموت بينه وبينها
▪▪▪▪▪جينه ننشد كربلا عليها العتب
تگول هاي رجال وتدور الغلب
حرمه زينب بيش مطلوبه بذنب
فوگ چتل حسين ومسلبينها
▪▪▪▪▪ارد انشدچ كربلا عن النزيل
شلون ضعن الحرم شال بلا دليل
إمچان گلتيلي يعاونها العليل
بالمرض مشدوه وينه و وينها
▪▪▪▪▪ارد انشدچ هم صدگ بالشام عيد
وحطوا بطشت الذهب راس الشهيد
ومن نشد زينب بديوانه يزيد
گاعده لو واگفه مخلينها
▪▪▪▪▪جينه ننشد عالعليل من انوله
فوگ ضعف المرض هالبلوى إبتله
ليش ما غاصت باهلها كربله
من گطع بالسيف راس حسينها
▪▪▪▪▪جينه ننشد كربلا وزين العباد
الروس شالوها وبگت بس الأجساد
شلون جسمك سيدي من المرض ذاد
ما حصل واحد حظى بتجفينها
▪▪▪▪▪جينه ننشد كربلا عن العيال
شلون گلي بلا ولي هالضعن شال
خلوا السبعين من غير الأطفال
مذبحه ويلي ولا مسجينها
▪▪▪▪▪جينه ننشد كربلا والدمع زاد
بيها أميه گظت بحسين المراد
كربلا عليها بچت سبع الشداد
وين شيعتها شسبب ناسينها
▪▪▪▪▪🍃🍃🍃🍃🍃🍃🍃🍃🍃🍃اللهم صل على محمد وآل محمد
https://t.center/hkcjhfjoggohcc