بَاچِرِ الْمَهْدِي يِصِدْ جَاسِمْ طَرِيحْ وِالرَّضِيعِ بْمَنْحَرَه نَبْلَه تِطِيحْ يِنْظُرِ الْأَكْبَرْ عَلِي دَامِي ذَبِيحْ حَگَّه بَاچِرْ يِرْتِجِي يِرْجَعْ أَمِسْ ----------------------- بَاچِرِ يْشُوفِ الْگُمَرْ رَاعِي الْعَلَمْ يِنْطُبُرْ رَاسَه بْعَمَدْ لِيثِ الْحَرَمْ وِالسَّهَمْ يُوگَعْ عَلَى عِينَه السَّهَمْ يَا وِسَافَه وْبِيهَه سَهْمَه يِنْحِبِسْ ----------------------- بَاچِرِ الْمَهْدِي يِشُوفِ بْكَرْبَلَه چَبْدَ ابُو الْيِمَّه يِصَوْبَه حَرْمَلَه سَاعَدَ الله گَلْبَه وِيْعَايِنْ إِلَه يْطَلِّعِ السَّهْمِ الْمُثَلَّثْ بِالْعَكِسْ ----------------------- طَعْنَه فُوگِ الطَّعْنَه بَاچِرْ چَمْ جَرِحْ يِنْغِرِسْ وَسْطِ الْجَرِحْ رَاسِ الرُّمِحْ جَائِعِ وْظَامِي عَجِيبَه يِنْذِبِحْ يُبْقَه عَارِي يَا وِسَفْ تَحْتِ الشَّمِسْ ----------------------- بَاچِرِ الْمَهْدِي يِعَايِنْ عَالثَّرى جَدَّه طَايِحْ وِالشِّمِرْ يَمَّه تَرَه مِنْ گُفَه يْحِزِّ اللَّعِينِ بْمَنْحَرَه بِاثْنَعِشْ طَبْرَاتَه مَهْدِينَه يِحِسْ ----------------------- بَاچِرِ يْشُوفَنْ خُيُولِ النَّايِبَه تِسْحَگِ بْجِسْمِ الذَّبِيحِ تْگَلُّبَه تِطْحَنِ بْصَدْرَه وْتِرِدِّ مْخَضَّبَه بِالْحَوَافِرْ جَدَّه بَاچِرْ يِنْتِرِسْ ----------------------- بَاچِرِ بْنَارِ الْمُخَيَّمْ يِحْتِرِگْ وِالْيِتَامَه بِالْحَوَافِرْ تِنْسِحِگْ وِالْعَقِيلَه بِالْمُصَايِبْ تِخْتِنِگْ وِالْخِدِرْ يِتْسَلَّبِ بْچَفِّ الرِّجِسْ ----------------------- بَاچِرِ الْمَهْدِي يِذِبِّ عْمَامِتَه مِنْ يِشُوفِ وْيَه الأَجَانِبْ عِيلِتَه وِالشِّمِرْ بِسْيَاطَه يِضْرُبْ عَمِّتَه وْمِنْ تِطِيحِ عْلَه التِّرَايِبْ تِنْرِفِسْ ----------------------- بَاچِرِ الْعِيلَه تِضِيعِ وْتِنْسِبِي عَالْهِزِيلَه تِمْشِي بِدْرُوبِ السَّبِي بِالْحِبَالِ مْچَتَّفَه بِنْتِ النِّبِي وِالْأَعَادِي مْنِ الْفَرَحْ عِدْهُمْ عِرِسْ ----------------------- #العاشر https://t.center/Hassankhanafer