@shaniyetabrizi #کانال_اشعار_مرحوم_شانی #احوالات_عابس_ابن_شبیب_شاکری #عابس ___________________ ✍ حسین عشقه بلا دشتین ایلدی سر حد
بلا بلادینه یتمیش بیر عاشق اولدی بَلَد
یازیلدی گل آدی طومار عشقه خسرو عشق
صنم سُونَ لره گوستردی عشق پاک صمد
باشندا ایله بیر اشخاص جانفشان واریدی
مثالی نه گلوبُ اوّل و نه گله جاق ابَدَ
آلوبلا سینه لری اُسته دسته دسته سُهام
سهامی شرکتیدی هر کیمون واریدی رسد
اگر چه لشگری تعیین اولوبدی یتمیش بیر
ولیک بعضی یازان لار یازوب قریب نود
بو نوع نقل اولوب اما امام باقردن
سوار لشگری قرخ بش نفر پیاده سی صَد
بیری گولردی بیری شوق اُزیله آغلاردی
بیری عبادته ایتمیشدی خیمه سین معبد
بلی گرک بیله بیر شخص لر اولا قوشونی
او شه که اولسون اوزی خلقه اعلم و اَزهَد
دیردیلر تیز اُلاخ گورمیاخ حسینی وحید
نه چکدی زین العبا بولمورم خدای احد
بیرسی عابس ابن شبیبیدی اولارین
وفالی شوذبه سویلوب او با شعور و خِرَد
عزیز فاطمه یالقز قالوب ندور فکرون
دیدی خدایه قسم تنگ اولوبدی روحه جَسَد
گرک حُسین رکابینده قانیمه بویانام
اولام بُو فیضیله فایض به رغم اهل حسد
حضور شاه شهیدانه گلدیلر باهم
ایدوبله عرض که ای نور دیدهٔ احمد
اولیدی جانیله قاندان عزیز بیر زاد اگر
ویروُب اونیله ایدر دوخ بو شری سندن رد
اوکه اولان دگل اما که باش و جانیله
سنه کمک لیقیله ایلروخ بو چولده مدد
خلاصه آلدیلار رخصت گلوبله میدانه
شهادت عشقینه خوش دلده کلمه اشهد
خطاب ایتدیله نه ظُلم دور بو ای لشگر
مگر دگل بُو حسینه رسول اکرم جد
سوسوزدان آل علی آهی نه سمایه چخور
کنار نهرده چوخ پُر ثَمَندی یوخسا ثَمد
مُبارز ایستدی عابس ربیع ابن تمیم
بونوُن شجاعتینه کاملاً واریدی بَلَد
قوشون جماعتینه سسلدی اولون آگاه
بو چوخ شجاعدی عابس آدی شبیبه ولد
بونون قتالینه جاندان گرک دویان گتسون
کمک گلوب اسدالله اوغلُونا بو اسد
گوروُب که عابسه سعداوغلی یوخدی مبارزاولان
ویروبدی لشگره فرمان او کافر مُرتد
یوخوزدی ایمدیکه جرئت قباقینه گیده سوز
دورون اوزاقدان هامی استونه توکون جلمد
ایدوب اطاعت فرمان سنگ بارانی
اولار که دللری سنگیندی ذاتی فطرتی بد
دیر که راوی باخوب گوردوم اشقیادن اولوب
قویون سوروسی مثل مُنهزم به قدر دو صد
قاچان قاچاردی دوران داش آتاردی هر یاندان
صحیح قولیله اخباردن وار الده سند
کلاه و خودینی آتدی چخاتدی جوشنینی
یاغان یاغیش کیمی داش باخمادی یاغور بی حد
سؤال ایتدیله سرّین دیدی مگر عاشق
ایدر قتالده سیل بلا قباقینی سد
باخور حسینی گورور گورموُری حریفی گوزوم
گرک دگل زره آهن و لباس نمد
دیری دیری دَریمی سویسالار بو یولدا خوشام
بیر عمر دوُر منه همراه دوُر همین بو صدد
بونا شبیه ده بیر نوجوان سراغیم وار
اودا ایدوب بیله بیر همت آدلانوب اسعد
گیدنده رزمه اودا گیمَدی زره جوشن
صغیریدی گیمیه چوه رَسا دگلدی اُو قد
او پیر کاملیدی بو جوان نو رسیدی
بونیله فرقی اونون چوخدی واردی چوخ اَبَعد
آدیدی قاسم حسین اکبر نیجه ایستردی
اودور که اولدی غمی شاه بی کسه چوخ اشد
عُموسی دادینه بیر وقت یتدی گوردی اُلوب
او شاهزادیه خاکیله خون اولوب مَسنَد
قلجلانوب باشی شهزاده اکبرین باشی تک
یازانماز حرف وفا خامیه وورولماسا قد
او برگ گل کیمی نازک بدن یره داغیلوب
اولوبدی آت ایاقی آتدا پایمال لگَدَ
گنه تعاقب ایداخ عابسین قضیه سینی
ایدوب اومطلبی منظور ازل نظرده کی مد
دیر ربیع باخوب گوردُوم عابسین باشینی
نچه نفر آدی انسان اولان طبیعتی دَد
او تیره دللر او باشی ویرولله الدن اله
زمانه تیره دی غالبدی ابیضه اسوَد
شجاع نسبت قتلین هره ویرَر اوزونه
بلی رشیده اولان قاتل آدلانور ارشد
دیدی امیر بونا بیر نفر دگل قاتل
شریک قتلیدی لشگر تمامی یوخدی عدد
سالور قضیهٔ عابس خیاله عباسی
بولار مقدمه دؤر یازمیشام اودور مقصد
اونوندا باشینی کسماقلا کشمکشلر اؤلوب
دیسم اؤرک آلوشور هم اولور کباب کَبَد
وفاده جود و سخاوتده هم شجاعتده
نظیر و مثلینی گورموبدی چشم نُه گُنبد
بو فرض اولونسا اگر مکتب وفاده مُدیر
مین عابس اولماز او مکتبده کودک ابجد
آلوبدی دوُره سین اون یدی بیحیا جلاد
آلور نه وقت همان انتقامی تک ایزد
گیدردی قان یاراسندان زمینه رود به رود
ووراردی یاره گنه اهل کینه ردّ به رد
صحیفه تک یازیلوب جسمی تیر و خنجریله
کشیده تیر خرافاتده چکوبدور قد
محاا امریدی روباهه دستگیر اولا شیر
یداللّه اوغلونی تاپمیشدیلار ولی بی ید
آدون فداسی ابولفضل آقا نه وقت اولاجاق
منیمده قسمتیم اولسون او غم فزا مرقد
❗لطفا با ذکر منبع فوروارد کنید
❗@shaniyetabrizi