*كيف اعدل شخصيتي* ؟ *كيف اغير صفة سلبية فييَّ؟* *الحل كالتالي* : بداية ضروري تحدد الصفة السلبية الي مزعجتك بشخصيتك، لنفرض كانت صفة (العصبية) بعدها بحدد الصفة الحسنة المعاكسة لصفتي السلبية (العصبية) وهي (التروي والهدوء) هون احنا بنكون خلصنا اول واهم مرحلة وهي الي بتخلينا نحدد شو بدنا بالضبط . *الخطوة الثانية* : ضروري تكون صريح مع نفسك وتجاوب على *السؤال التالي* : لو ضلت صفة العصبية عندي ، كيف راح تأثر على حياتي ؟ كيف راح تأثر على شغلي وعلاقاتي !؟ اكتب ع ورقة 📝 هون انت بتكون وصلت لقناعة تامة بضرورة تعديل نفسك وتطويرها للاحسن وهاد اهم شيء (لانه الدافعية والرغبة بالتغيير اساس كل شيء) *الخطوة الثالثة* : تقرأ عن الصفة الايجابية والحسنة الي حابب تكتسبها شوف نموذج مُتصف بالصفة الي حابب تكتسبها وبكل بساطة قلده وطبق عاداته وتصرفاته الحسنة هون انت بتكون اكتسبت معلومات صحيحة عن الصفة الي بدك تنميها بذاتك وبنفس الوقت بتكون شفت وعاينت نموذج حي بطبقها بعدها ضروري تكرر ممارسة العادة الحسنة بحياتك متل (الهدوء والتروي) وتدرب نفسك عليها وتطبقها بحياتك بشكل مقصود ومع مدة من التدريب والتطبيق لهاي العادة الحسنة راح تلاقي انها صارت اقوى فيك وانه صفة العصبية المعاكسة الها صارت اقل . وبالنهاية تذكر انه الاعتراف بالمشكلة ووجودها هو نص الحل ، وتذكر انه انت بتقدر تغير من نفسك . اوع تقول ما بقدر #إنت_بتقدر 👍