🩷 مخصص للقراءة بل لازم تقرأ حتى تعرف أنك مش لوحدك 🩷
بعد رسائل مبارح وتجاربكن تشجعت أكتر أكتب عن الموضوع لأن في منكن عم يمرّ بشي مشابه 📃
✨توثيق لشي صار أكتر من مرة✨ التنين 6_1_2025
بعد يوم صعب وتقيل كمان ماني متذكرة شي منه غير أنه أخدت خطوة عظيمة وكتبت الرسائل يلي فوق عالقناة وطلبت المساعدة بعدما كنت مترددة.
الكثير من النقاشات والدموع والأفكار والمخاوف وآخر شي خلص لازم نام.
ما كنت بأحسن حال ولا شايفة أنه في شي يستحق حاول مشانه بس مافي حل تاني.
كتبت شوي قبل ما نام، حتى الدعاء كان بقلبي بدون ما أحكي، مالي حيل أحكي.
بنص الليل مدري أي ساعة، أنا ونايمة سمعت صوت كلب ومانها أول مرة، بس يلي كل مرة بصير أنه دماغي بفسّر هالصوت بشكل غريب لأنه لما ننام منضل قادرين نسمع، وشو بده يفسره يعني؟
فسره كأنه صوت حدا عم يعيّط، يعني صاير شي، يعني حدا مات، يعني ممنوع أرجع نام لأن رح يصير شي وما أقدر سيطر شي لو نمت.
ولو ضليت فايقة كمان ما بقدر أعمل شي فعلياً.
✨ نقاش سريع مع عقلي وأنا لسا مو مصحصحة:
_ سمعتِ هالصوت؟ كأنه حدا عم يعيّط؟ ما يكون حدا من عيلتك صرله شي؟ قومي بسرعة شوفي شو صاير يا بتلحقي يا ما بتلحقي.
💋بعدما فقت استوعبت أنه هاد الصوت من برا، وكل مرة بدون مبالغة بفيق ع نفس الصوت ولنفس السبب ونفس الرعب كأنه أول مرة بس الحمدلله مع الوقت، رد الفعل ما عم يكون بنفس الشدّة 💋
= أنت ملاحظ أنه هاد صوت كلب؟ ما حدا عم يعيّط والله. اسكت خليني أعرف نام.
_ بس ليكي هالمرة غير، إذا نمتِ رح يصير شي لأهلك ورح تضلي ندمانة طول عمرك أنك ما عملتِ شي، أنا عم خبرك بس.
💕صدّقته وفقت، خفقان على أفكار كارثية، بس أنا ما بدي أرفض هالشي حتى ما يزيد، محاولات كتيرة لأهدأ💕
🩷أنا بعرف أنه هي الفكرة مو صح، بس يعني لو كانت صح وحدا صرله شي، ما رح كون أول حدا بيفقد أهله.. تخيلت الفكرة لو صارت وفقت الصبح وشفت ناس عم تبكي وناس جاية لعنا، وأنا ما عم صدق شو صار، لا لا ما بدي كمل تفكير، وبدي حاول أرجع نام🩷
= يا رب خليني نام متطمنة بس هالمرة ووعد المرة الجاية أشتغل أكتر عالموضوع، يا رب بس هالمرة بدي نام.
🔖كل مرة بحس فيها أنه الأمور خرجت عن السيطرة بقول نفس الكلام، وكل مرة ربنا بطمّني، بتطمن شوي، بعدين بلاقي أنه كتير كبّرت الموضوع براسي🔖
💗كأنه كنت مكبرة الموضوع مبارح؟💗 هاد السؤال الصباحي المُعتاد.
بالله يا دماغي؟ كان بدنا عناية مشددة من وراك. 🙂
بالبداية كان هالشي كتير قاسي ومؤذي لكتير أسباب:
💙ما كنت فهمانة شو عم يصير ولا ملاقية سبب أو تسمية للمشكلة. 💙كنت صدّق هي الأفكار وأمشي معها حتى لاقي حالي بالنهاية مو قدرانة أعمل شي. 💙كان معها كوابيس يومياً ع نفس الموضوع وكنت فيق بسببها عم أبكي. 💙ما كنت أقدر أرجع نام أبداً أبداً بعدما فيق. 💙ضغط الدوام والجامعة والدراسة. 💙كنت أتجنب النوم وأجّله لوقت متأخر لأن ما بدي عيش التجربة يومياً، ومع هيك ما أستفاد شي. 💙كنت لحالي وما خبرت حدا بالموضوع. 💙ما كنت حاسة بنعمة النوم. 💙ما كنت بعرف شو لازم أعمل.
ليش التجربة حالياً أقل قسوة؟
🩷بطّلت شي جديد وغريب. 🩷لقيت تسمية وسبب للشي يلي عم يصير وفهمت الموضوع أكتر. 🩷عرفت أنها مجرد أفكار، مو حقيقة. 🩷تعلمت كيف أتعامل معها لما تخطرلي ولما كون مرتاحة منها. 🩷ما عاد في كوابيس إلا نادراً. 🩷شاركت هالشي مع الناس الثقة. 🩷قد ما انطحنت بالجامعة وقصّرت بدراستك، صدقني ما بتوقف حياتك وكل شي بيتعوض إلا صحتك.
💭 تذكّر: حتّى في وحدتكَ، أنتَ لستَ وحيداً. 💭 أنت بطل قصتك، سواء كنت شايف هالشي أو لا.
