دايماً كان بِجي في بالي ليه الصلاة هي الفرض الوحيد اللي اتفرَض في السماء السابعة ؟!♥️ وليه اسمها صلاة ، يعني في حِكمة من كده ! وليه فيها ركوع وسجود ، يعني ليه ما ممكن نصلي ونحن واقفين مثلاً .. وليه الوضوء يكون إني أغسل جزء من أعضاء جسمي ما كلها ؟! وليه في الآذان بنقول حيّ على الصلاة ، و بعدها حيّ على الفلاح ؟ وليه الصلاة هي آخر وصية للرسول ﷺ قبل ما يموت ؟! لحدي ما لقيت كل الأجوبة على الأسئلة دي 💕 عِرِفت إنه الصلاة اتفرَضت في السماء السابعة لأنه ده من عُلوّ مكانتها . وسُمّيَت صلاة لأنها الصّلة الوحيدة بين العبد و ربه ! وعرفت إنه ذنوبنا اللي بنعملها بتبقى مكانها على رأسنا و على أكتافنا ف لمّن نجي نركع و نسجُد ؛ الذنوب بتاعتنا بتَقَع مننا ، عشان كده فيها رُكوع وسُجود وعرفت إنه الأعضاء اللي بنغسلها في الوضوء دي أكتر أعضاء ممكن نستخدمها في الحرام ! ف غسلنا للأعضاء دي بيغفر لينا الذنب اللي عملناه بيها .. زي إنه غسل الأذن بيغفر ليك أي حاجه حرام سمعتها ، و المضمضة بتغفر ليك أي ذنب عملته بلسانك ، وهكذا .. وعرفت إنه الآذان لمن يقول "حيّ على الصلاة وبعدها يقول حيّ على الفلاح " لأنه لا يفلح مَن لا يصلي ! وكانت آخر وصايا الرسول ﷺ لأنه اللي بيصلي حاله حيتعدِل للأحسن مهما كان كعب .. لكن اللي عمرُه ما ركعها ، حاله ما حيتعدِل ! أقِم صلاتك ، استشعرها و اخشَع فيها ♡ الصلاة راحة ليك ما حِمِل عليك ، لو استشعرتها حتعرف قدر شنو هي عظيمة ومريحة مهما كنت شايل من تعب وضِيق مجرد ما صلّيت حترتاح بإذن الله الصلاة هي عماد دينك .. يعني دينك كُلّه حيقَع لو ما صلّيت ! #الصلاة فاللهم اجعلنا و ذريّاتنا من مُقِيمي الصلاة حُبّاً وتقرُّبا ، ثبّتنا وتقبّل منا واجعلها أحبُّ إلينا من الدُنيا وما فيها ♡ ممكن نصلّ على الحبيب !♥️ #تيسير_الصادق