🌺 تایپ کننده و ویرایش کننده از : جناب آقای بهروز کریمی
🌺#غارت_خیام#مرحوم_حاج_سعید_شبیریبلا دشتینده محشر قوزانوب گَل یا رسول الله
آچوبدور غارته اَل قومِ ارزل یا رسول الله
یورش گَتدی قشون خرگاهه، دوشدی وحشته قیزلار
گلوبلر نالیه بیردن، ائدوب شیون اوغولسوزلار
باتوب گون قتلگهده، خیمه گهدن چیخدی اولدوزلار
هر اولدوز قالدی سِیرینده معطّل یا رسول الله
حرملر باخدی گوردی راهِ امنیّت اوزاقلاشدی
قالوبلار چاره سیز عورت اوشاق سس چکدی آغلاشدی
هایاندا خیردا قیزلار بیر بیرین گوردی قوجاقلاشدی
قویوبلار باش بیابانه معجّل یا رسول الله
خیمدن ایستوری هر بیر بالا دوشسون یولا قاچسون
قالور مبهوت هیچ بولمور صاقا قاچسون صولا قاچسون
گووور آخرده یوخ چاره گرکدور بیر یولا قاچسون
که بلکه تاپماسون دشمن اونا ال یا رسول الله
دیسم محشردی محشرده بیله بیر اضطراب اولماز
علاوه حشریده فصلِ جفایه فتحِ باب اولماز
دیسم محشر دگل دنیاده بیله انقلاب اولماز
که اولسون شرحی محشردن مفصّل یا رسول الله
اگر ایذایه سالماقدان قوشون بیر عدّه محصوری
اثاثِ خیمه و معجر، زر و زیوردی منظوری
داخی بی آشیان قویماخ ندور اطفالِ رنجوری
خیامه اود ووران اللر اولا شل یا رسول الله
اثاثِ خیمه قورتولدی سویولدی عترتِ اطهار
گینه ال چکموری جور و جفادن لشگرِ اشرار
خیامه اود ووروبلار تا اولاردان قالماسون آثار
بلا دشتی اولوب بیر پارچا مشعل یا رسول الله
ایله زهرا قیزی جان و دلیله جدّ و جهد ایلور
وار علّت نوشِ جان هر بیر بلایانی چو شهد ایلور
ئولوبدور قارداشی، ایمدی باجی ایفای عهد ایلور
گیچور جاندان او بانوی مجلّل یا رسول الله
گوروب دشمن خیامین دوره سینده بیر خانم عورت
گوزینده اشکِ حسرت، قلبده دنیا بویی محنت
گزور پروانه تک امّا وجودین چولقیوب وحشت
دیور چارم ندور، یاندی بالام گَل یا رسول الله
باخوب گوردی خانم بو حالیله درده دوا اولماز
اوزون پروانه تک باندیرماسا حاجت روا اولماز
امام اوددا اگر یانسا اوامر جابجا اولماز
امامیله تاپار عالَم تَکَمُّل یا رسول الله
اوزین وووردی اودا چیخدی سپهره ناله و آهی
یانان اوددان چیخاتدی همّتیله حجّت اللّهی
نجه اولادیوین گور امّت ایچره عزّت و جاهی
اولوبدور ذلّته ظاهر مبدّل یا رسول الله
#شبیری درگهونده روز و شب حاضر به خدمتدور
ولی منظوری سیزلردن نه ثروتدور نه خلعتدور
فقط بیر اربعین، اَحبابیله قصدی زیارتدور
به حَقِّ بِنتُکَ الزَّهرا_(س) تَقَبّل یا رسول الله.
التماس دعای فرج
@ganjine5