نویسنده و ویرایش کننده از : جنابِ آقای خیابانی
#کوچ_از_قتلگاه #مرحوم_کهنموئی (ریاضی) و
مرحوم #رجائیاورک غمین دیماقا بیر یانان دل آختاریرام
دوشوب صعوبته حلّال مشگل آختاریرام
صاقا صولا دولانوب حسرتیله زار و ملول
ایتیرمیشم بو گلستاندا بیر گل آختاریرام
فراقِ یار بلی الدن اختیار آپاروب
قرارِ بلبلی دلدن جفای خار آپاروب
چمنده زاغ و زغن گُلده هر نه وار آپاروب
ایتیرمیشم بو گلستاندا بیر گل آختاریرام
دوشنده بلبل شوریده نون بهار الینه
آلار اله گُلینی ایلر افتخار الینه
دوشوب منیم گُلوم اما بو چولده خار الینه
ایتیرمیشم بو گلستاندا بیر گل آختاریرام
بو گلستاندا گللرین عجب طراوتی وار
هاموسی قرمزیدی عطری وارلطافتی وار
ولی منیم گلومون بیر نچه علامتی وار
ایتیرمیشم بو گلستاندا بیر گل آختاریرام
ویروبدی بلبلی بیرکهنه پیرهن گُلومه
که بلکه ویرمیه ال ، زاغیلن زغن گلومه
ولی گیچن گیجه ال تاپدی اهرمن گلومه
ایتیرمیشم بو گلستاندا بیر گل آختاریرام
سولوبدی غنچه ده گللر ، عجب گلستاندور
بو گللر اوستونه شبنم اولان قیزیل قاندور
گلوم بو یرده منیم شمر الینده خنداندور
ایتیرمیشم بو گلستاندا بیر گل آختاریرام
بو گلستانداکی گللر ورق ورق داغلوب
باخاندا هرطرفه گُلدی بیر طبق داغلوب
ایاقلار آتدا کلامِ خدای حق داغلوب
ایتیرمیشم بو گلستاندا بیر گل آختاریرام
ایشیتمیشم که گلوم غارته چمنده گیدوب
الیده بارماقیدا اهرمن گلنده گیدوب
دیولّه قالمیوب اول کهنه پیرهنده گیدوب
ایتیرمیشم بو گلستاندا بیر گل آختاریرام
عبث دگول ایدرم من بو قدر جوش و خروش
همیشه شعله چکر اولماز عشق اودی خاموش
گلور حسینیمون عطری چخور باشیمدان هوش
ایتیرمیشم بو گلستاندا بیر گل آختاریرام
حسین عزیز آنامون سینه سینده کی گُلوسن
پیمبراوغلی رسول خدایه سوگلوسن
باجون فراقوه تاب ایلمز اوزون بولوسن
ایتیرمیشم بو گلستاندا بیر گل آختاریرام
بلای کرب وبلا اولمیوبدی بس قارداش
مسافرم گیدورم سسنلور جرس قارداش
پناهسیز باجیون ویر سسینه سس قارداش
ایتیرمیشم بو گلستاندا بیر گل آختاریرام
هایاندا دوشموسن ای نوردیدهء زهرا؟
ایشتموسن باجیوین آه و ناله سین آیا
الیم اورکده قالوب دلده آه و واویلا
ایتیرمیشم بو گلستاندا بیر گل آختاریرام
پوزوپدی گلشنیمی زاغیلن زغن گیدورم
وروبلا قولاریما ظلمیله رسن گیدورم
یارالی جسمیله سن قال بو چولده من گیدورم
ایتیرمیشم بو گلستاندا بیر گل آختاریرام
نولوردی شمر قوییدی تاپیدیم اللریوی
سرشگیمیله یوویدیم او قانلی بستریوی
قویانمادیم باجون اولسون مزاره پیکریوی
ایتیرمیشم بو گلستاندا بیر گل آختاریرام
زبسکه امر ایلدی خلقی اتّحاده باشون
سوسوز کسیلدی قفادن بو کربلاده باشون
او دوغرانان بدنون یرده دور جِداده باشون
ایتیرمیشم بو گلستاندا بیر گل آختاریرام
(رباضی) ایله دعا شعره اشتراک ایدنی
یقین که اجرسیز ایتمزلّه نه اونی نه سنی
(سیدحسین رجائی) ویروب بوسر سخنی
ایتیرمیشم بو گلستاندا بیر گل آختاریرام.
#کهنموئی_رجائیالتماس دعای فرج