@ganjine5#حضرت_علی_اصغر_عامان او وقتده میدان دا گوردی تیر سه پر
حسینون اللری اوستنده ضعف ایدوب اصغر
بوغازینون چوخوری آی کیمی نمایاندور
زبس قالوبدی سوسوز حالی چوخ پریشاندور
مصمم اولدی علی اصغری ایده سیراب
النجه گوزلری آغلار قالا آناسی رباب
علی سیزیلدیسی فولاده ایلیوبدی نشست
حبیبی ایستدی محبوبیله ایده پیوست
بروز ویردی او گیزلین اولان علاقه سنی
نچون سوردی ازلدن کیچیک اوشاق سسنی
کمان آلشدی اوخ اود دوتدی شمع تک یاندی
گیده گیده اریوب زهر پرلر ایسلاندی
اگر دیاخ او اوخون شدتنده اوخ چوخودی
خبرده وار او قشوندا اولان او اوچ اوخودی
اگرچه پرلری تک تک الف کیمی دوزیدی
ولیک باشلاری نوک سنان کیمی تیزیدی
دوروب مجسمه ده زهر قاتلون اثری
واریدی صاق و صولندا قلج کیمی کسری
سوزون بیوک سوز اولوب سالما اوز اوزون رعبه
دیاخ اگر یری وار بیر پر آچدی مین شعبه
نهان تیر بلا عین سمیله دولدی
کمان ایدوب حرکت اوخ هوایه رد اولدی
قضا نشانینی ویردی نشان اوخون دمنه
یتوردی سوگلنی حال ایوینده محرمنه
قزشدی پرلری سیراب اولدی قان ایچدی
گلوب نشانیه دگدی قلج کیمی بیچدی
ازل آچوب او بالا گوزلری گویه باخدی
یر و گوی اهلنه اود ووردی یاندروب یاخدی
دولاندیروب گوزینی ایلدی امامه نظر
او باخماقیله دیدی ای امام جن و بشر
صغیر سنیله عین حیاتدن گچدیم
سوسوز گلوب بابا میدانه ، لخته قان ایچدیم
منیم بو بیر یارامی چوخ یارادان آز ساناما
یارالیام منی بیرجه یتور غریب آناما
چکوب اوخی بوغازیندان سپوپ گویه قانین
ایدوبدی سرخ او قان نیلی چرخ دامانین
سپردی قاننی میداندا مهر و ماهه طرف
او حالله بالاسین گتدی خیمه گاهه طرف
گوروب آتا بالانین همتین هوسلندی
یتشدی خیمیه زینب آدیله سسلندی
سکوت صبردهد کاشانه نی وروب یخدی
حسین باجیسی زینب خیامدن چخدی
نگوردی دولدوروب آفاقی جمله درد و ملال
ایشق گونون الی اوستنده اوخلانوبدی هلال
الین آتوب باشنا خیمه گاهه اود سالدی
یوگوردی اصغری فورا امامدن آلدی
باخوب بوغزینا گوزلر دولوبدی مثل سحاب
اوزون ایتردی خانم سویلدی رباب ، رباب
تعجبم نیه آرام اولوب یر و گویلر
کناره گل نجه گور اوخلانوب علی اصغر
اولوری هانسی شقی سو یرینه قان ویرسون
ایچوب او قانی اوشاق حقه امتحان ویرسون
گوروب آنا ، باجیلار ،عمه ، زخم تازه سنی
دولاندیروبدیلا الدن اله ، جنازه سنی
رباب مرتبه عشقده علم ووردی
اوزونی پوزمادی ظاهرده صبر ایدوب دوردی
امام دورموشیدی حبس ایدوبدی اوز نفسین
اورک یانوردی ، حیادن چخاتمیوبدی سسین
یواش یواش بو سوزی ایلیوبدی ورد زبان
دیردی مین بیله اوغلوم آقا سنه قربان
اولوبلا گون کیمی بی پرده بانوان حرم
مجددا قورولوب خیمه لرده مجلس غم
امام گوردی سرادقده عالم عرصات
او قدر قالمور هلاک اولسون عترت سادات
دوباره زینب مظلومه نی ایدوب احضار
بیوردی گل باجی معلومدور سنه اسرار
الستده یازیلوبدور بو امره چون فرمان
گرک بو گونده ویرم منده قوچ قوزی قربان
دوباره گیت منه قیتر او قانلی قربانی
که بلکه دفن ایلیوم چوخ لطیف دور جانی
خانم دوباره قیتدی باسوبدی سینه سینه
او قانلی قنداقی قیتردی اوز خزینه سینه
اگرچه مست محبت ایدوب اونی ساقی
آیوتماسین دیرم بول ، کمیت دیرناقی
امام گوردی باتوب قانه طفل شش ماهه
یانقلی قلبله عرض ایلیوبدی اللهه
گوروبکه قنداقی باشدان باشا قزل قاندی
دیدی قبول ایله الله غریبه قرباندی
نگوردی یاره لنوب حلقی گوش اندر گوش
باتوبدی سینه اولوب بلبل سحر خاموش
یتوردی آخره اول شهریار میثاقین
قماطی پاره لدی آچدی قانلی قنداقین
قرار و تاب توان نه رواقدن آلدی
دیماق اولار گنه قان ایچره ال ایاق چالدی
یوخیدی بیر گلنی باخدی بیر صول و صاقه
علی جنازه سینی تاپشوروبدی تپراقه
او قدر گچمدی الدی الن یانوب خرگاه
اولوبدی دشمن النده اسیر آل الله
سوزوم یتوب او یره یاندی داغیله داشلار
وورولدی نیزه لره گون کیمی کسیک باشلار
دایانما صفحه رخساره توک گوزون یاشون
تاپون دیدی گنه سعد اوغلی اصغرون باشون
تعجم نجه مذهب دی ، نه طریقه ، نه کیش
ایدوبدی نیزه لی لر کربلا چولین تفتیش
عجب دی نچه نفر دین ایوین ووروب یخدی
بیری ووراندا یره نیزه قنداقی چخدی
کسوبله باشین عدو نیزه ده ویروبله مقام
قشون ایدوب حرکت جمله تاپدی نظم و نظام
بو سوزلرونده (رفوگر) یوخوندی ذره ثمر
مگر سنه گنه لطف ایلیه علی اصغر
#مرحوم_روفه_گر@ganjine5