🌺 تایپ کننده و ویرایش کننده از : جناب آقای کربلایی حافظ خلیل زاده
🌺#کوفه #مجلس_ابنه_زیاد #ورود_به_شام#مرحوم_شهاببخش ۱
حدیثِ شامی گینه باشلیوبدی خامه یازار
چه فایده که دوشوبدور خیالِ خامه یازار
بو شام محنتینی یازماقا فراغ ایستر
اگر گونوز گوزی یازسان، گینه چراغ ایستر
قصور ایلموری گر چه یازماقا خامه
ولی گونون ایدیری قاره بو سیه نامه
مین اوچ یوز ایلدی که دیللّرده ذکرِ شام اولونور
نه صبحی وار آچلا، نه غمی تمام اولونور
نجه اولار بیله بیر ماجرا گَله قلمه
عبث مصمّم اولوبدور قلم بو شرحِ غمه
ویروبدی بیر ایله تشکیلِ غم، حسین حرمی
سالوبدی حیرته کُتّاب اَلیندهکی قلمی
اگر چه وسعتی وار ماجراده سوز چوخدی
ولیڪ هر قلمون قابلیّتی یوخدی
گرک باشین یارا خامه، یازاندا قان آپارا
آدین مداد قویا آخره بیان آپارا
باشین دواته وروب یازسا شف اولور مطلب
بولر نه چکدی یاراندا باشین خانم زینب
او حلم صاحبی زینب، بتوله وارثِ غم
امام خطیّنی سِیر ایلین قدم به قدم
یگانه گوهرِ گَنج شرافت و عزّت
حقیقتِ صدفِ بحر عفّت و عصمت
علومِ غیبدن آگه، ولایته دارا
امامه محرمِ اسرار و ملجاءِ اسرا
ثبات و صبر و تحمّل سپهرینه چون ماه
حریمِ پردهی ناموس حق، او عُلیا جاه
عقولی عاجز ایدن صبرینون بَیانیندن
سالان تحیّره آفاقی امتحانیندن
دُوزَن شدایدِ بی انتهایه دنیاده
ویرن تسلّیِ دل قتلگهده سجّاده
نه یوز وِئروب اونا بولمم که صبرینی آلدی
حسین دیوب باشینی چوبِ محمله چالدی
اگر چه ایستمورم سرگذشتِ کوفه آچام
او قانلی زلفیله مقصود بیر شکوفه آچام
عزا مجالیسینی رشکِ لالهزار ایلیَم
هَزار وار گوگلدن بیر آه و زار ایلیَم
بو گلستانِ غمه گوز یاشیله آب ویرم
بو آبِ شوریله بیر تازه آب و تاب ویرم
بو مرتضی قیزیدور بانوی مجللّه دور
او کسدی قارداشی، کیم جبرئیل اونا لَلَه دور
دِئسن او رتبه ده بانو باشین نیه یاردی؟
اونون من عرض ایدرم نچّه علّتی واردی
او گون اهالی کوفه اوشاق، کیشی، عورت
باخوردولار اسرایه، ایدوردولر عشرت...
امام ایستدی مخلوقی جذب ایده سوزینه
گوز اولمیه باخالار اهل بیتینون یوزینه
او حینیده اوجا آوازیله شهِ عطشان
جداده باشلادی لَحنِ حجازیله قرآن
قویوب حمایت الین آلِ مصطفی باشینا
نظاره اهلینی مشغول اِئدوب جدا باشنا
اِئدوبدی غرقِ تحیّر او قومی وارثِ نوح
دایاندیلار هامی مانندِ قالبِ بی روح
باخوردی بیر نچه ملعونه غرفه دن ناگاه
گوروبله بیر یارالی باش اوخور کلامُ الله
آلوب بیری اولارین بیر جفا داشی اَلینه
نه مالڪ اولدی شل اواموش الینه نه دلینه
سرِ امامه ازل ویردی سِحر نِسبتینی
دانوب او گوندن ایشیق معجزِ امامتینی
آتوب او داشی سرِ انورِ امامه طرف
اون ایکی یاره دگن باش اولوبدی داشه هدف
داشین یریندن اولوب قان روانه گُل یوزینه
بویادی گُل یوزینی دولدی نازنین گوزینه
لسانِ ناطقِ قرآن دوشوب تلاوتدن
کسیلدی ذکر اِلهی لبِ امامتدن
باجی گورنده که قارداش سسی گینه باتدی
آزالدی طاقت و صبری، مصیبتی آتدی
باخاندا نیزیه بیر ظلمدن نشان گوردی
حسین باشیندا تازا یاره، تازه قان گوردی
او یاره زینبی دلدن دوباره یاره لدی
سرشکِ چشمینی غربالِ دیده دن اَلَدی
دئدی روا دگی زینب باشی سلامت اولا
باشیندا قارداشیمین اون ایکی جراحت اولا
علاوه گوردی که قانیاشی دیده دن آخوری
دولاندروب گوزینی اهلِ بیتینه باخوری
او باخماقیندا بولوب واردی زینبه هَوَسی
باشین یاروب که خوش اولسون باخاندا منظرهسی
ساچوبدی قانلی ساچیله او وقته گُل باشینا
غریبه منظره تشکیل ویردی قارداشینا
بیر علّتی اوئیدی وار بیر علّتِ دِگری
همینکه قارداشینون دوشدی باشینه نظری
گُل عارضینده گوروبدور که کول علامتی وار
مصوّر اولدی نظرده که نه حکایتی وار
دِئدی حسین بو گیجه هاردا منزل اِئتمشدون؟
کسوک باشیله کیمه لطفِ کامل ائتمشدون
دِئمه قراریمی الدن غمِ فراق آپاروب
قویولدی قلبیمه کیم باشوی قوناق آپاروب
حَرملرون آنام اوغلی گوزیندن آتمشدون
قوناق گِئدوب کیمه، بولدوم که هاردا یاتمشدون
یقین اولان بو گیجه جای و مَأمنون واریمش
کول اوسته خولی ایوینده نِشیمنون واریمش
چوخ اینجیوب گونوزی، یوخسا رفعِ زحمت ایچون
گیجه تنوریده یِر تاپدون استراحت ایچون
بتول سینهسینه باش قویاندا ناز اِئتدون
کول اوسته بس باجون ئولسون نه اهتزاز اِئتدون
دیوب اورک سوزینی دمبدم فغانیله
باشینی محمله چالدی، بویاندی قانیله
قاشی، گوزی، گُل اوزی، قاره معجری قانلی
ووراردی باشینه، باش قانلی، اللری قانلی
چکیلماقا گینه داغ اوسته داغ سینهسینه
چکوبله کوفهده ابنِ
زیاد مجلسینه
او شوم مجلسین اوضاعینی اِئدنده رقم
چو نِی نوایه گلور سسلنور الیمده قلم
دیلیم بو شرحِ مصیبتده ناتوانادی
خدا بولور منی مجبور اِئدن احبّادی
آناسی حاضر اولور چون عزا دوتان یِرده
حیا اِئدوب چکورم سرگذشتینه پرده
ادامه دارد
🔽🔽🔽https://telegram.me/ganjine5