#امام_حسن_ع گل هرایه باجی جان باغریم اولوب قان ئولورم
ایچمیشم زهر جفا تاپشیریرام جان ئولورم
(باجی غرق محنم)
(من غریب وطنم)
سَسلیرم داده اگر آه و نوایله سَنی
دوغرانور ظلمیله اکبادیمی درک اِیله منی
اوزگه احواله سالیب بو غم عظما حَسنی
ویروری جور و جفا عمرومه پایان ئولورم
کیم بولور که چَکیرم من دل شَبده نه عذاب
اِیلییوب سوز مصیبت بو یانان قلبی کباب
زهره باخ دامنیمی اِیلدی قانیله خضّاب
اولموشام ظلمیله اوز قانیمه غلطان ئولورم
ئولوم حقدور اولاجاخ خَلقه بو عالمده نصیب
قَدر حَقه قضا اولسا دگور چوخدا عجیب
بو عجبدور که وطنده قالا بیر کیمسه غریب
شهر پیغمبر اولوبدور منه زندان ئولورم
عمردور که منه ویرموبدی غم و غصه امان
گل اوتور شرحینی ایلوم سنه سون دمده بیان
اودموشام بیر نچه مدتدی فنا دهریده قان
جگَریمله توکولور طشته همان قان ئولورم
باشیمون اوستونه قویموشدلا بیر کوزه که سو
سودان ایچدیم اورکیم یاندی دیدیم زهریدی بو
من اؤلونجه هَلّه بو سِرّی باجی اِیلمه رو
قَدَرِ حقه قضا اولدی چیخور جان ئولورم
گر چه آرتوقدی بو زَهرین جگَریمده اثری
یاندرور، دشمنیمون ظلمی ولیکن جِگَری
ای منیم سِرّیمین عالمده اولان با خبری
ساخلا سینونده هَلّه سِرّینی پنهان ئولورم
عمرومون گلشنینه اَسدی عجب باد خران
ولی ای کاش بیر آز پیک اَجل وئرسین امان
سسلیوم درک ایلسین ظلمیله درگاهی یانان
فرقتیندن آنامون زار و پریشان ئولورم
آغلادور دَرد و مُحن آغلامورام اوز باشیما
قاتمیشام خون جگر گوزدن آخان گوز یاشیما
یوللا قاسم یتیره بو خبری قارداشیما
گَله قران اوخیا جان ویرم آسان ئولورم
یادیمه دوشدی گینه واقعه کرب و بلا
یانورام طالعیوی غملی یازوب کِلک قضا
آغلاما کرب و بلاده اِیدسن آه و نوا
دِیَسن دردیمه یوخ دهریده درمان ئولورم
آغلاما ایندی هَلّه گوزلریمی باغلا باجی
قبریمون اوستونه گَل اوردا اورک داغلا باجی
آغلیاندا منه دایم اوجادان آغلا باجی
ایلیوب باغریمی غم دهریده آلقان ئولورم
نه قَدر اولسا
#عتیقین باجیِ جسمینده توان
غملی نوحه یازاجاخ ایلیجاخ آه و فغان
جان ویرنده چاغرار داده سَنی ناله کُنان
یتیش امداده اوزون سَسلَسه هرآن ئولورم
التماس دعا
🙏@davodTahmoresi