https://t.me/+2tozhR4lwaU3MTY0110 نوحه
#عباسیه_مدح_و_مرثیه#امان_نامه_______________________ ✍#غم_لشگری_لشگرگه_اسلامه_گلیبدیرسس دوشدی ابوالفضله امان نامه گلیبدیر
تل اوسته چیخوب شمرِ خطادیده خطاکار
آوازیله سسلهندی ابوالفضلی او غدّار
گلدی اوجا بویلو او اوزون قوللو علمدار
تعظیم ائدیب عبّاسه او بیدینِ ستمکار
برنامه وئریب آشدی باخوب بُهتیده قالدی
تئز پارچالادی چکمهسینین آلتینا سالدی
اولسیدی اگر شهدن اجازه اویاناردین
بو تیغِ شررباریله قانه بویاناردین
حیرتله او بیدین الینی بیربیره ویردی
دال دالی گئدیب ساق دیزی اوستونده اوتوردی
شاهین او شجاعتلی علمدارینه باخدی
شهلا گؤزونه قدّینه قوللارینا باخدی
عرض ایلدی عبّاس ائشیت موعظه مندن
اؤز نفسیوه رحم ایله ال چک بو حسیندن
دنیا بو حسینسیز دئدی بیر کلمهیِ لادور
چوخ موعظه ائتمه بورا میدانِ بلادور
آیریلدی گلیب خیمه قاباقیندا دایاندی
ایستیردی گئده محضرِ سلطانه اوتاندی
سالدی آشاقا باشینی جوش ایلدی غیرت
من حدس ائدیرم گلمهدی چون چکدی خجالت
شاهِ شُهدا بیلدی بولوتلار کیمی دولدی
گلدی اوجا بوی قارداشیلان قول بویون اولدی
قارداش دئدی مانع دگیلم گئتسون ابوالفضل
من بیکسی بییاوری ترک ائتسون ابوالفضل
من باغلامیشام روزِ ازل ئؤلمگه پیمان
سن سالما بلایه اؤزینی تازه جوانسان
مندن نگران اولما مرامه چاتارام من
دونیا سؤزونون داشینی باشدان آتارام من
صبّاح بو بیابانیده قانه باتارام من
ششماهه بالام سینه ده راحت یاتارام من
عرض ایلدی یا سیّدی قلبیده یارام وار
نوکرلری قومازلار اگر قوسون هارام وار؟
درک ائتدی امان نامه سؤزون ماهِ مدینه
یغدی باشینا دربدر اطفالی سکینه
سسلندی آچین باشوزو باشوزدا بلا وار
عبّاس عمومی کرب
و بلادان آپارورلار
قیزلار گؤزو یاشلی، هامودان دوشدی قباقه
گلدی او خانیم، سود امری آلدی قوجاقه
بیردن هاموسی سسلدی لایلای علی اصغر
گئتسه عمومیز وای بیزه وای علی اصغر
دورموشدی همان یئرده اوزون قوللو علمدار
بیردن آقانی دؤره لدی خورداجا قیزلار
بیر ناله بلند اولدی سکینه اورهگیندن
اگلشدی یئره دوتدی ابوالفضل اتگیندن
عبّاس عمو گئتمه بو یانان لبلره خاطر
قویما بیزی چؤللرده علی اصغره خاطر
فورا" آلوب آغوشه الین باشینه چکدی
جوش ایلهدی غیرت، گؤزونون یاشینی تؤکدو
آیریلمیوب هر قدر بو قوللار بدنیمدن
آیریلمارام ای نازلی سکینه بالا سندن
گون باتدی بلا آرتدی گؤروندو مهِ تابان
اولدوزلاریلان اولدی سماوات چراغان
سؤندوردو چراغلاری حسین قلبیلر اسدی
سسلندی گئدین خالِقِ یکتا منه بسدی
صبّاح قیامتدی بو صحرای بلاده
کیم قالسا گرک غرق اولا دریایِ بلاده
سس دوشدی باشیندان داغیلوب چؤللره لشگر
قیرخ آلتی نفر قالدی، اوتوز بئش قارا معجر
باخدی داغیلان لشگره آواره رقیّه
تؤکدو گؤزونون یاشینی بیچاره رقیّه
یاندی گینه مشعللر ائدیب حجّتین اتمام
گؤردو دایانیب تیترییر عبّاسِ دلآرام
سسلندی زُهِیریله حبیب ابن مظاهر
ای فاطمه دلبندی کی ای طیّب
و طاهر
سن غرق اولاسان قانلی بو دریاده حسینیم
بیز عازم اولاق مسکنِ مأوایه حسینیم
صبّاح نه دییک حضرتِ زهرایه حسینیم
سندن سورا عار اولسون او دنیایه حسینیم
شاهِ شُهدا اللری قوینوندا دایاندی
شمعین باشینا دستهیِ پروانه دولاندی
ائتدی بیر اشاره چکیلیب پردهیِ ظلمات
گؤرسندی او دم گؤزلرینه روضهِ جنّات
امر ایلدی اصحابه اگر اولسا قبیلوز
تا اهلِ عیالی آپارین ساکن ائدین سیز
عترلروزی قویمیون عُدوان آراسیندا
صبّاح قالالار ورطهِ توفان آراسیندا
گلدی هاموسی اهلِ عیالین ائدیب احضار
چیخدیلا سراسیمه او عصمتلی خانیملار
سسلندیله حضرت بویورور حاضر اولون تئز
بو قورخولو چؤلدن سیزی بیر یانه چکک بیز
بو کلمهنی درک ائتدی او غیرتلی خانیملار
بیردن هاموسی آغلادی جوش ایلدی قانلار
ناله گئجهنین عالمی قوزاندی سمایه
عترتلر او شاهین چادیرین آلدی آرایه
سسلندیله ای عالَمه امّید حسینجان
رحم ایله بیزی قوما قاپوندان سنه قربان
رحم ائت بو آدامسیزلارا پیغمبره خاطر
قوما بیزی ششماهه علی اصغره خاطر
سسلندی چادیردان او زمان شاهِ شهیدان
صبّاح قوپاجاقدیر بو بیابانیده توفان
قصدیم بودی سیز قالمیاسوز قان آراسیندا
قانلار تؤکؤلن وقتیده توفان آراسیندا
درک ائتدی خانیملار بو سؤزو آغلادی هایهای
سسلندیله ایوای حسین وای حسین وای
بیز گئتدیک اگر جمعِ پریشان هارا گئتسین؟
زینبده آدامسیزدی حسینجان هارا گئتسین؟
بو السیز آیاقسیز بو سوسوزلار هارا گئتسین؟
بیکس آتاسیز خورداجا قیزلار هارا گئتسین؟
بیز گئتدیک حسین نازلی رقیّون هارا گئتسین؟
قارداشسیز او ایستکلی رقیّون هارا گئتسین؟
زینب یانان اودالاردا دوشوب یانیق حسینیم
چؤللرده قالوب قول-قولا باغلانیق حسینیم
#منعم@marsie3