#مرحوم_استاد_خوندل (مرحوم استاد حاج حیدر شبگرد)
#حضرت_علی_اصغر_عزبانحال همسرِ باوفای حضرتِ امام حسین علیه السلام، حضرتِ
#رباب سلام الله علیها
حیات اگر هامی عشق اهلینه صفادی علی
سن اولماسان منه بو عمر بیر بلادی علی
بو احترام سنون حرمتوندی منده ده وار
رباب دردینه دردون سنون دوادی علی
بو اهلِ بیته عروس اولماقیم اوجاتدی منی
سنون رهینِ وجودون بو اعتلادی علی
سن اولماسان نیَه من لازمم بو ایوده اوغول
منه سنون نفسون مایهء رجادی علی
سنون وجودویله من بو ایوده دلخوشودوم
انیسیم ایندی منیم شیون و بکادی علی
عزیزیدیم سنیله خاندانِ زهرایه
سن اولماسان گجه تک گونلریم قرادی علی
منه وسیلهء عزّت بو ایوده بیر سنیدون
سن اولماسان بو حیاتیمده بی بهادی علی
اوغول اوغولسوز آناوین یوزی گوله هیهات
آنا که اولدی اوغولسوز ایشی نوادی علی
تمام عمریمی گر آغلاسام آز آغلاموشام
سنون غمونده هلاک اولماقیم روادی علی
تلاشون علّت اولوب اللریوی باغلاموشام
گورن دییر که بو بیر بسته پَر همادی علی
نه تک بو چولده منیم پرپر ایتدیلر گولومی
بو عرصه ده منه لیلاده هم صدادی علی
نفسلرون آناوی یاندیرار یاخار اود تک
نه نفخه دی، نه دمِ صبح، نه صبادی علی
بلا ولائیله همرهدی من اوزوم بولورم
رباب رسم و رهِ عشقه آشنادی علی
عزیز آقامدا شهید اولدی، سنده اوخلاندون
منه مدینه داخی شهرِ غم فزادی علی
دوباره من نه امیدیله یثربه گیدرم
منه او یر نه وطن دی نه کربلادی علی
بو قانلی گلشنی عمرومجه ایلرم مسکن
ترانه بوردا منه ناله و نوادی علی
یارالی جسمون اولوب اودلی سینمه زینت
نه یاخشی گُلدی بو گلشن نه باصفادی علی
شکایت ایلمرم اجریمی ایدم ضایع
قضای حقّه آنان قلبیدن رضادی علی
نه لایلایدی ذکریم، نه باشیوه دولانوم
نه اوخ یاراسینا قربان نه آه و وادی علی
گجه گونوز دییرم وای سوسوز ئولن بالا وای
بو ئولماقا بیله بیر اوخشماق بجادی علی
بو قصدیله هامی عمرومجه آغلارام یانّام
وفالی لر دیمسونلر که بی وفادی علی
اوغول بو تیرِ سه پر، بو لطیف گل بوغازون
تمام عمر منه مایهء عزادی علی
یارالی جسمیوی عمّن ویرنده گوردوم اوزوم
بو اوخ یاراسی دگل، ذبحِ مطلقادی علی
گوروم سنِیدی کمانی او قانلی صیّادین
گورِیدی کاش بو صیدی نه دلربادی علی
صغیر بیر اوشاقی کیم ایدر خدنگه هدف؟
نه اوخ یاراسیدی بو یا نه ماجرادی علی
شکاره رسمیدی صحراده اوخ آتار صیّاد
بلی او صیده که قهرا" گریز پادی علی
بو سنگدل سنه هانسی مجوّزیله آتیب
بو قان توکن بیر اوخی، بو عمل خطادی علی
سولان جمالیوه باخسِیدی گر بو اؤچی سنون
گورردی صید اوزی صیّادِ دلربادی علی
خمار گوزلریوه گوزلری ساتاشسیدی
بولردی سوزِ عطش مرگیوه سزادی علی
باخیدی کاش گوریدی الینده کی آقامین
رباب نوگلی، نه آهوی ختادی علی
یخار گوزوم یاشی کاخِ جفای صیّادی
نوای نالهء مظلوم چوخ رسادی علی
اگر بو سینیه صود گلسه نیلرم بیر گون
نه سرنوشتیدی بو، یا نه ابتلادی علی
نولور بو (خوندله) بیر اولسا مرحمتِ نظرون
اونوندا قلبی بوغازون کیمی یارادی علی.
التماس دعای فرج
https://telegram.me/ganjine5