https://t.me/joinchat/AAAAAEDVqf34w41I6pjKrg#کانال_اشعار_مرحوم_حقیر_خوئی#حضرت_رقیه_س ✍قالوب خرابه ی شاماتیده بنات علی
شکسته نی کیمی گلدی نوایه آل علی
یاتوب گل اوزلی اوشاقلار هامی قوری یرده
بلالی زینبی مطلق گتوردولر درده
چوخ آه و زار ائلیوب بیر گجه رقیه ی زار
یاتوب گوروب آتاسین خوابدن اولوب بیدار
اویاندی چون یوخودان اضطراب وحشتیله
باخوب اویان بویانا منتهای حسرتیله
یاپیشدی دامن زینبدن عرض ائدوب عمه
بابام خرابیه گلدی نه تئز گئدوب عمه
کسوب سبب ندی تئز التفاتینی مندن
علاج ائله بابامی ایمدی ایستورم سندن
نقدر وئردی تسلی رقیه ی زاره
که بلکه ساکت اولا گوردی اولموری چاره
گلوب او دم اورگی درده باشلیوب ناله
یتیشدی نوبت شیون صغیر اطفاله
رقیه شمع عزا دوره سینده اهل حرم
قوروب او محفل ماتمده حلقه ی ماتم
خرابه گوشه سینی ائتدیلر عزاخانه
اسیرلر هره بیر یاندا گلدی افغانه
بیری دیردی اوغول ای شبیه پیغمبر
آنان نه گونلره سنسیز قالوب علی اکبر
بیری دیردی طویی یاس اولان جوانیم اوغول
مراده یتمین عالمده مهربانیم اوغول
گلنده سوز دلیله سکینه فریاده
ائدردی پرده ده ناله عروس داماده
گل ای ائدن منی درده دچار عم اوغلوم وای
گجه گونوز ائدرم آه و زار عم اوغلوم وای
دیردی شوریله کلثوم ، ای رشید عباس
خرابه ده آنالار کیمی دوتموشام سنه یاس
گلوب خرابه ده بیر منزل و مکانیمه باخ
سالوب نه حاله منی گور فلک گوزوندن ایراخ
کیمی اوغول کیمی قارداش دیوب سیزیلداردی
سالوب خیاله هره اؤز عزیزین آغلاردی
خرابه دن اوجالوب ناله گوگلره دایانیب
او خواب غفلتیله خوابدن یزید اویانوب
دئدی نه سسدی منی ائتدی نصف شب بدخواب
او سست خواب غروره وئریلدی بیله جواب
عزیز فاطمه نین اوچ یاشیندا بیر قیزی وار
گوروب آتاسینی رؤیاده آغلوری او نزار
قویور نه عمه لرین نه اؤزی دوتور آرام
او طفل آغلادور اولاد مصطفانی تمام
گئدون ائدون دئدی آرام او طفل معصومی
خرابیه آپارون رأس شاه مظلومی
فغان او وقت خانم زینبه ویریلدی خبر
گلور خرابیه راس شهید تشنه جگر
دیدی رقیه دیوللر شه حجاز گلور
ایاقه دور آتاوی ایله پیشواز گلور
دوروب ایاقه یریندن قاچوب صول و صاقه
خرابه نین قاپوسیندا دوشنده تپراقه
دیدی که ایمدی ایده بولمرم ایدم اعزاز
ایاقی آتدا ایدیم قوی یوزیمی پای انداز
کسلّه رسمدی قربان عزیز مهمانه
گلور منیمده گمانیم بو ناتوان جانه
بسان سایه سالوب عکس گوزیاشی اوسته
گوزون آچاندا گوروب گون گلوب باشی اوسته
ایدوب خرابه نی روشن سر امام شهید
طلوع ایدوب گجه وقتی خرابه ده خورشید
جمالی طشت طلا ایچره آفتاب کیمی
یوزونی قان بورویوب سرخی سحاب کیمی
خرابه دن اوجالور دمبدم فلک لره نور
اولوب او نوریله ویرانه رشک وادی طور
تجلی ایتدی پس پرده دن جمال الله
مقام بهتده محو جمالی آل الله
عیالینین یوزونه بیر به بیر نظر سالدی
او قانلی گوزلری اما رقیه ده قالدی
آتا محبتی گلدی رقیه ده جوشه
باسوب او قانلی باشی حسرتیله آغوشه
یوزون قویوب یوزونه گیتدی سینه سینده تاب
یخلدی دوردی گلوب نالیه بسان رباب
دیدی بابا نیه بس ایتموسن یوزومه نظر
بیله گلور آتالار گورماقا عیالی مگر
سنون جمالیوا مدتدی قالمیشام حسرت
دوشوب اله نچه مدتده بیر بیله ساعت
بو قدر بول گَله لی شامه گولمیوبدی یوزوم
خرابه ده گجه گوندوز قالوب یولوندا گوزوم
یتن زماندا ولی دامن وصالون اله
صاقا صولا باخورام قورخورام که شمر گله
اگر گله گوره شرم ایلمز یانوندا وورار
یوزومه بسکه ووروب سیلی ایمدیده یری وار
دیمزدی الماقوی بس ندن بی بیم زینب
بو نوع گلماقی نیلوردوم ای امیر عرب
باشوی هانسی ستمگر بدندن ائتدی جدا
من صغیر و یتیمه بو ظلمی بولدی روا
بویور محاسنوی قانیله کیم ائتدی خضاب
جواب وئر منه منده سؤاله قالمادی تاب
بو شامده بولوسن من چکن مصیبتی سن
منِ یتیمی گوزوندن کنار ایلموسن
همان سکینه که جان تک اؤزون دوتادون عزیز
عزیزه دین آدینا شامیده دیولدی کنیز
ز بس سنی گتوروب تنگه طعنه ی اغیار
اماندی هر یره گتسن منی یانونجا آپار
مکدّر اولماسا گر خاطرون سوزوم چوخدور
ولی اوزونده بولورسن دئماقلیق آرتوقدور
دئدوقجا دردینی دردی اورکده ایلدی جوش
او قدر آغلادی دلدن دوشوب اولوب خاموش
دوداقینه یتشوب جان گره لنوب نفسی
زلال شهد وصال ایچماقا اولوب هوسی
آتا بالا هر ایکیسی دوداق دوداقه قویوب
گورنده جان کیمی شیرین او قدر اَموب که دویوب
مریض عشقه لب لعلی تازه جان وئردی
آتا باشی بالانین سینه سینده جان وئردی
«
حقیر» سن یازانی اشگ دیده ایلدی مهو
سوزون ایتورمه دوباره یازاندا اولمیا سهو
#حقیر_خویی❗لطفا با ذکر منبع فوروارد کنید
❗https://t.me/joinchat/AAAAAEDVqf34w41I6pjKrg