ЁТОҚХОНА ТАЛАБАСИ ЕРДАН ЧИҚҚАН ҚЎЗИҚОРИНМИ?! Ўзбекистон давлат жаҳон тиллари университети энг кўп танқидга учраётган олийгоҳлардан бўлади. Бир қарасанг, талаба норози, бир қарасанг ўқитувчи. Уларнинг бари ҳам раҳбариятинг қилаётган ишларига эътироз билдиришади. Ўринли ва асосли деб ҳисобланган мурожаатлар “Элтуз” да доим чоп этиб борилган. Бугунги мурожаат ҳам шулар жумласидан. “Ривожланган давлат тажрибасида талаба турар жой билан таъминланади. Табиийки, ётоқхона тўловлари ҳам арзонроқ бўлади. Бу табиий бир жараён экан, нима учун ётоқхона талабасига ердан чиққан қўзиқориндай муомала қилинади? Мен Ўзбекистон жаҳон тиллари университетида 2-ётоқхонада тураман. Бу йилдан ётоқхонадаги ҳар бир хона тенг баробарига кўпайтирилган. 3 киши учун мўлжалланган каталакдай хонада 6 киши туради. 2 кишилик хонада эса 4 киши яшайди. Тўлов пулини сентябрдан қилмасак, эшикдан киритишмайди. Лекин ҳар куни эрталаб бизга биз “арзон жойда” турганимизни бот-бот таъкидлашади. Хоҳлаган вақтида кириб текширув ўтказишади. Эгаси борми-йўқми сўраб ўтирмай, шкафимиз тинтув қилинади. Қандайдир қоғозбозлиги сабаб ҳатто жараённи битталаб расмга олишади. Aгар киришни истаган хоналар қулф бўлса, бошқа калитлар билан очиб киришади. Яна ҳар куни хоҳлаган одам текшириб кўргиси келиб қолади. Келганларни кимлигиниям билмаймиз, лекин ҳаммаси ейдиган овқатимиз, шкафимиз-у, столимизнинг усти, ётоқхонада кийиб турган кийимимиз, керак бўлса, ҳатто ички кийим ва гигиена воситаларимизгача хўжайинлик қилиб текширишади. Ётоқхонада турган талабанинг шахсий чегараси йўқми? Бу ҳам камдек, янги ҳунар ўйлаб топишибди. Соат 12 дан чироқлар ва розеткалар узиб қўйиляпти. Ахир барчамиз ҳам кундузи ўқиб, тушдан кечгача ишлаймиз. Ётоқхонага келиб, кечки овқат тайёрлаб, овқатланиб бўлибгина дарс қиламиз. Кимдир курсларга қатнайди. Ундан дарс қилиш керак. Кимдир ишхонасида улгурмаган ишини тугатиш истагида бўлади. Яна кимдир диплом ишини ёзишга тушади. Ёки ҳеч бўлмаса, уйқудан олдин 5-10 бет китоб ўқий деди. Чироқ ва розеткани ўчириб қўйиб нимага эришишмоқчи? Энергияни тежаш кераклигини биламиз. Аммо Президентимиз ёшлар шамчироқларда дарс қилиб эртанги келажагимизни яратсин демагандир!? 💬Telegram |📱Facebook | 🐦Twitter |📱Instagram | ▶️YouTube