وگفت على صوت عركه كلش چبيره اقل شي يروح بيها اثنين ثلاثه ولسبب تافه ! انه صاحب السياره موگفها اباب مطعم والصناع بأمر صاحب المطعم گالوله وخر السياره منا احنا عل باب الله ! حچايه منا حچايه منا صار المهادد ! ابو السياره يگله والله لو تروح هاي مااوخر هاي يقصد رگبته ! واتفقو الطرفين انه واحد يروح للنجف وواحد يروح للسجن !من بين هاي الهوسه وصراخ الفريقين اجه واحد يفوج بين الناس عيونه مخنزره اشو وخر وينه وينه ويقصد صاحب السياره ! انت صاحب السياره ؟ نعم اني ليش؟ ليش ماتوخر السياره ؟ گلتلهم عندي ضيف جايني شويه واوخر السياره اشو گامو يصيحون ! رد عليه الرجل گاله السياره هنا اخليها وأشر على هامته وانت وضيفك عشاكم واصل واحنا الممنونين يخوي تصير هاي الشغلات ! صاحب السياره دنگ بخجل وگال راح اروح اطلع السياره ! گاله ابد والحسين متر واحد ماتتحرك ! وانسحبو الواگفين والفزاعه والمهاجمين وختمها الرجل الي ماله علاقه لا بأبو المطعم ولا بأبو السياره بعبارة يخوي تصير هاي الشغلات