مولاتنا خديجة الكبرى(ع)

#محاورة #حول #عالم #القبر

بعض الاخوة والاخوات الكرام طلبوا مني أتكلم عن الموت بلهجه مبسطه وباللغه العاميه حتى تصير المعلومات مفهومه وطبعا كلامي كله مقتبس من روايات أهل البيت(عليهم السلام)

🤔شيخنا هم اكو فرق بين (ذكر الموت) (تمني الموت)(الاستعداد للموت)

طبعا اكو فرق👈 الي يذكر الموت هذا شي حلو وايجابي واله اجر والي يتمنى الموت هذا شي مو زين وسلبي ومرفوض والي يستعد للموت هذا شي راقي لان اذا واحدنه استعد للموت يعني معناها مؤدي الواجبات ومنتهي عن المحرمات ومسيطر على نفسه

#سكرة #الموت

معناه الانسان يمر بمرحلة صعبة شويه شويه ينتزع ملك الموت روحه من جسمه و بهاي المرحله الميت اذا شدد علي ملك الموت فهذا كفارة لذنوبه الي عمله بالدنيا
قول الله تعالى: ﴿وَجَاءتْ سَكْرَةُ الْمَوْتِ بِالْحَقِّ ذَلِكَ مَا كُنتَ مِنْهُ تَحِيدُ*﴾

واكو اعمال اذا سواها الانسان راح تخفف عنه سكرات الموت

١- صلة الرحم: 🤝
عن الإمام الصادق (عليه السلام) أنَّه قال: "مَن أحبَّ أن يخفِّف الله عزَّ وجلَّ عنه سكرات الموت فليكن لقرابته وَصولاً، وبوالديه بارّاً، فإذا كان كذلك هوَّن الله عليه سكرات الموت ولم يصبه في حياته فقرٌ أبدا ١)

٢-كسوة المؤمن: 👚
عن الإمام الصادق (عليه السلام)مَن كسا أخاه كسوة شتاء أو صيف كان حقَّاً على الله أن يكسوه من ثياب الجنّة، وأن يهوّن عليه سكرات الموت وأن يوسع عليه في قبره ٢)

شيخنا الميت شنو يشوف بالقبر اول ليلة وبعده
قال تعالى ﴿وَمِن وَرَائِهِم بَرْزَخٌ إِلَى يَوْمِ يُبْعَثُونَ٣﴾

الميت اذا نزل بالقبر راح يحس بوحشه وبغربه وهي اللية الي نسميها (ليلة الوحشه) عن أبي سعيد، عن أبي عبدالله (عليه السلام) قال: إذا دخل المؤمن قبره كانت الصلاة عن يمينه والزكاة عن يساره والبر يطل عليه ويتنحى الصبر ناحية وإذا دخل عليه الملكان اللذان يليان مسائلته قال الصبر للصلاة والزكاة: دونكما صاحبكم فإن عجزتم عنه فأنا دونه٤)
فشوف شكد هاي الاعمال والعبادات اله اثر بالقبر فلازم ادير بالك وتهتم بصلاتك وتوالي اهل البيت وتمشي على نهجهم وبنفس الوقت اذا ماتلك شخص قريب او صديق لصليله صلاة الوحشه لان تنفعه بالقبر

وطبعا اكو ملكين اسمهم منكر ونكير هذولي شغلهم فقط يسالون الميت عن دينه وعن ربه ونبيه وامامه وبحسب روايات اهل البيت هذا الشي يسقط عن المؤمن في وادي السلام يعني ماكو مسائلة ولا عذاب قبر

😭شيخنا هم نتعذب بالقبر لو لا
روي عن الإمام الصادق (عليه السلام )ولكنِّي والله أتخوَّف عليكم من البرزخ، قلت: وما البرزخ؟ قال: القبر منذ حين موته إلى يوم القيامة٥)

القبر هو مثل التوقيف لفترة محددة واكيد بي عذاب واكو شي اسمه ضغطة القبر وهاي تشمل المؤمن والكافر وخلي اضربلك مثال

فضغطة القبر تُصيب المؤمن وُتصيب الكافر، أما المؤمن فهي كفارة لما كان منه من تضييع النعم، فتضييع النعم والتبذير والبذخ من أسوأ الذنوب، عندما تُعطى الخير فتصرفه في غير مصرفه، وتضعه في غير موضعه، فذلك من التضييع للنعم، وهكذا فإنَّ هناك نعمٌ أخرى يُعطاها الإنسان إلا أنَّه يُضيَّعها، فهو يُعطى العلم مثلاً فلا يؤدي حقَّه، ويعطى القوة فلا يستثمرها في مرضاة الله، ويعطى العمر المديد فيقضيه في العبث واللهو، ويُعطى العقل فلا يزن به الأمور، بل تراه ينساق وراء مشاعره وعواطفه، كلُّ ذلك يحاسب عليه الإنسان، ويكون منشأُ عذابه هو تضييعه لتلك الامور.

وراح اعدد بعض الأمور الي هي توجب عذاب القبر فلازم نجنبه

1️⃣-النميمة:وهي معناها مثلا واحد يروح على فلان من الناس يكله تره فلان حجه عليك فيحرضه وراح تصير مشاكل بينهم

2️⃣-سوء الخلق يعني هذا فد واحد اخلاقه مو زينه وي الناس وي اهله وي زوجته وي اطفاله تشوفه النهار كله الناس ضايجه منه

3️⃣-الاستخفاف بالنجاسة:يعني هذا ما يتطهر من النجاسات ولا يعتني بن
بنفسه ولا يريد يتعلم فتشوفه على طول مو نظيف ولا تحرز النجاسة

4️⃣-الغيبة:والغيبه معروفه عندك ميحتاج اوضحه يعني هذا الشخص الي يحجي على فلان امام الناس ويظهر عيوبه كدامهم وهو غايب عنهم

5️⃣-عدم تمام الركوع والصلاة:هاي اكو بعض المصلين يريد بس يخلص صلاته ويخلص منه شلون ما جان يصلي لا يركع عدل ولا يسجد زين يعني ما يتم صلاته بالصوره الصحيحه

طبعا ما اريد أطول بالكلام لان الكلام هواي عن القبر وعالم البرزخ بس هاي نبذه يسيرة وحتى نذكر الموت وندير بالنه ونستعد ونتعظ لان هاي الدنيا خلصانه ما تسوه واحد يضل يلعب ويركض وتالي كلشي ما يستفاد

طبعا راح امتع انظاركم برواية راح تخلينه نفرح وبنفس الوقت نبجي ونتذكر موتانا سال رجل الامام الصادق (عليه السلام) عن وادي السلام فقال له وأين وادي السلام ؟ قال:ظهر الكوفة أما إني كأني بهم حلق حلق قعود يتحدثون\ يعني الامام يقول الموتى يقعدون ويتحدثون وقال امير المؤمنين علي (عليه السلام): للاصبغ يا ابن نباته لو كشف لكم لألفيتم أرواح المؤمنين في هذه حلقا حلقا يتزاورن ويتحدثون ٦)

#محاورة #فقهية #مبسطة

(س)شيخنا اني اطلب واحد فلوس وما يقبل ينطيهن الي معاند فيصير اني اخذ منه فلوس او حاجه أخرى بدون علمه

(ج)هو اذا متعمد ما يقبل ينطيك فلوسك أي بهيج حاله اخذ منه بدون علمه بس اذا يأملك وما ناكرهن يكلك فبهيج حاله ميصير تأخذ أي شي منه حرام

(س)شيخنا بعض الأحيان نروح خطار ونوبات بالفنادق هم 👈 التواليت والحمام مشترك فيصير اتوضه لو لا

(ج)أي توضا كل اشكال ماكو

(س)شيخنا بلا زحمه اني تقدملي شاب وصار بينه عقد شرعي وكالي راح ارتب وضعي ونتزوج ويوم من الأيام كال اني بطلت اريد اطلك فاني هس شنو يحقلي من المهر

(ج)اذا بس عقد بينكم فلازم يعطيكم نصف المهر الحاضر والغايب مثلا المقدم ٥ ملايين والمؤخر هم ٥ ملايين فهنا واجب علي يسلمج (٥) ملايين وهذا حقج الشرعي

(س)شيخنا اني بالصلاة من واكف اقرا سورة الحمد اصف رجلي يعني وحده بصف الأخرى اخليهن فهذا يصير لا

(ج)على نحو الاستحباب تخلي مجال بين رجليك بمقدار ٣ اصابع مفرجات او مقدار شبر وهذا شي مستحب مو واجب

(س)شيخنا اني كنت اروح للزياره للنجف وكربلاء واني اعرف لازم اصلي قصر بس جنت اصلي تمام

(ج)واجب عليك تعيد الصلاة قصر يعني هي الان بذمتك قصر فلازم تقضيها ؟ اي نعم لو شخص مجان يعرف القصر فهنا ما علي شي وميحتاج يعيد صلاته لان جاهل باصل الحكم

~~~~~~~~~~~
ملاحظة نتكلم بهذه اللغة العامية حتى تتضح المسائل بشكل طبيعي والكل يفهمها