بصينا حوالينا هنشوفها، أنا مش عايزة أطول كثير في الشرح لأن علامات الساعة الصغرى كثير، زأنا لو استفضت وجبت أمثلة مش هنخلص😅 20◇العلامة العشرين: نَشْواً أو نشئاً يتخذون القرآن مزامير يعني ناس بدل ما يقرأوا القرآن للتدبر بقوا يتغنوا بيه بالألحان زي المزمار، وده منتشر جدا دلوقتي والقراء بيتعلموا المقامات عشان يقرأوا بيها القرآن، أيوة مطلوب مننا تحسين الصوت لكن مش معنى تحسين الصوت القراءة بالألحان، فالمذموم هنا إللي بيتغنى وبيخرج الحرف عن وضعه ويزيد وينقص عشان يتوافق مع اللحن، وممكن الناس ساعتها تقدم الشخص إللي بيتغنى ده حتى وإن كان أقلهم فقها، لأن غرضهم الوحيد إنهم يستمتعوا بالألحان دي👌 فلازم نفرق بين تحسين القراءة وتجميل الصوت والخشوع والحزن وبين إن الإنسان يشابه في قراءته أهل الفسق والأغاني💁‍♂️ 21◇العلامة الحادية والعشرين : كثرة الشُّرَط ودول أعوان الوُلاة، لما الحاكم يبقى سفيه وبيكذب ويظلم ويقتل طبيعي إنه يكون له شرطة تساعده على ظلمه، والشرط دول قال عنهم رسول الله ﷺ: " يخرج رجالٌ من هذه الأمة في آخر الزمان معهم سِياط، كأنها أذناب البقر، يغدون في سخط الله، ويروحون في غضبه" وكلمة شُرط يعني علامة، فاسمهم شُرط لأنهم ميزوا نفسهم بعلامات يتعرفوا بها بين الناس، فربنا توعد الناس إللي بيتسلطوا على المسلمين دول بغير حق بالنار، قال رسول الله ﷺ: "صِنْفَانِ مِنْ أَهْلِ النَّارِ لَمْ أَرَهُمَا : قَوْمٌ مَعَهُمْ سِيَاطٌ كَأَذْنَابِ الْبَقَرِ يَضْرِبُونَ بِهَا النَّاسَ ، وَنِسَاءٌ كَاسِيَاتٌ عَارِيَاتٌ ، مُمِيلاَتٌ مَائِلاَتٌ ، رُءُوسُهُنَّ كَأَسْنِمَةِ الْبُخْتِ الْمَائِلَةِ ، لاَ يَدْخُلْنَ الْجَنَّةَ وَلاَ يَجِدْنَ رِيحَهَا ، وَإِنَّ رِيحَهَا لَيُوجَدُ مِنْ مَسِيرَةِ كَذَا وَكَذَا " وده هياخدنا للعلامة الثانية والعشرين وهي: 22◇ظهور النساء الكاسيات العاريات👌 ومعنى الكاسيات العاريات إن النساء دول لابسين ملابس لكنها ضيقة ومفصلة لأجسادهن فكأنها عارية أو لابسين ملابس خفيفة رقيقة مبينة لأجسامهن والجديد في عصرنا بقى وشايفينه إن النساء بتلبس المقطع ومبينة جسمها🙂 والله أعلم بعدين هيبقى الوضع بعد كم سنة هيبقى عامل إزاي😓 وبما إن النساء بقوا كاسيات عاريات وبيمشوا في الشوارع بالمنظر ده والرجال بيشوفوهم واحنا اتكلمنا قبل كده عن تأثير النساء على الرجال، فالنتيجة الطبيعية لكده انتشار الزنا، ودي العلامة الثالثة والعشرون، 23◇انتشار الزنا من العلامات إللي ظهرت بطريقة مرعبة في الفترة الأخيرة، وبقى في مجاهرة بالعلاقات المحرمة إللي المفروض إنها حصلت في السر حتى على مواقع التواصل الاجتماعي والموضوع للأسف بقى عادي جدا عند الناس إلا من رحم الله، عارفين، الزنا هينتشر وسط الناس لحد ما يوصلوا إنهم يستحلوه، قال رسول الله ﷺ: "ليكونن من أمتي أقوام يستحلُّون الحِرَ والحرير والخمر والمعازف" والحِرَ يعني الزنا، ولو أخدتم بالكم في زماننا دلوقتي الشاب له صاحبة والبنت لها صاحب إلا من رحم الله، وبيتفاخروا ويعلنوا ده وسط الناس وتخرج مع صاحبها عادي ويعملوا قصاد الناس ما يفعل الرجل مع زوجته في خلوتهم، مع إن زمان كنا نادرا لما نشوف بنت ماشية مع شاب، وبتبقى مكسوفة وحاسة إنها بتعمل حاجة غلط، لكن دلوقتي الآية اتعكست وبقى الطبيعي إن البنات يكون لهن أصحاب شباب، تخيلوا بقى إن هييجي يوم الرجل هيزني بالمرأة في الشارع كده علنا عادي ومحدش هيكلمه، وهيكون أحسن واحد ساعتها هو إللي هيقول له : لو إنك تزني بيها وراء الجدار أحسن! متخيلين إنه مش بينكر الزنا، ده بيقول له ازني بس روح وراء الجدار مش في وسط الشارع، وده كلام رسول الله ﷺ، قال: " والذي نفسي بيده لا تفنى هذه الأمة حتى يقوم الرجل إلى المرأة فيفترشها في الطريق فيكون خيارهم يومئذ من يقول لو وَاريتها وراء هذا الحائط" أنا شخصيا لما كنت بسمع الحديث ده زمان كنت بستغرب إزاي ممكن الحال يوصل للدرجة دي، لحد ما شفت الحال إللي وصلنا له وكل ده كان بالتدريج، قلت لكم قبل كده في قصص الأنبياء لو تفتكروا إن الشيطان مش بيزهق، هو بيحط البذرة ويفضل يرعاها ومعندوش مشكلة إنه يحصد الزرع بتاعه في الجيل إللي بعده👌 ربنا يعافينا وما يجعلنا نحن ولا ذرياتنا بذرة أو حصاد😞 24◇العلامة الرابعة والعشرون : انتشار المعازف والقِينات، الموسيقى حرام لا يجوز الاستماع لها، لكن من علامات الساعة انتشار الموسيقى وآلاتها، والقينات يعني المغنيات واحنا شايفين إنتشار المغنيات مش بس في التليفزيون ده على اليوتيوب ومواقع التواصل الاجتماعي، والناس مش بس هتسمع الموسيقى لأ ده هيستحلوها أو خلونا نقول إنهم استحلوها بالفعل، في زماننا دلوقتي ناس كتير للأسف بتستحل الموسيقى، وبيسموها غذاء الروح، ولو حاولنا ننكر ونبين الصح يقولوا إننا بنحرم الحلال، ومش عارفين إنهم هم إللي بيستحلوا الحرام👌