#قصائد_وفاة_ام_البنين 🏴هاي ام البطل بالشدات ينخووها🏴 ــــــــــــــــــــــــــــــــــــــــــــــــــــــــ مولاتي ام البنين ع چنت انتظر تجيني .. اتأخرتي يالمنيه ريتچ اخذتي روحي .. ويه الگمر سويه ما ظل بعد امان مفجوعة من زمان """""""" اتاني يالمنية اهواي بقيت اسنين منتظره اجيتي هسه بس بعديش وصلتي اهواي متأخره تراني ميتة مو مرة مذبوحة الف مره ميتة امن اسمعت عباس لا يمنه ولا يسره مات الگمر يگولون ذبحتني هالفجيعه يا وسفه لابني چفين طاحن على الشريعه بگلبي خله المكان مفجوعة من زمان """"""""" اطلعت من الجسد روحي وما ظلت بعد انفاس حين الناعي خبرني طاح اعله الوجه عباس احس ذاك الوكت ميتة بس اليجرح الاحساس گالولي انغدر ابنچ ضربوه بالعمد عالراس راس الگمر تهشم گالولي دمه سايل وانه بدمع انادي ارجعلي يابو فاضل من راح ابو الحنان مفجوعة من زمان """"""""" من راح الگمر عني وبعد ما رد إلي سالم چان المفترض ميتة سويه وي گمر هاشم چنت منتظرته يرجع اثاريه عالترب نايم ومن صاب السهم عينه اموت اوياه صحت لازم من عدهه يالمنية ما بطلت ونيني سهم اللي طفّه عينه صوبلي ريته عيني فات ومشه الاوان مفجوعة من زمان """"""" اعيشن يالمنية اشلون والغالي گطع بيه فوگ الگمر فگد حسين خله ضلوعي محنيه مات حسين گالولي حبيبچ ما إله جيه لان طعنات البجسمه بالالف وتسعميه شيباته وي لحيته متخضبة بدمائه وگطعوله خنصر ايده وسلبوله هم ردائه كلشي اليه چان مفجوعة من زمان """"""""" خبر جابولي عن زينب الاميرة حالهه اتبدل بين الخيل والدخان تدور اخوتهه ما تندل ظلت تركض وتنحب بين المشرعة والتل متت من گالوا الحرة مچتوفة على الهزل ريت اخلصت حياتي من گالوا الاميره حطوا حبل بديهه وبين الغرب اسيره اتمنه موتي حان مفجوعة من زمان """"""""" اجيتي يالمنية ابيوم وحدي وشدتي شده تمنيت الگمر يمي بس حيف ابني شيرده نفرض ابني لو يمي وعن گبري اذا نشده يحفر گبري بلله شلون وهو چفوف ما عنده ام البنين اظل ليش باخر نفس وحيده وعن كربله وبنيني ليش اندفن بعيده يا وحشة المكان مفجوعة من زمان انيس الخفاجي الكربلائي