الشاعر علي محسن الفرطوسي

أسمع تونين . من ونتج گلبي انكسر
اسمع تونين
يمنه الحنينه . يمنه الحنينه

***
شلون حبها أنوِصفه أمنه كلها عاطفه
الغاليه هاي
بشيلة أمي البخت روحي بيها اتعلگت
وكت العطش ماي

جلمة اليمه شكثر منها حنينه
المايشوف امه صدك معميه عينه
الصبر من عدها احنه تعلمينه

ياأم الحسين يمج أصيح بعبرتي
ياأم الحسين
يمنه الحنينه . يمنه الحنينه

***
أنتي يل كلج حنان جفوفج التمطر أمان
يمه يمه
ونتج اتفسر الصخر يمه دلالي انفطر
والدنيه ضلمه

گمت أخاف أمن اليتم بسلا تروحين
الدنيا ماترحم أبد ياأم الحسين
يمه حاجيني گبل لاتغمض العين

هذا الولد هذا مكسور يم أمه يون
هذا الولد هذا
يمنه الحنينه . يمنه الحنينه

***

كاسر جناحي الهظم خوفي منج انحرم
وجهج إذا غاب
عيني تنبلعج نهر كلشي ولا هذا الخبر
ايغطيج الاتراب

كون أموت اوياج يل كلج محنه
يمه تكتل ونتج يابعد اهلنه
ليش منج ننحرم واحنه بصغرنه

يابعد العيون تسوين عمري ودنيتي
يابعد العيون
يمنه الحنينه . يمنه الحنينه

***

بعطر جفج دنيتي أمن الصغر كل راحتي
امن أسمع دلل لول
هسه اني أو دمعتي اليتم موت ضحكتي
وثگال الاحمول

جثه سوتني المناحه بوكت موتج
البيت چنه المقبره المابيه صوتج
لاتخليني صحت يمه امروتج

فتحيها العيون غمضتي والدنيا انعمت
فتحيها العيون
يمنه الحنينه . يمنه الحنينه

***

والله حيره حيرتي من أضل بغربتي
باجر بالطفوف
سولفيتيلي شكثر عن حرگ خيمه ونحر
وعن نهر وجفوف

يمه باجر موضلع تتكسر ضهور
الخيل تسحگني واضل عالغبره منحور
يمه اطشر أشلاء بظهر عاشور

باجر غربتي بطف كربله نشوف العجب
باجر غربتي
يمنه الحنينه . يمنه الحنينه

***

ياهو يحضر دفنتي يمه أضل بغربتي
وزينب غريبه
يمه من هسه استعد لطفهم اليذبح ولد
وياخذ سليبه

اليموت بديره غربه يريد العزاز
بكربلاء عاري ييمه وماكو جناز
لكل هلي واخواني بالطف باجر اعتاز

ياكثر الجروح تهدملي حيلي بكربلاء
ياكثر الجروح
يمنه الحنينه . يمنه الحنينه

***
علي محسن الفرطوسي

في مقعد صدقٍ عند مليكٍ مقتدر

يازينب يازينب يازينب يازينب
*

أفترگنه .. واليفارگ أهله عمره يعيشه مكسور
نهظمنه .. وإني اشوف اعله الرماح تميل النحور

ايفززني لو هب الهوه - بلكت عطر جاب
من جسم اخوي المنذبح - المتغطي بتراب

بطف المصايب كلشي راح - حته الحجر لمصابي ناح
زينب بعد ماتستراح - بيا عذاب
بكل خطوه نيشان الدموع - ماينجبر كسر الضلوع
شجم حافر تسحگه الجموع - اعله التراب

شجم ليل أضل مانايمه
عيوني لدربكم هايمه
جروحي بعد مالايمه - بغيابك

الدنيه اويه زينب مايله
أشكد مصايب شايله
طشت هذيج العايله .. بغيابك

بعذابي ... خلوني
بمصابي ... خلوني
يازينب يازينب يازينب يازينب

*

بقينه .. خويه بديار الغرب بعدك ولينه
بسبينه .. تره الماعنده ولي الله اليعينه

من المسه لحد المسه - دمعاتي بالعين
اصحه وابات اعله الدمع - يهلي يطيبين


بخدودي نهران وتصب - شجم حسره تعثر بالگلب
بسمك سواليف الدرب - أنته وين
شلونك يغافي اعله الرمح - ياغيمه وضعونك فلح
رويني من نحرك جرح - يالحنين

خليني أعيش جروحك
ماينشيع من نوحك
شد روحي خويه بروحك .. بچيني

يابو سوالف دافيه
عيني أبد ماغافيه
وياك اخذت العافيه .. بچيني

يگلبي ... لاتبرد
اعله تعبي .. لاتبرد
يازينب يازينب يازينب يازينب

*

بدينه .. احبال والحادي يمر بينه على السوگ
بچينه .. ومن بچينه اويانه تنحب گامت النوگ

اشلون البواتر غافيه - وزينب اسيره
بنت الحموله تنضرب - اربات العشيره

الماشايف الضلها بشر - راحت اسيره بهل السفر
بجفها الحبل تارك أثر - يامصاب
زينب يهل زينب مشت - للفرگه ناگتها حدت
الجانت اميره تغربت - ياعذاب

جفوف بحبل مچتوفه
أدخل غريبه الكوفه
ولا عافني ولا عوفه .. هالجرح

عشرتنه جانت حلوه
هاي النوايح تسوه
يحسين طحنه ابلوه .. هالجرح

غريبه .. اختكم
بمصيبه ..اختكم
يازينب يازينب يازينب يازينب

*

عطشنه .. الماي لو جابوه ألنه يجرح گلوب
بجرحنه .. الشوگ يكتل وإني اطرن ذيج الدروب

يطشرني جرحي اعله الحزن - وتلمني عبره
بعباس اشد حيلي البقه - وحجي اويه نحره

بالدمعه افك ريجي الصبح - وتفزعلي الدنيا بجرح
من الله لاينطي الذبح - والخيول
شيبت من هالجروح - عمري خلصته انوح
تالي من عدكم اروح - شرد اگول

شحجيلك اعله آلامي
محتاره خويه ايتامي
يانهر شفتك ضامي .. يبن أمي

يمسلبين اثيابك
هد حيلي هذا غيابك
بينه حده سلابك - يبن أمي

جروحي .. بغيابك
ينوحي .. بغيابك
يازينب يازينب يازينب يازينب

*
دمعتي .. تجري وسولف حزن وآلام المتون
بحسرتي .. ابني بيت أحزاني أو إركانه العيون

حزني عليكم ماگضه - ضل عايش وياي
بجفوفي اسد باب الفرح - ويلجمني الماي

ضعني نزح من كربلاء - بذاك الظهر مو بالخفاء
جسمك يضل ابهل العراء - ياغريب
لفني على جروحك دوه -يل جرحك يلجمه الهوه
شلون انذبح ذاك الضوه - شكد عجيب

قرآن اشوفك مو جسم
ترتل على روس الزلم
رغم التعب بس تبتسم .. ماتموت

ماي أنته ماشوفك عطش
خيرانته عالحومه نفرش
شي نعمه مالمك نعش .. ماتموت

حروفك .. مذبوحي
اشوفك .. مذبوحي
يازينب يازينب يازينب يازينب

*
علي محسن الفرطوسي

وفايه .. منطينك عهد
والرايه.. ماتنزل إبد

**

جينه نتوافد الك بعهودنه
نغلق البوب وتركنه بيوتنه

بأبِي أنْتَ اْو اُمِّي ونفسي وأموالي
انته ياأول ذبيح هوايه شاغل بالي
من طحت مو للأرض خلاك ربك عالي

ياأيه .. بالسجده وسِجد
والرايه.. ماتنزل إبد

**

يا تجاره منين ماجيلك ربح
يامُطر ومفيض بخيره الفِلح

واحد وسبعين بالطف نصرتك
بكد نجوم الليل هسه الگصدتك
جينه مشايه وتنومس رايتك

مشايه .. صرنه أكبر عدد
والرايه.. ماتنزل إبد

**

هالمواكب چنها بطفوفك خيم
تحترگ بالشوگ يحسين الخدم

عدنه ماي الموكب اغله أمن الذهب
من رحيق الجنه هنياله الشرب
الچاي بيه قُدسية لأسمك انتسب

بفيايه ... هنياله الگعد
والرايه.. ماتنزل إبد

**

الـ مشالك بيدك تعبره السراط
من سُليمان النبي وارث بساط

انته يا وارث جميع الأنبياء
انته إلي اتخدمك أملاك السماء
الدنيه ضلمه وإنزلك ربك ضياء

ويايه .. اشوفنك مدد
والرايه.. ماتنزل إبد

**

إذن آذان العشگ حان النشور
الف حجه والف عمره لليزور

اليزورك چنه عارج للسمه
ياخذ امراده وتبشره فاطمه
المايشوف الشمس بعيونه العمه

بدرايه .. هالكلمه وبعد
والرايه.. ماتنزل إبد

**

علي محسن الفرطوسي

"لستُ بن الرِّياحِي ، لڪنّي أرجُـو توبةً بيـن
يديك يَا مَولاي".