مؤسسة منبريون للشعراء

               حدد موقفك كدام ابو تراب
             كبال الباب توكف لو وره الباب
                        ___
             عندك عقل المن باقي محتار
              اصفه براي من تريد تختار
             ضلوعك تنكسر لو تشعل النار
              باجر بالقيامه حساب وكتاب
            كبال الباب توكف لو وره الباب
                        ____
            خلف الباب صير تصير انسان
            والكاسر ضلع كله انته شيطان
           شتختار القصر لو بيت الاحزان ؟
             ويامن حضرتك رايد جواب
            كبال الباب توكف لو وره الباب
                      ___
             بين الضلمه خيرتك والنجوم
             ضالم لو تريد تعيش مضلوم
              لتجامل ابد والضلع مهشوم
             غربيل الضلع والضلع ماطاب
           كبال الباب توكف لو وره الباب
                      ___
              اتريد الزهره ترضه ويه مولاك
                لاتترضه عَّليْ بجه الأملاك
                كله بوجه ماصير انه وياك

              لاتنكل حطب وتصير حطاب
             كبال الباب توكف لو وره الباب
                      ___
              لاتجمع حطب ويه اليجمعون
               انته اللي تحدد انته شتكون
               تلعن لو تعيش العمر ملعون
             لو صاحب عتب لو تحمل عتاب
             كبال الباب توكف لو وره الباب
                      ___
             عيش بوجه واحد وافتهم زين
               درهم لاتصير والك وجهين
             اختار فلان لو تختار ابو حسين
             لو صاحب صدك لو انته جذاب
              كبال الباب توكف لو وره الباب
                        ___
سيد معتز الحسيني

   مايموت الحي ضميره
                      والضلع تاج الاميره
                    فاطمه الخيمه الجبيره
                    بيها نتباها  ماتركناها
                        ______
      من عرفنه اربع اصابع  فاصل الباطل يصير
     ماسكتنه اعله الحقيقه صحنه بس حيدر امير
       احنه مختنكين متنه حته ميموت الضمير
       ثوره كل مجلس نحسبه واللطم موقف جبير
             
                 الدنيه من سكتت حجينه
                    فاطمه اكبر سفينه
                   وياها غمضنه ومشينه
                    وماسألنها  ماتركناها
                        _____
       بكل حرب هاي المجالس للنصر شفناها باب
          والوفي ميضم ونينه حتلو ضمه التراب
       الضلع من حشم رجاله فزعت بدمها الشباب
        ولان ويانه الزجيه تنمحي جيوش الضباب
                  فاطمه بمجلس عزانه
                     ادعي للثوار امانه
                     محد اينزل  لوانه
                 كلمه كلناها  ماتركناها
                    _____
      من الضلع ثوار طلعت الزهره مدرسة الوفاء
       وابو فاضل سل ضلعها يوم طب لكربلاء
          اليساوم عالعقيده  لايجي لهذا العزاء
        ولايسمي نفسه شيعي المايضحي بالدماء
                   نقسم بضلع الوديعه
                  شيعه احنه ونبقه شيعه
                     دين حيدر مانبيعه
                   بدم كتبناها ماتركناها
                        _____
         فاطمه اول شهيده وضحت دور الشهيد
         وره الباب نريد نوكف كباله مانوكف اكيد
         قاده صرنه بيوم صحنه احنه للزهره عبيد
         الضلع( لاء حسين) ندري الهدمت دولة يزيد
                    زغار وبفاطم كبرنه
                   واللطم وسم صدرنه
                    الها ضحينه بعمرنه
                  واشتريناها ماتركناها
                        _____
          الماتو بدرب الولايه ذوله أسياد الزمان
        ومحسن الزهراء صوته  يدوي صار بكل مكان
           فاطمه خيمة امان بدنيا مابيها امان
         مثل حضن الام عزاها ايوزع اعلينه الحنان
  
                  ماننام اعله الوساده
                   احنه عشاك الشهاده
                    النضر للمنبر عباده
                  وافتهمناها ماتركناها
                       _____
          باب فاطم علمتنه عالضلم لازم نثور
         للعدل والمات نرهم مثل عودان البخور
       بالمجالس دوم ندعي لبو صالح بالضهور
        يمته يبني مرقد امه وحمله ياخذنه نزور
                جم كلب طال انتضاره
                  الزهره ماعدها مناره
                المهدي ياخذ يمته ثاره
                شكد حجيناها ماتركناها
                    _____
سيد معتز الحسيني

             لاتسلم  والسلام وياي اگطعه
           مااسامح  والعذر ماريد اسمعه
          مااصدلك  لو تصير بليلي شمعه
                        —-————-
         لاهله بجيتك يشايل طبع شيطان
        شوفتك تخنك واحسها چنها دخان
         وياك ماغزر ملحنه ليش يفلان !
       العذر من الفعل اقبح بعض الأحيان
           مااعذرك  والوجه عنك اديره
         ما اريده  الباع اسلامه وضميره
         وبصلاتي اعليك چفي ابقه ارفعه
                     ——————
         لو تجيني الف مره ما احاجيك
       يلي خنت الزاد تحلم يوم اراضيك
         باجر بيوم القيامه راح ابجيك
         اِينزلك كرسي الخلافه مايعليك

        لاتصدك  خاف كالولك خليفه
      دور اصلك  يله تنصبلك سقيفه
        تاج حيدر مو حلو براسك انزعه
                      ————
          لاسلام اعليك يامن حارك الباب
         والزعل وياك يبقه ليوم الحساب
        ماادخلك بيتي بس بختك ببو تراب
       انت مو زلمه وانصحك تلبس حچاب
           ماتنفعك  بعد اعذار وندامه
           لاتحاول  يلي ماعندك كرامه
          وبجهنم  المر اشوفنك تجرعه
                       ————-
     السم اليطبخه يضوكه وانت مسموم
      تحلم اشما تعله توصل يم النجوم
     انت عاصي شلون تحرك باب معصوم
    شلون ارضه أعليك وآنه ضلعي مهشوم
           
         لاتكلي  ابلا قصد ضلعي كسرته
       ومحسن ابني  كبل ميلاده ذبحته
         انته مذنب والثمن لازم تدفعه
                    —————
       والدي بذنك سمعته من حچه هاي
      يغضب الله لمن اغضب يرضه برضاي
       اعليك غضبانه اصيح بدمع عيناي
        لو تصير الماي ابطل اشرب الماي
         مااطيقك لو توچ العشره اليه
           انته واحد ابد ماعندك حميه
       خد محمد تعمدت بيدك تصفعه
                      —————
       بموتي ماريدك تروح ويا اليشيعون
        انت حته ابليس كلك انته ملعون
      الصاحب من يموت ربعه ويا يموتون
        انت ماتعرف توافي تعرف تخون
       انته صاحب غدر مو صاحب طويله
        واليحشمك تطعنه لا ماتنتخيله
         اليمد جفه الك متعود تگطعه
                   ————-
سيد معتز الحسيني

             مَجروحه تدريها    لاتنطي ابد بيها
                لو زعلت الزهره بيمن ترضيها ؟
                           ____
            صاحب عَقيده ورافضي فاطم تريدك
              لاتنكل وياهم حطب محد يفيدك !
              دافع عله الزهره لحد كطعت وريدك
               بيد الكسر ضلع النبي لتخلي ايدك
                اِقره الكتب كلها  لاتحمي قاتلها
                  بالك تجاملهم  بالك تأذيها
                           
                     _____
              ضلع الزجيه بسكتتك احذر تكسره
             هل من مناصر لو هتف افزع وانصره
             حط طينته بخده الهجم واسمه اذكره
               المفاتح القران ابد لتضن يفسره
                 عِندك اساميهم    المن تبريهم !!
                  لاتفزع لضالم فشله تسويها
                            _____
             اترك سقيفت ساعده واحذر غدرها
               مابيها فيي ولانفع واضح امرها
             الشجره الخبيثه لاتضن لذه بثمرها
              ولاتسمح بكاعك ابد يمتد جذرها
              لتامن بشجره حقدت عله الزهره
              منْ العرك كصها لاتمشي تسكيها
                       _____
          اليهجم عله حرمه شتضن يملك رجوله !!
            وانته تكلي طائفي من اسمه اكوله
            كسر الضلع بالك تضن يشفه بسهوله
            ملعون كل واحد غضب الله ورسوله
       
               ثار بدوي ثارك  لاتنطفي نارك
            وام الحسن تدري حاسبتك اعليها
                      ____
              لتضن ابد يكبر شخص زعل امامه
                ماتكبر بهذا الفعل بس القمامه
               بالك تبيع وتشتري بهاي الضلامه
             واللي يحب ام الحسن واحد كلامه
              اكشف نواياهم  لاتمشي وياهم
             والخانت الصحبه المن تماشيها
                        _____
سيد معتز الحسيني

وفـقينه يزهراء وفـــقينه
سجلينه يزهراء سجلينه
———————
رزقينه للضلوع دمعه فاطـــميه
مديناها الجفوف لاترجع خليـــه
وبكل الـــروايات نقرالج سويــــــه
المو شيعي رفضناه احنه الرافــــضيه

حبينه يزهراء حبينـــه
سجلينه يزهراء سجلينه

———————
انصار البسامير مانسمع حجيهم
بفلسين اليضدوج محد يشتريهم
خدامج يريـــــدون نضراتج عليهم
فري سبحة الطين ادعي واذكريهــم

لــمينه يزهراء لـــمينه
سجلينه يزهراء سجلينه

———————
ببيوت اليحبوج اســــٰمائج هويه
لازم عدنه زهراء لو عبد الزجــــــيه
سمينه فدك ليش جم بت حيدريه
چيه بستانج اخذوه الماعدهم حميه

ضحينــه يزهراء ضحينه
سجلينه يزهراء سجلينه
————————-
تحضرين العزاءات معروفه الروايه
مولاتي وتكعديـن انتي بالبدايــــــه
علمتينه للموت منعوف الولايــــه
وابابج قرابين قدمنه وضحــــــايه

حزمينه يزهراء حزمينه
سجلينه يزهراء سجلينه

———————
بالمجلس توزعين للمخلص شــهايد
خاتمها ابو حسين حـــلال الشدايـد
بعِباتج تغــطي اليقرالج قصايــــــد
اليفتر العزاءات يتسجل مجاهــــد

شوفينه يزهراء شوفيــنه
سجلينه يزهراء سجلينه

———————
من نختم تمدين سفرتنه بجفوفج
احنه بعين الگلوب ويانه نشوفج
ذبحونه ويذبحون لگن ما نعوفج
بعد الباري بحروف يـ لزهره حروفج

امرينه يزهراء امرينــه
سجلينه يزهراء سجلينه

———————

سيد معتز الحسيني

لسان حال أميرالمؤمنين في دفن فاطمة عليهم السلام ...


أخذ بالباب بكتافه يفضه
وجنبي من أذى العصره يفضه
دلحگيني ابعجل عندي يافضه
جنيني أسقطو المحسن عليه

مكانه غلط هالمسمار بالباب
وطعنه لب نبينه طعن بالباب
أفكّر يام حسن كم وحدي بالباب
لداري اشلون انا جبته بديّه

الوديعه من لها العدوان وگفت
دفاعاً عن علي الزهـراء وگفت
وعن الدنيا ارحلت مولاتي وگفت
كسيرة ضلع وملطومه الزجيّه

العدو اهنا ماكفا الزهره دماها
بقى يعصر لجل يجري دماها
وسياط اعوانه بالعصره دماها
عليها ونيته قتل الزجيه

النبي خلف وحيده بت نبيهم
يودوها عشانه بت نبيهم
فلذت كبده وروحه بت نبيهم
تموت من القهر بعده ابرزيه

✍️
علي الأحسائي
جمادى أوّل ١٤٤٦هـ

في هجوم القوم على بيت الزهراء عليها السلام ....

تحرقُ الداره وفيْها فاطِمه
بُضعة المختارِ نفسه العالمه

خاطرك بعده ابنبينا مكْتفه
الوحيده عنده بنته المصطفى
وين فضله اعليك ظل وين الوفا
الحطب في حرگه داره اململمه

روح هادينا في بيته اللي رحت
وناسك ابحرگه الحطب كوم اجمعت
تغضبون الله إذا بنته اغضبت
عودو من شوف النفوس امخاصمه

دار ابوالزهره نبيكم تحرگون
بنت من هذي ياعالم تعرفون
بابها اليطرق نبيكم تكسرون
في غيابه تحرگونه الخاتمه

طفلته زينب في داره بالونين
وفيها طفلينه الحسن وابنه الحسين
المرتضى فيها وكتاب الله المبين
الفينا بالثقلين وصى طالما

صلا هادينا ونحر لله امتنان
الكوثر اعطه الله نبيه امن الجنان
وأي عطيّه مثْلها الزهره ابزمان
ماعطه حد مثلها هالمرحمه

هالهبه هذي إلهي الواهبي
كلّما اشتاگ الجنان الله النبي
ريحت الجنه يشم منها الأبي
فاكهة فردوس ربّه ومبْسمه

الهادي اِذا زاره من الأملاك احد
بين ادي يجلس ورد جلست عبد
مو فقط جبريل لا زاره نجد
ونافخ اسرافيل صوره في السما

ولادخلت بنته عليه ابمجلس يُقال
أحترام الها النبي يوقف جلال
ايگوم ويجلسها مكانه بالدلال
وراسها ايقبل وديها فاطمه

بل فرض طاعتها أعله الانبيا
مو بعد جن وأنس والأوصيه
والملايك بنته ابوالخلق ان هيه
سر من أسرار الإله ومعلمه

بل كفأ ملها لاما خلقه علي
الگال عنه المصطفى قوله بلي
الناس لو عرفت أثر فضله الولي
من تحت جدمه التراب اتلملمه

✍️
علي الأحسائي
ربيع ثاني ١٤٤٦هـ

يومك طال وهجرك طال        يالماعندك راحة بال
        منتظرينك     فدوه العينك.
            يالماعندك راحة بال
 
___
 
اشتياقي الحضرتك شاعلهن اشموعي
مدينة شوگ الك مبنيه بضلوعي
ولا موضوع افهمه انت موضوعي
يتاج الراس بيدك امسح ادموعي
 
قصرت وياك بدنياي   سوده ابوجهي يامولاي
     محتاجينك       فدوة العينك
         يالماعندك راحة بال
 
 
 
 
 

على وجهي الحزن بَيّن تجاعيدي
بظلام اليل اشوفك يا حلم عيدي
امد ايدي وتمد ايدك على ايدي
اگلك هايبويه تگلي : يوليدي
 
خليني وياك ابقه وياك        يالكاسر گلبي بفرگاك
وينك وينك     فدوة العينك
يالماعندك راحة بال
 
_
 
 
 
 
 
 

 
 
احط ايدي اعله راسي واقره بالندبه
الهي ارحم شعوره وارئف ابگلبه
على اللي ماله اهل لا اخوه لا صحبه
وغير احسين بالله شنهو المتعبه
 
ذاك اليبچي طول الليل      الله يصبره وينطي حيل
    الله يعينك     فدوة العينك
       يالماعندك راحة بال
 
 
_
 
 
 
 
 

 
 
اذان اجروحه گلبي ماسكت لحظه
واذا گلبي وگف بأسمك يرد نبضه
زعلانه العيون ابشوفتك ترضه
بس حبك حقيقي وغيرك نرفضه
 
حبيتك لا صورة وصوت    بلكي نضره قبل الموت
         وين اجبينك            فدوة العينك
             يالماعندك راحة بال
 
___
 
 
 
 
 
 
 
خذاني الشوگ كله العالمي الثاني
وگعدت ابيت جرحي وشجرة احزاني
تره حچي الگلب ماينطقه الساني
ولا حولة ولا قوة اعله وجداني
 
ادركني ياغيث الله      خَلص گلبي من ال آه
انطيني ايمينك          فدوة العينك
يالماعندك راحة بال
 
____
 
 
 
 
 
 
 

 
الذنب صاير حجاب أكلوبنه السوده
وعلى جيتك يمهدي الفرحه معگوده
مثل توبة الحر ودمعة اخدوده
اجي ومشدوده اديه  وعيني مشدوده
 
انت القاضي والسجان        تريد ابسيفك بالقران
تريد بدينك         فدوة العينك
يالماعندك راحة بال
 
 
للشاعر محمد الظالمي

حاول تنسه الراح           ياحيدر  ترتاح
هذا انت المهموم. ؟ توگع من تگوم ؟
حاول تنسه الراح
.
.
.

كل الماضي بآخر لحظه      
ممكن ينهي آخر نبضه
هذا الكون شكبره شعرضه    
          زغير

ما نايم سهران هوايه       
جنت اتشوف الزهرة مرايه
بيدك سبحة ومصلايه       
        وحصير

اول مره هاي المره        
تتلفت ماتلگه الزهره
بس فسرلي هاي النظره    
          امير

شجرة بيتكم ليش. ذبلت ورگه ورگه
الحنين تحرگه مو نار. الحنين تحرگه فَرگه
 
شايب صاير حيل       تنحب طول الليل
هذا انت المعصوم ؟ توگع من تگوم ؟
حاول تنسه الراح

.
.
.

اصعب ليلة ليل الجمعه
شمعه تطفي وتشعل شمعه
دمعه تروح بمجره دمعه
زلالال

فاطم فاطم دگت گلبك
تتنفسني عيوني تحبك
هجراني مأذيك متعبك
تعال

يالتسمعني گلي شلونك
ليش الدنيا امبچيه اعيونك
من شبعت داست ماعونك
سؤال

ملك ابينهم عيش وانسه ذكرياتك
يالماتنسه هيهات. اذكرني بصلاتك

انظرلك تعبان وتقرالي قران
يالحزنك مكتوم. توگع من تگوم
حاول تنسه الراح
.
.
.

غيمة عينك مطرت غربه
شاعر روحي وسيد حبه
بيرغ بيتك رفرف گلبه
حنين

حيرني حيدر موضوعك
من تصلي تجري ادموعك
ومبين حتى بضلوعك
انين


مايترس گلبي غير اسمك
جبرائيل بكبره يخدمك
ليش الدنيا لسه اتلچمك
سنين

اعذرك انت مكسور. على فگد الوديعه
اذا تذبل يكرار يبين بالطبيعه

كل عمرك تنهاب. تالي يلچمك باب
من بابك ملچوم. توگع من تگوم
حاول تنسه الراح

.
.
.

يالفاتح للبير اسرارك
صندوگ الذكره وافكارك
ماكو ماي اليطفي نارك
غريب

قوس الشوگ بسهمه يصيبك
وغير الحسره شنهو يشيبك
گبر الزهرة المخفي يطيبك
طبيب

عانك الله عِين ابروحك
كافي راح يهدمك نوحك
محد يعرفك غمق اجروحك
عجيب

شمس الله تِچّويك بشروق المشرقيه
تبين كل الهموم. بسلام المغريبه

صعبه يالكرار. كل ساعة تنهار
معذور المظلوم. توگع من تگوم
حاول تنسه الراح

.
.
.

لاتتكسر لا تتالم
تگضي هاي الدنيا ونلتم
والمايفهم لازم يفهم
نعود

عوف البير وعوف الشجره
لا تكتب ياحيدر ذكرى
كون الهم البيك اتكسره
قيود

اشرب ماي العذب اتهنه
متانيتك اني بالجنه
كلما تكبر بيك الونه
تزود

الكَبِتْ والله ياذيك صيح بصوت عالي
تبچيني وابچيك غالي يبچي غالي

بالك ما مرتاح تصفگ راح براح
يالما شايف نوم توگع من تگوم
حاول تنسه الراح





للشاعر محمد الظالمي

شمعت البيت ... طفت طفت طفت
وانه العيون ... عمت عمت عمت
الفاكد امه كل حياته ...  قهر
موحشه سنينه المماته .. قهر ... هذا حالي
......
الماتت امه ميت بمعنى الشعور
ظلمه تصبح دنيته ومابيهه نور
عمره يخلص نوح ما بين الكبور
بين ماي وشمعه ودموع وبخور

فكد الاعزاز ... صعب صعب صعب
يترك العين ... تصب تصب تصب
دمعه عالخد يبقى جاري ... عمر
المثلي فاكد بيه داري ... عمر

......
ابلاية ام الدار مهجورة تصير
لا تشوف الفرح لا يدخلها خير
الكعده وي امي اشلاحهه اعله الحصير
تسوه هذا الكون وافلاكه التدير

امي ياناس ... شمس شمس شمس
ضاوية الكون ... احس احس احس
كلشي ليل اصبح بعدهه ... سهر
وانه واحد من ولدهه ... سهر
......
لا تلومه الماتت امه يعيش نوح
جرح فكد الام اشد كل الجروح
الراحت امه كلشي وياهه يروح
بس جسد عايش يضل ابلايه روح

بس نفس بي ... يضل يضل يضل
منتظر يوم ...  أجل . أجل . أجل
عايش الموت بعذابه ... جمر
الدافن امه بالترابه ... جمر

.......
البيده دافن امه يعرف شنهو اكول
يحس بية  من اسولف عالبتول
حسين انه ابن علي وجدي الرسول
موتت امي اذتني اشد من الخيول

موتت امي  .... اشد اشد اشد
من سحكتي ... بعد بعد بعد
اضلوعي كلهن يم ضلعهه ... كسر
ودمعي نازل وي دمعهه ... كسر
......
الامه عدله خل يضل يرعاها دوم
أيحبهه من يكعد ايحبها من يكوم
هالنصيحه مني اخذهه يالخدوم
بس حنان امك ينسيك الهموم

منهه هيهات ... يصح يصح يصح
يمها الانهار ... تشح تشح تشح
يا حلات الكعده يمها ... تسر
البين اديه امه يضمها ... تسر

.......
رضا الباري من رضاء الوالدين
الامه ما ترضى عليه ما عنده دين
عيش لمك موت لمك يالحنين
الجنه تحت اقدامهه كال الامين

رحمت الله .. الك الك الك
هي امك ... هلك هلك هلك
عبد صير الهه بحياتك ... ذكر
بيها مقبوله صلاتك ... ذكر
.......
الكلمات
موسى الخادم

البجفوفه قالع خيبر .... ما يصعب اعليه عسكر
لومه الوصيه كَيدت جفينه
جا ماكو واحد يوصل ام حسينه
.......
؛١
مشهور حيدر بالمعارك أسمه
اليدناله يرجع على طوله امدمه
المن سيفه فر ربعه تحسبه زلمه
جا غير حيدر هوه ياهو ايلزمه

ما تنجرع سطراته .... الاول علي بصولاته
ما واحد ايردهه سَطرت ايمينه
لومه الوصيه كَيدت جفينه

......
؛؛٢
تتراجف اكَباله الزلم بالحومه
والشاهد ابن العاص ذب اهدومه
كل صوله يدخلهه علي محسومه
اليدخل نزال اوياه آخر يومه

حيدر جبيره اصروحه .... اليدناله بايع روحه
كبل المنيه ايشوف موته بعينه
لومه الوصيه كَيدت جفينه
......
؛؛؛٣
فارس عظيم اتهابه كل عدوانه
يا ويلهم لو سرفناهه اردانه
ماغيره بالكلفات يصرخ انه
وبركَاب خصمه ما خطه نيشانه

ضرباته ميثنيهه .... كلهه تسولف بيهه
متعجبه بيهه الدنيه كَبل اسنينه
لومه الوصيه كَيدت جفينه
.......
؛؛؛؛٤
حيدر مثل بركان تلهب ناره
مايسكت اعله العيله ياخذ ثاره
لومه الوصيه محد ايطب داره 
خيبر يعيده ابيمنته وبتاره

لو صاح حيدر اني ... لا أول ولا ثاني
يتجره يكسر ظلع ام حسينه
لومه الوصيه كَيدت جفينه
.......
؛؛؛؛؛٥
ينعد بلف فارس علي بصولاته
أتلثميه موش بعينه وي سطراته
لو ما نطه احجايته الصاحب ذاته
جا كَلب كون الله علي بحملاته

لو ما نطاهه اوعوده ... محد يصل لحدوده
زلمه كلف حيدر علي والينه
لومه الوصيه كَيدت جفينه
......
✍️ كلمات موسى الخادم

اتمنيت موتتنه سوه ...
مو واحد ايروح ويضل واحد
جنتي إلي ماي وهوه  ...
هسه اني ميت بس جسد كاعد
.........
من اول اليوم الدخلتي البيتي
ردت الي يا فاطمه عافيتي
عفتيني ليش الوحدي اويه احزاني
ياهوه الكل لحضه يطب الريتي

ضاع الهوه ... بعدج يمحبوبه
ضاع الهوه ... والريه مصيوبه
ضاع الهوه ... وانفاسي محسوبه

مخنوكَ بعدج يم حسن
وبحالي يعلم ربي اوشاهد

.....
جنت ادعي بسمج فاطمه الحنينه
واحد على الثاني يقسم اسنينه
موتته وحده جانت انه ابالي
ماكو اليعيش وثاني تغمض عينه


ردي علي ... يافاطمت حيلي
ردي علي ... يا صبحي ياليلي
ردي علي ... مو انتي كلتيلي

نعشين نطلع مو نعش
وروحي ويه روحج سوه تتشاهد


.....
يازهره ايام العمر حاجيني
ينطيج كَلبج وحدي اتخليني
احلامي طشرتيهه كلهه ابموتج
فتحيلي عينج يا ملاذ اسنيني

يافاطمه ...  اشلون اصبر ابدونج
يافاطمه ... فتحيلي اعيونج
يافاطمه ... ايتامي يردونج

زينب والحسين وحسن
عالخد دمعهم عيني اتشاهد
......
اتذكرين كعدتنه سوه ياروحي
جنت انسه بيهه اهمومي وانسه اجروحي
يا ذنب سويته وتركتي ادياري
عفتنيي ليش وعالي بعدج نوحي

ياسلوتي .... روحي اشيسليهه
ياسلوتي ....بعدج اهم بيهه
ياسلوتي .... ناري شيطفيهه

مهدود حيلي ابموتتج
بس نفس بعدج نازل وصاعد

......
يم عشرت الحلوه اشيصبر حالي
والدار من نورج يصبّح خالي
كلشي ابحياتي حاسب انه احسابه
بس مال ادفنج بيدي موش ابالي

كلشي انتهى ...بعدج يفاطمتي
كلشي انتهى ... من بالكَبر نمتي
كلشي انتهى ... مت انه من متي

من نزليتج للكَبر
كَالتلي روحي اوياك لا مارد
......
بعدج علي مو عمره موته ايتاني
شله ابحياته المات نصفه الثاني
ما دافنج والشيب اكل كل راسي
اتصدكَين ما اعرف صدك هذا اني

ماجن علي .... شايب صرت شُوفي
ماجن علي .... موتج اخذ شَوفي 
ماجن علي .... عوفي الكَبر عوفي

عايني الحالي يم حسن
كبرني موتج والفكر شارد
............
✍️ كلمات موسى الخادم

الدافن عزيزت روحه ... يادوه اليشفي اجروحه
الله يعين الفاكَد   .... مثلي امه يكثر نوحه
......
؛١

الدافن بديه أمه يعرف اشجاي اسولف
عمره يصير ابلا طعم ما داعي احلف
لا ليله ليل ولا نهاره يصير يعرف
طاري امه من ينجاب يمه كله يرجف

كَلبه يلزمه ابسرعه ... ومن عينه ينزل دمعه
التنذكر امه اكَباله .... مايدري يبجي ينعه

......
؛؛٢

كلمة اليمه اشكَد أمل بيهه ومحنه
الله يعينه الفاركَ امه ومشت عنه
تخلص حياته ابلا فرح ونه اعله ونه
وكلشي يموت ابداخله وايروح منه 

كل حلم جان ايتاني ...  ويصير واحد ثاني
الما يشم شيلت امه ... كل عمره يبقى ايعاني
.......
؛؛؛٣

ألفاكَد امه اتصير اله المكَبره حلوه
كل ليله يتعناهه شايل نعي يسوه
ما يهوه كل عيشه بعدهه موته يهوه
بلوه يناس الميته امه يعيش بلوه

ما تبقه عنده الفرحه ... بس حزن يلجم جرحه
يشطب ايام اسنينه ... وسيف الفراكَ ايذبحه
.....
؛؛؛؛٤

ألبيت اذا من عنده شالت أم حنينه
وحشه يصير وظلمته اتغطي المدينه
معذور كلمن ماتت امه يبجي عينه
أيشيع وراهه ايام عمره وكل سنينه

الشيع بديه غاليته .... اتروح ابعجل عافيته
ويصير ذابل عوده .... والوحده تترس بيته

......
؛؛؛؛؛٥

احسين انه الجاي اسولف يالحبايب
من ماتت امي فاطمه عشت المصايب
ثوب اليتم ما فاركَاني وكَلبي ذايب
وكل حيل ما ظلي بعدهه وصرت شايب

من عندي راحت امي .... وبس القهر ظل يمي
كل ليله ارش ادموعي ... ابحجرتهه انه وهمي 

....؛؛؛؛؛؛؛.........
✍️ كلمات موسى الخادم

شيعتهه ... للمكَابر ... شيعتهه
وادفنتهه ... وانه حاير ... وادفنتهه
وظل سؤال ابداخلي
الزهره ماتت لو علي
.....
؛١
من بعد ما غسلتهه ابدمع الاعيون
بين اديه انه شلتهه مو عالمتون
غاليه عندي الزجيه وناسي يدرون
جنت اخاف اعليهه من الهوه البلكون

اغله مني ... عندي هيه ... اغله مني
فاركَتني ... للمنيه ... فاركَتني
يا عمر يحله الي
الزهره ماتت لو علي
......
؛؛٢
آنه قالع باب خيبر ذاكه الاثكَيل
وحيل ما ظلالي راح اوياهه كل حيل
من شفت كسر الظلع والدم الايسيل
شاب راسي الجان يشبه ظلمة الليل

كلشي بيه ... صاير ابيض ... كلشي بيه
عالزجيه ... كلي اختض ... عالزجيه
حقي بالهم مبتلي
الزهره ماتت لو علي
.....
؛؛؛٣
من وصلت المكَبره صرت انحب اهواي
أعرفت أم بيتي مترد بيتي وياي
حرت أرجع لو أتاني فرحة اصباي
وصرت بالدمعات يمهه رايح وجاي

عالي نوحي  .. ودعتهه ..  عالي نوحي
يمهه روحي ... ما جبتهه ... يمهه روحي
نوحي يمهه معتلي
الزهره ماتت لو علي
.....
؛؛؛؛٤
بيه ما بيه احفرت كَبر ام الحسين
مثل واحد ميت ويدفنله ميتين
اوموش ماي اللحد رشيته ابدمع عين
وخفت لا تنلجم وسعته اللحد زين

جاري  دمه ... شكَد ضلعهه ... جاري دمه
خاف الجمه ... وي رفعهه ... خاف الجمه
وتنوجع روحي وهلي
الزهره ماتت لو علي
......
؛؛؛؛؛٥
أشد موقف مر عليه وأبد ما راح
من عليهه بجفي اهيل الترب بصياح
اتذكرت من فوكَهه باب الخشب طاح
ساعه ظليت انه واكَف لازم اصفاح

هذا حالي ..  من بعدهه ... هذا حالي
داري خالي ... روحي عدهه ... داري خالي
والحزن واضح جلي
الزهره ماتت لو علي
................؛؛؛؛؛...................
✍️ كلمات موسى الخادم

جريمةًُ لا تُغتَفرْ  .... تَبكيها عينُ المُنتظر

     .......
يا جريمه... المنهه تجري ... عيون مهدينه دمه
امصيبت الطف ... لو مصيبت ... أمه أمه فاطمه

انه اعتقادي يجري دمه اعله اثنين
مصيبت كسر ظلع الزجيه واحسين
يوميه عَصرت فاطمه اتشوف العين
ويوميه مقتل ينعرضله مرتين

جريمةًُ لا تُغتَفرْ  .... الموتُ فيها قد حَضر


......
ايساعد الله ... كَلبه كلبه ... أشكثر شايل هضم
ماكو مثله ... حزن شايل ... حزنه واصل للعظم

ليل ونهار المهدي عايش بمصاب
ما راحه شاف ابدنيته وصار اتراب
يبجي على الصار وجره للأحباب
ويوميه بيده للحزن فاتح باب

جريمةًُ لا تُغتَفرْ ... مَنّ أنكرَ الظلعِ كَفر

.......

كبر صبره ... كد سنينه ... يا كبرهه محنته
مدري يبجي ... الكسر امه ... مدري يبجي العمته

ألمثله ميت ما يعيش ابهل حال
حمله ثكيل وما تشيله الأجبال
وبعينه ظل امن الدمع بس اوشال
وعمر انتظاره للفرج بالهم طال

جريمةًُ لا تُغتَفرْ .... قد أورَثت حُزنَ القَدر

.......

ياهو عايش ... مثله غربه ... وشايل ابكَده محن
حقه يذبل .. غصن عوده .. نوحه دايم لام حسن

شاب ابعمر شاب ابسبب حركَ الدار
واكبر جروح ابداخله امن البسمار
وامتاني يايوم الفرج يوم الثار
بعيونه ينظر كل وكت ذاك الصار

جريمةًُ لا تُغتَفرْ .... للظالمينَ لا مَفر
.........
✍️ كلمات موسى الخادم

#يا_علي

ليل المغرب... كاسر ضهري
ليل المغرب... شيب عمري
وضل ينزف جرحي الدامي
ماتت زهرة ايامي
ليل المغرب
////////////////////////////////////////////////
يا أول كسر بالروح غيرني
يالطيفچ يمر كل ليل ما هدني
دموعي بغيبتچ ما تنضم بردني
عجيبة شلون شالج ما هدل متني

وانه الحالي... وليل جروحي
وانه الحالي... ياهو الروحي
صارت باسمج أحلامي
ماتت زهره ايامي
ليل المغرب.
////////////////////////////////////////////////
رافگت الصحاري بغيبتچ عني
يالمنچ نفس وانتي نفس مني
على كبرچ يفاطم ما هده وني
وعله مصابچ منو غيرچ يساعدني

وبصف البير...اصرخ فاطم
وبصف البير... ما رد سالم
وانهض كوه اعله جدامي
ماتت زهره أيامي
ليل المغرب
////////////////////////////////////////////////
اسولف عالكبر بس ما يجاوبني
جا ليش الزمن رايد يتعبني
سكوتك يا حبيبي ما يطمني
يا جرحي الغميج ويا اعز حزني

وبگرب الباب ... انظر طولچ
وبگرب الباب... ابجي بدونچ
ضلموچ وياهو يحامي
راحت زهره أيامي
ليل المغرب
////////////////////////////////////////////////
حيره روحتچ يام الحسن حيرة
غربة وموحشة بدونچ تره الديرة
يأم العاطفة ويا منبع الغيرة
رحيلج مو سهل لا معضله جبيرة

يالچنتي وياي... أجمل بلسم
يالچنتي وياي... زهره وتنشم
لكن ماتت كدامي
راحت زهره أيامي
ليل المغرب
////////////////////////////////////////////////
شاغت روحي لمن كسروا ضلوعچ
خفيتي علية ودري بلچمة متونچ
يَعّين (الله) ولكن سطروا عيونچ
يبت طه شعجب ربعه يكرهونچ

سطروا عينچ.... والكون اهتز
سطروا عينچ.... والحايط نز
يا جرحي ويا ألامي
راحت زهره أيامي
ليل المغرب
////////////////////////////////////////////////
السيد احمد النوري

يايمة... يزهراء.... يا يمة..... يزهراء
////////////////////////////////////////////////
زينب انه يا يمة
جيتج مسرعة بهمة
گبرج ردت أنه اشتمة
هضمه روحتج هضمة

صورة ضلت بالي .... نيران وحرگ عالي
واسمع فضة أدركيني.. وطاح المحسن الغالي
يا يمة.... يزهراء..... يا يمة... يزهراء
////////////////////////////////////////////////
ليل فراگج بروحي
زيّد همي وجروحي
عگبج ما هده نوحي
واحزاني الج توحي

اعاين كل مسه علباب ... واتنطر يجوني احباب
لا امي ولا محسن... راحوا والگلب عطاب
يا يمة... يزهراء... يا يمة... يزهراء
///////////////////////////////////////////////
أفگد طولج بكل ليل
شيصبره العزيزة يشيل
يا حيل اليشد الحيل
شلال الدمع ويسيل

اشتم شيتلج يمة ... لچمة بالگلب لچمة
يا حزن الكلب ما هاد.. من ضلعج نزف دمة
يا يمة... يزهراء.... يا يمة... يزهراء
////////////////////////////////////////////////
يمة لطولج اشتاكيت
يالطولج يحلي البيت
احن لكعدتج وبجيت
تانيت شكثر تانيت

كسرة ضلت بروحي ... زادت همي وجروحي
معقولة بلا تشييع؟ .... يكون ولا هده نوحي
يا يمة.... يزهراء.... يا يمة...... يزهراء
////////////////////////////////////////////////
علباب اوكف بتعبي
وعيني عالدرب تربي
نار ومشتعل كلبي
ادعي بكل مسه ربي

بلكت لن حلم موتج .... واسمع زينب بصوتج
ولا اكو عصره لا نيران... ولا ينشال تابوتج
يا يمة... يزهراء.... يا يمة.... يزهراء
//////////////////////////////////////////
الشاعر السيد احمد النوري

بجروحه باب ... دنيه العذاب
گلبـــــه علي ... تَحتِ التراب
عالزهره صحته بدمع العين
الله يعـيـــنك يا بو حــسين
____
هذاك الـ ينسِــــمِع يم العـرش صــوتــه
و نِجَد (خامسها بعد العَشرَه) من حُوته
الخـــيــبر مِـن قِــلـــعها ابعض من قوته
مــا شــايــل الزهــــره شـــــال تابــوتـــه

ويه الزهره عاش ... أحله حياة
و من عافـتــه ... چم مره مات
الساعه بعدها عنده سنين
الله يعـيـــنك يا بو حــسين
___
أدور بالبــــشــر محد وصـل صبره
علي گــــدام عـــينه مـــيته الزهره
يشم گوّه الهوه من شاف هالنظره
محـروگه أديــــها و عالوجه سطره

بحاله شيصير ... ايشوف بنياح
الباب الثگـيل ... فوگــاها طاح
صوت الصبر من ذاك الحين
الله يعـيـــنك يا بو حــسين
ـ_
عالمـغتـــسل دمعاته حِچت چَنها
صـدگ بچفـــوفك الزهره تِچفنها
اشيگول لزينب و لو ناشدت عنها؟
مكـــسورة ضلــع بالليـل دافـــنها

مدري شيگول ... لو رَد وحيد
زينــب تصــيح ... أمـــي أريــد
اتهِـز گلبه كل ما گالت وين
الله يعـيـــنك يا بو حــسين
__
علي شِـيب المَــلامح بي ألِــف فاگِـد
اليگعِـد بالسِمــه بالمگــبــره گــــاعِد
ينــــاس صواب حيدر مِكلِف و چــايد
فُـگَـــد مَنْ چــان ويا بالنَفَـــس واحد

ذاك الجـِـــــبـَـــل ... المَتهزه ريـح
اعله الزهره صار ... يوگــف يطيح
الرايحله غالي يجيــبه منين
الله يعـيـــنك يا بو حــسين
_
علي ايفزِز الميت لو سِمَع نوحــه
غير الزهره ياهو اليعرُف جروحه
اعله خدها الازرگ اعله التُرُب مطروحه
علي يدفـــنها مدري يدفِن بروحه

نــــاداها آه ... يالروحي بيچ
من التراب ... خايــف عليچ
لا يلـــچم الخَـد و الضلعين
الله يعـيـــنك يا بو حــسين
__
رِجَـع واتخيّـــل يناديهــا من دونــچ
مكسور الظهر مِن غُمضَت اجفونچ
يلون العافــيــه و راح ابگبــر لونــچ
شسوي ابيــت ما بي فاطمه عيونچ

لو ما القضاء ... احچي بسكوت؟
يالزهره كون ... ويّـــــاچ أمــــوت
ما خَلّه عنده احباب البيــن
الله يعـيـــنك يا بو حــسين
___
الشاعر حاتم صبري الكاظمي

حامي الحميّه .. دافن شمس بالليل
بعد الزچيّــــه .. صايــر علي بلا حيل
روحــه غريــــبه
بعــد الحـــبيبه
صاحب مصيبه
________
علي جروح المصيبه خذت كل حيله
مشه محـــبوب گلــبه عنّه هالليــــله
( الله يصبــرك ) سلـمان يدعــــيــــله
نعش أم الحســن گــوّه علي ايشـيله

قالـــعها خيــبر ... لزهره گوّه ايشــيل
مو ذاكه حـيدر ... صايــر علي بلا حيل
روحه غريــــبه
بعد الحـــبيبه
صاحب مصيبه
_______
القويِّ الـ بالمــعارك مِنفرِد عزمــــه
الـ ما يوگف اگبـــــاله لو ألـــف زلمه
بصعـوبه الهَوَه بعد الزهــره يشتمّه
أبو الاحزان صـار من الضــلع أسمه

فرگــــاها خَلّه ... بصوته الحـزن ترتيل
الشافه يــگله : ... صايــر علي بلا حيل
روحه غريــــبه
بعد الحـــبيبه
صاحب مصيبه
______
علي هذه الدهـــر منّـه سِلِـب عمره
عالمُـغتــسل بيـــــده مَـدد الزهـــره
يبــاوع خدها ازرگ و السبب سطره
من كَسر الضِـلع و الله انكسر ظهره

محروگه اديها ... شاهدها بالتــغسيل
يبچـــي عليها ... صايـــر علي بلا حيل
روحه غريــــبه
بعد الحـــبيبه
صاحب مصيبه
________
گـــعد بالزاويــه يبـــچي بألم مخفي
و يصيح بدمعته و الصيحه ما تكفي
گالتلــــــه شــجرالك گال : وا لهفي
اعله ضلع المنكسر أسماء مَر چفّي

شاف بدمعــته ... كــسر الضلــع بالويـل
آ يا كسرته ... صـــايــر علي بلا حيل
روحه غريــــبه
بعد الحـــبيبه
صاحب مصيبه
_______
يعالـــــم و الله تكـتل فرگـــة الأحـباب
غابت ضحكته وجه ام حسن من غاب
أبو تـــراب و يـــهيل اعله الزچيّه تراب
علي ميّـــت عليـــها من عصرها الباب

وَدعـها ينــحب ... رَد و دموعه اتسيل
گالــته زيـنب : ... صايـر علي بلا حيل
روحه غريــــبه
بعد الحـــبيبه
صاحب مصيبه

الشاعر حاتم صبري الكاظمي