* * * Сочинг зулмоти узра оразинг – хуршиди тобоним. (Партав, “Якпарда сувора”дан) Ҳақ яратгандир сени якто қилиб ҳилқат аро Ҳинду афғон, турку тожик – неча минг миллат аро. Равза боғининг гули деб, ортадир ҳайроналиғ Неча минг миллат демаким, неча юз давлат аро. Қатлим истаб жуфт ятағондек* тағин қайрилдиму Икки қошинг чимрилибдир, қаҳр этиб ҳайбат аро. Ранги зулфингдин сиё умрим ўтиб бўлғоч, не тонг Гул юзинг юз очди юз йилдин кейин зулмат аро. Ой ўтиб, ойдек жамолингга нигоҳим тушдию Ёр, унут бўлмиш азобинг бул ажиб шафқат аро. Зулму золимликнию зулматни этгай мағфират Меҳрибон тангрим бу кун лутфинг кўриб, раҳмат аро. Нурли дийдорингни бир кўрмоқққа муштоқ хаста дил Этма айб, васл истаса айшу тараб, ишрат аро. Ҳақ таоло сенга берсин роҳату умри дароз Мен эса ўлсам керак ҳижрон деган меҳнат аро... (Ятағон* -яничар(турк аскарлари)нинг қайрилма қиличи) Абдунаби Ҳамро