مني باك الموت ليش ام بيتي والله وياها ودفن عافيتي الموت شو سواها ▧ ودفن حيلي وياها ▧▧▧▧▧▧▧▧▧▧▧▧▧▧▧▧ يموت هو - كلمن يفارك عزيز وغالي يموت هو - بشدته اول يموت وتالي كضينه احنه العمر بالحلوة والمرة والنه بكل مكان اهناك جم ذكرة وانه بالدفنه ادفنت كل حيلي وبالشبه صارن نهاري وليلي بروحي ما انساها ▧▧▧▧▧▧▧▧▧▧▧▧▧▧▧▧ ليش رحتي - يانفس روحي وحبيبة روحي ليش رحتي - جرحج اكبر والله كل اجروحي ويبلسم للجرح ياشوفة عيونج ولايحلة العمر ياعمري من دونج ردت اكوم وثكلت انه اجدامي ريت تكصر من بعدها ايامي ياعظم بلواها ▧▧▧▧▧▧▧▧▧▧▧▧▧▧▧▧ بكلبة كسرة - كلمن بجف ايدة يدفلنه حبيب بكلبه كسرة - وهية مو كسرة عظم خاطر تطيب يموت ال من وكت يدفنهم اعزازة واصعبهن بديه يغسل الاجنازة الشايل الحباهم اعله متونه يريد يسكت بس تفضحه عيونه عيونه دم مبجاها ▧▧▧▧▧▧▧▧▧▧▧▧▧▧▧▧ ليش هاية - عني ضميتي الجرح يالزهرة ليش هاية - بساعة التغسيل شفت الكسرة ضميتي الوجع ماردتي تحجيلي ولاعندج صدك كل حيل ياحيلي ضلعج المكسور ضل ياذيني كون اموت ولا اشوفه بعيني ليلي كله انعاها ▧▧▧▧▧▧▧▧▧▧▧▧▧▧▧▧ سمعي مني - مودعه الله وبس اسمعي احجاية سمعي مني - شوكي الج يالزهرة حيل اهواية سواها الزمان وانهى عشرتنه يمن جنه سوة ويامحلا لمتنه توجع المشتاك والله الصورة وذكريتاج بالكلب محفورة صورة من ذكراها ▧▧▧▧▧▧▧▧▧▧▧▧▧▧▧▧ لخادم الحسين ع الشاعر عباس المجتومي