Xunta pola Defensa de la Llingua Asturiana

LA XDLA ACUSA AL Principado de Asturias Y A Radiotelevisión del Principado de Asturias DE FALSIAR LOS DATOS APURRÍOS AL CONSEYU D'EUROPA SOBRE LA SITUACIÓN DEL ASTURIANU

Depués de conocer l'informe nuevu del Comité d'Espertos de la Carta Europea de les Llingües Rexonales o Minoritaries del Conseyu d'Europa, publicáu esti martes, la Xunta pola Defensa de la Llingua Asturiana (XDLA) acusa al Principáu y a RTPA de falsiar los datos apurríos a esti organismu internacional sobre'l procesu de normalización llingüística del nuestru idioma nel ente públicu de comunicación.

Nesi sentíu, rescampla nel informe que nel 2021, añu nel que se recoyeron los datos, TPA tuviera un 15,5 % d'emisión n'asturianu y RPA un 12,7 %. A la XDLA prestaría-y saber d'ónde salieron esos datos, porque nos porcentaxes d'emisión que vien recoyendo la organización dende qu'empezó a emitir RTPA la programación n'asturianu nunca pasó del 4 %.

Dende la XDLA sospechamos que metieron como n'asturianu programes n'amestáu o namás colos títulos de creitu n'asturianu, amás de repeticiones d'estos espacios. Quier dicise, engáñase engordando los datos categorizando como n'asturianu programes que namás con muncha muncha arrogancia podíen pasar como talos.

Mesmamente, güei -miércoles 25 de setiembre- TPA namás tien programaos unos diez minutos d'emisión nel nuestru idioma -una sección del programa 'Pieces' depués de 'TPA Noticias. Primera edición' (les más de les veces con entrevistes en castellanu con voz n'off n'asturianu) y un resume informativu d'un minutu depués de la segunda edición del informativu-. Difícil nos paez que nel 2021 TPA emitiera'l 15 % n'asturianu y más difícil abulta que güei pueda emitir esi porcentaxe. Per otru llau, RPA nun tien agora un solu programa n'asturianu y nun hai nengún espaciu centráu na música nel nuestru idioma.
Otra manera, l'informe destaca los resultaos bonos del Plan Pilotu Esperimental de Fomentu del Usu del Asturianu realizáu ente'l 2017 y el 2019, porque, según los datos qu'apurrió'l mesmu Gobiernu autonómicu, la mayor parte del alumnáu participante ameyoró les sos notes. Sicasí, el plan quedó paralizáu y la conseyera actual, Lydia Espina, refugó retomalu pola falta de seguranza xurídica. Ta malo d'entender cómo un plan que se punxo en marcha y del que'l mesmu Principáu reconoció los sos beneficios pal alumnáu agora tien “falta de seguranza xurídica”.

Tovía más escandaloso ye que'l Principáu ufiertó estos datos al Conseyu d'Europa nel 2021, cuando Educación yá decidiera acabar con él. Amás, l'informe muestra que nun hubo nengún avance na Educación Secundaria, onde l'asignatura atopa los pilancos mayores pal so enseñu ensin que la Conseyería tomara nenguna midida p'ameyorar la situación.

Educación y medios de comunicación, dos de los pegollos fundamentales d'un procesu de normalización llingüística y el Principáu tien que falsiar los datos pa llavar la so falta d'acción. Unos datos que, con too, namás vienen a mostrar cómo, a pesar de les palabres guapes del presidente Adrián Barbón hacia'l nuestru patrimoniu llingüísticu, l'asturianu sigue en peligru, sobre too tocante a la so tresmisión xeneracional, porque'l Plan Pilotu yá nun existe y les neños y neñes asturianes tán medrando ensin dibuxos animaos o programes sobre música nel nuestru idioma en RTPA.

¡Hai llotería de la Xunta! ¡Nun quedes ensin ello!

Gárralo en:
·Avilés - Cervecería Cabanón
·Uviéu - Espacio Nube y L'esperteyu Chigre Folk
·Xixón - Canteli Sidrería

Hai una minoría intolerante, pero con poder y presencia nos medios, que desprecia la llucha polos derechos llingüísticos y arreniega de la llingua del pueblu. La mayoría de la sociedá asturiana ta arguyosa del so patrimoniu llingüísticu y ve con bonos güeyos la #oficialidá

¡Normalización toponímica, yá!

Güei presentóse una web nueva dependiente del Gobiernu asturianu. Ta namás en castellanu. Les instrucciones sobre criterios d'usu llingüísticu aprobaos en Conseyu de Gobiernu n'abril deben entrar dientro de la política d'amabilidá: ponéilo n'asturianu..., pero namás si vos apetez.

OTJA - Observatorio de Transición Justa de Asturias
https://www.otja.es

La XDLA sofita la denuncia fecha pol profesor de la Escuela de Música de Tinéu sobre la persecución y eliminación del asturianu en diferentes formatos de los servicios municipales.

El Conceyu, en manes de la estrema derecha, dedícase n'esclusiva a la persecución de les poques actividaes nes que se visualizaba mínimamente l'asturianu, contraviniendo la llexislación vixente. Por eso, solicitamos la rectificación inmediata d'estes acciones y la puesta en marcha d'una normalización llingüística nel conceyu que, a lo menos, respete les normatives vixentes.

Ta demostrándose otra vez que la propuesta de la derecha asturiana sobre'l nuestru patrimoniu llingüísticu ye'l de la eliminación y l'ocultamientu. Más allá de les palabres guapes de la dirixencia del PP, la realidá ye que la compaña de los ultres lleva a enseñar la peor cara de la política negacionista y intolerante a la que nos tienen avezaos los pactos cola estrema derecha.

https://www.europapress.es/asturianu/noticia-denuncien-quel-conceyu-tineu-elimino-lasturianu-na-web-na-documentacion-escuela-musica-20240627092200.html

Les instrucciones d'usu del asturianu aprobaes pol Gobiernu asturianu va dos meses entren nel conceptu de normalización amable: namás s'usen si se quier. Paez qu'a la Conseyería de Derechos Sociales y Bienestar nun-y apeteció facer la web nueva tamién n'asturianu.

https://prestacionesasturias.es/

L'asturianu nun llegó a la estación de La Pola, pero tampoco la toponimia oficial, que paez que pal Gobiernu asturianu equí nun rixe.

Decretu 74/2005, de 7 de xunetu de 2005... papel moyao.

#Oficialidá

Va dos años, felicitábemos a Asturies.com polos sos 25 años d'andadura. Destacábemos el so papel como testigu de bona parte de la historia de la Xunta pola Defensa de la Llingua y, polo tanto, d'una reivindicación llingüística na que siguimos anguaño. Dicíemos qu'esperábemos que tuviere siempre ehí pa cuntalo, pero, por desgracia, ayeri llegónos la noticia de que zarra por falta de viabilidá. Ye una noticia pertriste pa la información n'asturianu. Y nun ye la primera. Namás queda felicitar a Asturies.com por toos estos años de llabor.

Tenemos unos medios de comunicación públicos que, a pesar de selo, siguen arrequexando la presencia del asturianu, munches veces con un usu malcuriosu y desdexáu. Mentes el Gobiernu siga allargando (y subvencionando) esi modelu fallíu, naguamos porque surda una propuesta empresarial seria que garre'l testigu d'Asturies.com.

Yá lo diximos más veces y vais dexanos que nos repitamos: la igualdá de derechos nun tien que llevar detrás nengún axetivu. Nun hai oficialidaes amables nin oficialidaes gafes nin oficialidaes repunantes. Hai reconocimientu de derechos o nun lu hai. Nun queremos derechos de segunda. Queremos derechos, a cencielles.

Trenta y siete años..., pero siguimos. Falten munches persones que llucharon por ver feches realidá les nuestres reivindicaciones, pero xuntáronse otres más moces. Porque somos resistentes. El nuestru ye un movimientu de resistencia. Resistencia a desapaecer, resistencia a que nos roben el futuru. Queremos siguir usando estes palabres qu’aprendiemos en casa y que nos xunten cola memoria de los nuestros. Nun somos menos que naide nin lo nuestro ye menos que naide. Tenemos derechu y nun vamos arrenunciar nunca. Vamos siguir lluchando.

Nós vamos siguir, sí. Pero ¿qué va facer la nuesa clas política? ¿Qué van facer les nuestres representantes ehí, na Xunta Xeneral? ¿Qué va facer el PSOE? ¿Va dexar qu'Asturies siga careciendo un estatutu de segunda, del sieglu pasáu, y too por nun saber liderar la modernización que precisa? Esa modernización, ente otres coses, tien que poner fin a la discriminación del asturianu y del gallego-asturianu coles demás llingües del Estáu.

Lo que teníen que facer pa dar respuesta a esta demanda, pa satisfacer esta reivindicación histórica, nun nos cansa repetilo, ye impulsar un debate ehí, na Xunta Xeneral, pa que se pongan enriba la mesa los nuestros argumentos, pa obligar a los demás a posicionase, o al llau de la sociedá, de los sos derechos democráticos, de la xusticia... o al llau de la intolerancia y la reacción llingüicida. Sabemos que somos más y que tenemos razón de sobra. Y sabemos que vamos ganar esta llucha. Nun nos damos.

¡OFICIALIDÁ!

¡L’ASTURIANU, LLINGUA OFICIAL!

DISCURSU MANIFESTACIÓN LLETRES ASTURIANES 2024.

Llevamos trenta y siete años manifestándonos nestes feches de mayu. ¡Trenta y siete años! Un añu y otru, y otru, y otru... pa poner el ramu a la celebración de les Lletres Asturianes. Unes veces con más enfotu y otres con menos: viendo cómo s’abría una rendixa a la esperanza o asistiendo a un fracasu más de la nuestra clas política que nun ye capaz a ponese d’alcuerdu no que tenía que ser un consensu democráticu básicu.

Dende la Xunta pola Defensa de la Llingua Asturiana queremos davos les gracies a toos y a toes por volver participar nesta xornada reivindicativa, por ser parte d’esti ritu repetitivamente necesariu, nesti movimientu ciudadanu que, a pesar de los años, a pesar de les décades, demostró de sobra que ye neciu y que nun se da. Non, ¡nun nos damos y nun nos vamos dar!

Vamos cuntavos un secretu: tuviemos tentaos de garrar un discursu de la Xunta d’hai diez, venti, trenta años, y aprovechalu pa güei ensin dicivos nada. Quitándo-yos dalgún detalle concretu que dexe saber de qué contestu históricu ye, quiciás nun dibeis notar la diferencia porque les demandes siguen siendo asemeyaes; tamién los argumentos: reivindicar lo de casa, reivindicar la igualdá con otres comunidaes, refugar la esclusión, denunciar la intolerancia...

Nestes más de trés décades de reivindicación avancemos muncho en visibilidá social, sí, pero reculemos en vitalidá real, en númberu de falantes, porque la tresmisión xeneracional de les nuestres llingües, del asturianu y del gallego-asturianu, ta cuasi cortada. A eso xueguen, a allargar l’agonía. Y dícennos: “Esperái otro poco, a ver si nunos añinos... cuando la cosa tea pa la mano...”. Y pasen los años, pasen les décades, y siguen diciéndonos qu’agora nun toca, qu’agora nun se pue.

Venimos amás d’unos años intensos onde, vosotros y vosotres, fuistis quién a galvanizar a tola sociedá asturiana na busca de la respuesta definitiva a una aspiración de xusticia que vien dende la dictadura postrera. Estes cais d’Uviéu, como les de Xixón, tienen visto pasar nos últimos años dalgunes de les manifestaciones más grandes de la historia contemporánea d’Asturies.

El proyectu 2018 qu’entamó la Xunta pola Defensa de la Llingua Asturiana dio pie a un 21 d’abril na Plaza la Catedral y a un 6 d’abril nel Náutico que metieron nos corazones de la xente l’ardor y l’ánimu, la fuercia y l’enfotu. Y, otra vuelta n’Uviéu, un 16 d’ochobre lleguemos dende tolos llugares d’Asturies pa participar na que, si nun fuera pola mezquindá de parte de la nuestra clas política, pudo ser la última manifestación pidiendo la oficialidá.

Pero bien sabemos que tán fácil nun va ser. N’Asturies, cuando se trata de derechos, xusticia y llibertá, nada ye cenciello. Tenemos delantre’l mesmu conglomeráu ultra y mediáticu que lleva mediu sieglu tratando de facenos desapaecer del mapa. La movilización de la so maquinaria de basura y mentires foi escepcional. Son sabedores de que llograr derechos fundamentales llama depués a otres aspiraciones nueves, a otros horizontes nuevos.

La podrén de la intolerancia ta metío peles instituciones y pelos medios, y la pregunta ye: ¿qué van facer los que dicen defender la oficialidá?, ¿qué ye lo que van facer yá, agora mesmo? Nun val con dicir tar a favor y nun facer nada, nun val con ser mui favorable y abrazar les cadarmes ultres nos medios, na escuela y na sociedá. Nun val. Queremos firmeza, coherencia na política llingüística.

Derechos. Tamos falando d’eso: de dar derechos ciudadanos, d’enanchalos, non de recortalos. Agora tenémoslos recortaos, ruinos, probes... porque les persones falantes d’una llingua tiénenlo too a favor y les que falamos les otres, les que falamos asturianu o gallego-asturianu, tenémoslo too en contra. Nun ye abondo col usu ceremonial una o dos o trés veces al añu, nun ye abondo col requexu na programación, nun ye abondo con poner una traducción debaxo pa contentanos.

#manilletres24 #oficialidá #yovoi