Сувайдо туркуми 8 2024 йил билан видолашув Бошимиздан ёғдулар сочган Ташрифларинг кўзим ўнгида. Қанотидан айрилди бир қуш– Уйим куйди кузнинг сўнггида. Ҳали-бери тарқагиси йўқ, Нигоҳимни қоплаган туман. Билиб-билмай заққум ичириб, Биламан, шод эмассан сен ҳам. Эски йилим, янги дард билан Янги йилга қандай борамиз? Кел, иккимиз пана-панада Бир тўкилиб йиғлаб оламиз! Тополмайман дунёни кезиб Синиққина кулгуларини. Рўмол қилиб бошимга ёпдим Унинг тоза туйғуларини. Бор, боравер, қайсидир йиллар Айлантирар танимни гилга. То унгача йигирма саккиз ёшда ўтгум йиллардан-йилга. Ш.Н