الرادود سيد منتظر الموسوي⁦🇮🇶⁩

نزله للامام الحسن المجتبى عليه السلام

نرفع اصوات الولاء. للحسن هذا العزاء
...............

احنا صح تقصير عدنا والله بمصاب الحسن
لكن تعاهدنه نبقه بخدمته طول الزمن
نحضر بليلة مصابه عيونّه لجله بچن
نلطم ونكسر صدرنه ما نوافي المؤتمَن

صرخه دوّت بالسماء. للحسن هذا العزاء
..................

هذا ريحانة مُحمّد هذا مهجة فاطمه
عالحسن مو ماي نبچي كون نبچيله دمه
يالله ياخدام يالله رفعوا هاي المَضلَمَه
ألحسن مظلوم لازم نحيي يومه ومأتَمَه

بالنياحه والبكاء. للحسن هذا العزاء
..................

احنا مطلوبين نلطم للحسن صبح ومسه
من كراماته علينه هالهوى النـتـنـفّـسَه
منهجه وفكره وعطائه للاجيال أنـدرّسَـه
والدليل القاسم ابنه النه اعظم مدرسه

بكربله ضحّه بوفاء. للحسن هذا العزاء
.................

يالله يالشيعي الموالي للحسن ادّي الفرُض
ألطم وغيض المعادي خل يشوف اليعترُض
عالحسن ناحت سمانه شاركت حزن الارُض
والله ما نترك عزائه حد ظهور المنتفُض

لمن يشيل اللواء. للحسن هذا العزاء
...................

عشره عاشوراء عدنا ما يقل سابع صفَر
ألحسن وحسين واحد والله خدمتهم فخر
لا تقصرون بعزاهم يالتخدمون الحذر
ألحسن يحضر عزاكم والحُسين عله الأثر

نستمع من كربلاء للحسن هذا العزاء
.....................

يشفه چبد الحسن يشفه من تذكرون الغريب
هوه هم يحضر معانه. بالمدامع والنحيب
يصيح مامثله مصابك خويه يحيسن الحبيب
راسك عله الرمح عالي والجسم دامي سليب

يا مُعزّ الاولياء. للحسن هذا العزاء

#سيد_زيد_الفحام
_________________________________