منتظر صالح الكعبي

ابو فاظل والحرب طباها
****__

اتسرفن اعله الحرب هوه... وبالخيم جنه ظوه
تختنك كل العساكر... من يجر هوه الهوه

والنفس لمن يجر
كباله كلشي ينكسر
ظل يعاين عالخدر... يكول انتي دللي

راح اجيب الماي كللها واجي
وجيش اميه اله اشبعنه بجي
واختصر يازينب بأيدي الحجي

والشريعه بجربته  جاباها
ابو فاظل والحرب طباها
****__

صعد فوك المهر يمشي... ومشيته جنها نبي
تعجب بمشيته العسكر... كلهم اخذكم سبي

بكيفه للحومه يطب
سوه للعسكر كلب
إنذار دخلها الحرب... كلشي يمه ينجلي

هيبه ابو فاظل ومحله هيبته
بالحرب ياناس محله مشيته
اتروه كلشي لمن نكطت كصته

والخظار بجربته رواها
ابو فاظل والحرب طباها
****__

من ظواه الشمس خجلت ... مثل وجها ما اكو
والله هنيال ابو اليمه... بهيج كافل واخو

مثل ماجابت مره
هيبه سبع الكنطره
كلها تبقه حايره... الشافه غيره ينملي

الشمر ظل يخاف ما يدنه ليه
بالحرب بس هوه ياناس وحجيه
هوه بس الله اليعرفه ويدري بيه

تشرد العسكر تره خلاها
ابو فاظل والحرب طباها
****__

خايفه كلها العساكر... والكلب من رجف
القاده تركض كلها ظلت... وصلاها للنجف

والله هوه شكد شهم
بخزره ركضها الزلم
بالحرب بس يبتسم... اليدنه يمه يبتلي


من الركض بالطف عجاجه اصبحت
لمن كل الجيش منه تشاردت
والسمه بعباس كلها تعجبت

كل ملائكه السمه عجباها
ابو فاظل والحرب طباها
****__

كلها من عنده تحاذر... والله من اسمه تموت
بس علي هوه شبيها... وجنه حيدر من يفوت

ابو فاظل كالذهب
والعساكر كالحطب
الجيش بصوته ندب... عباس هذا لو علي

والعساكر منه بس تبجي دمه
ايده لو شالاها توصل للسمه
فدوه لطولك تكله فاطمه

حجايه وحده بالحرب كالاها
ابو فاظل والحرب طباها
****__

فوك راسه لو نشاهد... ليش ريش هوايه
فوك راسه حطها... زينب ماكو شك بهايه

الحره تجري بريته
هناك طخت ريشته
وما تصح من غيرته... الكمر هيبه معتلي

يندم اللي يم ابو فاظل وصل
مايكسرونه تره هوه جبل
ولذالك وين طاريه وصل

والزلم وسط الحرب بجاها
ابو فاظل والحرب طباها
****__

الرايه من حيدر الجفه ...بجفه محله رايته
السطره من ايده تعور... يادخيلج يمنته

الظده لازم ينسطر
وبيده مسطور الشمر
ابو فاظل كالبدر... هوه هذا وما يلي

الرايه ذكره ظلت وفوك النهر
يشيلها بجفه ابوصالح لوظهر
يصيح هاي الرايه حلوه من الكمر

والكمر للمهدي هوه انطاها
ابو فاظل والحرب طباها
****__
منتظر صالح الكعبي

رقيه لو رحت تبقين وحدج
بس يبقه الحزن يابويه عندج
تسحكين الجمر... سبيه من الزغر... وكلشي ظدج
__****____

تعاي وخل اشبكج شبكه اوداع
رقيه لحظني بويه استعجلي بساع
من نتشابك احنه نخجل الكاع

اشبكج من ردت... واكلج لو رحت
تظلين بقهر.... يسلبوج أسمعت

يورده مدلله... تعذبج كربله
يظربوج شكثر... شمر وي حرمله

اذا اني طحت شيصير بيه
مملي سهام اظلن يا رقيه
َاطيح من المهر... سبيه من الزغر

__****____

يبويه هالصدر هذا التشبكيه
اخر لحظه هايه الي  تشوفيه
بعد ساعه الشمر يتربع عليه

بعد ساعه تره.. اطيحن عالثره
ويجي بحقده الشمر.. يطگني بخنجره

اليقبله المصطفى .. يكطعه من الكفه
مصيبه امصيبتج... واشوفج خايفه

ياذيني شكثر لو داس صدري
وتره من الكفه يكطعلي نحري
ادورلج صبر... سبيه من الزغر


__****____

اذا راسي برمح شالاه هوه
حوافر عل صدر تسحك بقوه
ويظل اعله الرمل جسمي ايتجوه

وخيول تسحكه هم.. ويظل دم ولحم
ولا يبقه عظم... الي الا انهشم

عله سحك الجسم... شمرهم يبتسم
بعد كل الجره... بحالج اني اهم

لون كمل سحك تبدي المصيبه
عله خيمنه تهد بويه الكتيبه
وبحر الظهر... سبيه من الزغر

__****____

عليكم بعد ساعه من يهدون
كل هاي الخيم بويه يحركون
ما يبقه خدر كلشي يسلبون

عدونه لو هجم... ابد ما بي رحم
عليكم بالم... يوجوها الخيم

المصيبه ما تفض... من الخيمه ركض
تطلعين بالم... وجمر كل الارض

بعد ساعه شكثر بويه تركضين
تدرسين الجمر انت وتعثرين
ياوجه البدر.... سبيه من الزغر

__****____

باذانج هالتراجي الحلوه الله
يجرها بقوته بس شيشلع وياه
من كثر الألم تطيحين ويلاه

بتراجيج يجر... وعله العين السطر
ما تتحملين ابد... زغيره بالعمر

يجي اليل شاكو... ولا خيمه وابو
بس نسوان اظن... وبوليه عدو

باجر عالهزل لمن تروحين
سبيه من الزغر وسفه تصرين
وتطبين القصر... سبيه من الزغر

__****____
منتظر صالح الكعبي

كعديه
(للانصار)

هدو سويه... هلمسيه... ذوله الأنصار
كلهم حميه...للزجيه... ذوله الأنصار
انصارك يابو الاكبر... بيهم محتار العسكر

__****____

مثل أنصار ابو اليمه.. شماندور لا منلكه
حقه اغنه شخص يصبح... العنده مثلك والله حكه
غيره هالانصار عدها .. وبوجها تلكه ملكه

منك خذو درس وعبر
يحسين هذا اكبر فخر
وهاي الشجاعه من الكمر.... وهالأمر منهو اليشكه

باب المخيم... كتبو بدم... يابو الاحرار
تعرك كصصهم.. من تكلهم.. يابو الاحرار
نادو يا حيدر حيدر...  بيهم محتار العسكر

__****____

كام يتوجه اعله حبك... بالحرب ابن مظاهر
من نوه يطب الحرايب . كلها صاحت الله ساتر
رغم ماتسعين عمره... تحيرت بيه العساكر

هنيالك بهيج ربع
والشرد من عنده سبع
ظلو يهلون الدمع... شلون تبقه حسين حاير

كلها تحبك... واعله دربك... تبقه للموت
تلكه بكلبهم... انت حبهم.. تبقه للموت
بيهم حقك تتفاخر... متحير بيهم عسكر

__****____

مدرسه بالعشك صاير... ياحسين الغالي عابس
مزك هدومه ودخلها... وجنه طير وبالنوارس
كلها حيرانه العساكر... من دخلها شلون فارس

مدرسه أصبح للخدم
من عنده واحدنه افتهم
صاحب المبدء والقيم... واسسلنه هالمجالس

منهم دمعنه... وكل لطمنه... وحته الادروس
يمهم درسنه... وافتهمنه... وحته الادروس
عابس بالجنه استبشر... متحير بيهم عسكر

__****____

يبو الاكبر هالرياحي... الصار حر هوه اعله حبك
وهذا جون اللظل ينادي...  ياحلات العشك دربك
الفظل مولاي هذا... كله من افظال كلبك

هذا زهير بصولته
عجب يغالي حومته
هوه وبرير بغيرته... بلحرب صوته يندبك

ذلو اميه... اكبر هديه... رفعت الراس
كلهم نشامه... بالسلامة... رفعت الراس
يشبهون الموت الاحمر... متحير بيهم عسكر

__****____

هذا بن عوسجه هذا... الحير الأفكار كلها
وهذا انس يحسين شوفه... شلون فارس من دخلها
بالحومه خله القاده ... ينكلب تدري شكلها

واسلم التركي من يطب
يذلها الزلم وسط الحرب
وياخذهم الديره غرب.. وتنسه هالوادم اصلها

كصو ركبهم... بس كلبهم ... يرجف هواي
خافت زلمهم... لن شمرهم... يرجف هواي
والخايف هوه اليخسر... متحير بيهم عسكر

__****____

عليك كرب يابو الاكبر... ما يرحمك تره العاشر
باجر الأنصار كلها... توكع وما يبقه ناصر
وللذبح انت تحظر... ويسحكونك بحافر
منحرك لمن ينكطع
يكسر الحافر جم ظلع
وزينب تهل يمك دمع
وعالمتن زينب تنظرب.. ومايرحمك ادري كافر

__****____

منتظر صالح الكعبي

لسان العليله مع والدها الحسين.. ع..

بويه شكثر نطرتك... لا ما ترد عرفتك
من روحتك شاب الكلب... ومشبوحه عيني عالدرب

__****____

لمن مشه ذاك الظعن... وظليت وحدي بداري
هم وصلتك عني بعد... جم كلمه عن اخباري
بلباب منتظره تمر...وبلكلب تلهب ناري
ما نشفت عيوني ابد... بروحتك دمعي جاري

وشكثر اني ردتك... عايفني واني بنتك
وحالتي أصعب من صعب.... ومشبوحه عيني عالدرب

__****____

منتظره كل ظني تجي... وترجعلي بويه سالم
يالشوفتك تشفي العلل.. وكلبي بمحبتك هايم
وبحالتك كلبي علم... وكلشي يدري وعالم
بالحلم شفتك بالحلم... فوك الترايب نايم

بالحلم لمن شفتك... متفطره بويه شفتك
والوحدك بين الحرب... ومشبوحه عيني عالدرب

__****____

كل يوم اليمرني تره... يزيد المرض والعله
اشفه وأطيب من المرض... اطولك تره من اصدله
طفله وعفتني بالخطر... وحالتي لا مو سهله
يا كلبك الكلش ترف... حفرته ويلي النبله

كلبك الماكو منه... ما ظنه بعد يلمنه
والسهم بكلبك يطب... ومشبوحه عيني عالدرب


__****____

نمت بمنامي وجن حلم...  شفته وابد لا موزين
متمدد انت عالترب... بحالك شصاير يحسين
ماتهم بجروحك ابد... للخيم مشبوحه العين
شفت  الجروح بكل كتر... يمكن عددهن الفين

جروحك شفتها كثره... اي وحك عطر الزهره
ومتمدد وفوك الترب... ومشبوحه عيني عالدرب

__****____

شفت الشمر فوكك كعد... ومن كعد ادري شسوه
سب وشتم بعد الظحك ... ويكطع بنحرك هوه
وحظر لراسك جم رمح...هايه تراها بلوه
عطشان وتنادي بالم ... بس وسفه ما تتروه

من الكفه يذبحونك... وهواي يطعنونك
بالحومه جسمك منسلب... ومشبوحه عيني عالدرب

__****____

بالنار وجوها الخيم... وما سلمت الكم خيمه
طلعت اطفالك نتحب... وعماتي طرن هيمه
والشمر ماعنده رحم.. ما يرحم اي يتيمه
وشدو اديهن بالحبل ... والشام اجه وظيمه

زينب صدك مسبيه... وسلبو تراجي رقيه
والخيم كلها تلتهب... ومشبوحه عيني عالدرب

__****____

منتظر صالح الكعبي

أحتارت العسكر....يم علي الاكبر

__****____
طبها..
الاكبر بريشاته.... وابتدت صولاته... يادخيل عيونه
محلاها..
بهيبته من يمشي... ما يهم الكلشي... كلهم يهابونه
ما شفنه..
بالبشر اي واحد... يشبها والله الشاهد... بالنبي يشبهونه

والنبي وحيدر... يم علي الاكبر

__****____

شافاهم..
الزلم من لبدت ... القاده كلها شردت... مدري وين الشرده
بعيونه..
لا ميعبر واحد... الشرد واللابد ... شي اكيد يرصده
والزلمه..
لا ميوصل يمه... يخاف هوه من اسمه... فنه يوصل حده

كلها تكتر... يم علي الاكبر

__****____

وبكيفه..
الزلم من مشاها... تبجي من خلاها... شسوه بالخياله
يافنه..
اليدنه يمه اليله... ينكطع كل حيله... فنه من يدناله
من شردو..
بعينه ظل يرصدهم... وحصد يحصدهم... يموت للتصداله

والاجا يتحير....يم علي الاكبر

__****____

سواها..
القيامه عليهم... علي ويبجيهم... هالزلم خلاها
لبسهم..
علي الاكبر شيله... وانكطع كل حيله... القاده من بجاها
اي والله..
علي الاكبر هيبه... يحجي بس بالطيبه... بالحجي ذلاها

انذلو اكثر واكثر ....يم علي الاكبر

__****____

لا ماكو..
بشر يمه سالم... وانكسر بن غانم... وحيرته ياحيره
احتارت..
هايه كلها هالناس... علي وجنه العباس.. علي يعادل ديره
يدعله..
بالخيم عماته... علي وشمحلاته... هالصعب تفسيره

الموت جنه الاحمر....يم علي الاكبر

__****____

منتظر صالح الكعبي

لسان حال الحسين مع أخيه العباس.. ع

ياخويه يالكمر.... من الخيمه للنهر
.شكد صعبه جيتي....

__****____

واكف انه باب الخيم... ولجيتك اني اتنطر
وصوت أسمعت منك تره... ادركني يابو الاكبر
من الخيمه تيهت الدرب... وحالي تراهو تغير
بلكوه جانت مشيتي... امشي انه واتعثر

كل حيلي انكسر ... من الخيمه للنهر.
.شكد صعبه جيتي....

__****____

من عطرك اعرفت الدرب... واعرفت واكع بس وين
وصوت اسمعت من العده... ظليت وحدك يحسين
ايدي عله ظهري انه....ودموعي بوسط العين
متجمعه فوكاك الزلم... طايح وفوكك سبعين

ياحالك بخطر... من الخيمه للنهر .
.شكد صعبه جيتي....

__****____

حطيت بحظني لجن ... ويصعب الحال هوايه
لا ما عرفتني من الألم....وشاب الكلب من هايه
مجروح انت بكل كتر... وطايحه وياك الرايه
مطروح وبصف النهر ... سمعني خويه حجايه

والزمته الظهر.... من الخيمه للنهر
.شكد صعبه جيتي....

__****____

راسك تهشم للاسف... ونصين صاير هالراس
بجروحك ابدا ما تهم... بزينب تهم يا عباس
وشكثر بيه تشمتت... لمن طحت هاي الناس
كل ما اشاهدلي جرح... انهدم يابوالاحساس

واشبع انه قهر... من الخيمه للنهر
.شكد صعبه جيتي....
__****____

جفين ماعندك شفت.... لايمنتك لا يسره
بعد اني شصبر عالجره... كلي الكلب شيصبره
راح اني اظل بعازتك... من اوكع اعله الغبره
بصدري من يجلس شمر... زينب تطر الصحره

ينكطع نحر... من الخيمه للنهر
.شكد صعبه جيتي....

__****____
منتظر صالح الكعبي

(نزال) ل علي الاكبر. ع.

الاكبر لمن طباها... سواها طشار
بكيفه الحرب خلاها. سواها طشار

__****____

طلع من الخيمه... يطخ بالغيمه... يحمل انوار
علي محله طوله.. واليكوله.. مليان أسرار
علي تهابه كلها ...من يكلها... هيبه الانصار
هوه جن محمد... ماكو احد... بوصفه احتار

حير جماله الوادم....سواها طشار
يمه ركع بن غانم...سواها طشار
الجيش من ناداها.... سواها طشار

__****____

بعدها ما جر سيفه... وعله كيفه... الخزره بالعين
براسه حلو الريشه... صاحو جيشه... نشرد لا وين
شو يعادل طوله... كل هذوله... يعادل سبعين
بالشجاعه حيدر... لا والأكثر... يشبه حسين

بس طوله بين الهم.... سواها طشار
الاكبر بسيفه يذلهم.... سواها طشار
روس الزلم نصاها.... سواها طشار

__****____

كال اليدنه يمي... هذا اسمي... قابض الارواح
علي محله عطره... جنه شجره... جنه تفاح
كلها شردت منه... اليدنه يمه... فنه يرتاح
الشمر اول واحد... شفته شارد... مدري المن راح

لوين مدري الشرده ... سواها طشار
اليشرد بعينه يرصده.... سواها طشار
كل الزلم رصداها... سواها طشار

__****____

رادو يغدرونه ... ويحيرونه... بس ماكدرو
ابد ميكسرونه.... ويعرفونه... بيده انذلو
بس عليها الشرده.... واعله اللبده... كوه انجبرو
شاب وبشبابه... كلها تهابه... يمه انكسرو

حير عقول القاده... سواها طشار
كل هيبته من اجداده... سواها طشار
روس الزلم جاباها.... سواها طشار

__****____

ما ااكو بغلاته....وبحلاته....حيرها الناس
علمه من الزغره... ولحد كبره.. عمه العباس
مملي هوه غيره... كلبه ديره... يملك احساس
رجع نازف دمه... تنحب امه... لطمت الراس

اتروه من الكوثر... سواها طشار
يم فاطمه ويم حيدر... سواها طشار
جروحه من رواها.... سواها طشار

__****____

منتظر صالح الكعبي

(ميمر)
الانصار

التمو سوه... جنهم ظوه
واسمك يشمونه هوه
انصارك وخوش أنصار.... خجلو حته الخيمه

__****___

باب الخيام شلون لمه التمو
مجلس عله حبك تراهم سوو
كلهم عطاشه بحبك من اتروو

باسمك حجو... واتأكدو
اتروو لمن باسمك قرو
منهم تشع الانوار...وظوو ظلام الهيمه

__****___

شيخ الأنصار وهيبته محلاها
مشيب لاجن ذيج الحرب طباها
ترجف رجف من عنده شو خلاها

كل الزلم... شو تنهزم
بحالك (حبيب) شكد يهم
شيخ ويعادل آلاف... متروس رقه وشيمه

__****___

انت تعرف ب (عابس) وبعلومه
بين العساكر شككاها هدومه
عابس درس أصبح مثالي بيومه

ذب الهدم... والله شهم
من درسه كلها تفتهم
بحبك تجنن للموت... وينكط وفه جن غيمه

__****___

هذا (زهير) الشهم وانت تعرفه
هوه و(برير) الروحه كلش ترفه
و(مسلم) صعب يحسين كلش وصفه

بهذا الظهر... ذلو شمر
شكد بيهم احتار الفكر
والعنده مثلك صحبان ... ينجلي حتماً ظيمه
__****___

يحير عقول الوادم (النصراني)
باب الخيم تلكاه شكد متاني
يال بيك كلك كمل كل ايماني

والله عجب... منه (وهب)
نصراني بس جنه ذهب
بالحومه يشبه عباس... من الكفل تعليمه

__****__َ

هنياله (جون) اللي عشكها عيونك
حب موت انصارك تره يحبونك
وشكثر انصارك تره يعشكونك

انت العشك... وانت الصدك
بدونك الكلشي تختنك
يدعون الك بكل يوم... حبك الله اللي يديمه

__****___

منتظر صالح الكعبي

لسان حال الحسين مع حميده.. ع..

أيسي ما يرجع بعد.... من فوك القصر طاح
من الألم جبده انمرد... وعليه شكثر صاح
ظل شكد يكابر... طاح وما اله ناصر

__****___

وصل... خبر... من عنده
الدمع... تره... ميرده

ضمي دمعج يالحبيبه
وصير من هسه غريبه
كلفه باجر هالمصيبه

وصل من عنده هالمرسال...شفته ودمعتي بالعين
اول كلمه ب المرسال... احبك يبن عمي حسين

بالرساله شكد دمع.... باقي يشرح الحال
حاله يشرحلي الوظع... بس يمج تره البال
كلبج بعد ليناطر.... طاح وما اله ناصر

__****___

ادي... بحبل...مشدوده
الورد... ذبل... بس عوده

ايده جتفها... حبلهم
غيره ميملكون... كلهم
الكوفه معروفه بغدرهم

القائد صدر أمره وكال... مسلم لازم نغدره
وحده هناك بين الالاف... ابوج تحير بأمره

مصايب ولوعه حمل... مهظوم شكثر اه
باقي وحده بلا اهل... ياغربته ويلاه
ظل بمدمعه مساهر... طاح وما اله ناصر

__****___

بحقد...تره... من أذو
بعجل... غصب... من شمرو

من اجته المغربيه
عالترب جسمه رميه
عينه مشبوحه عليه

طاح من القصر للكاع.... وصعبه طيحته جانت
ما رحمو ابد حاله... هناكه ساعته حانت

عالترب لمن وكع... بكلبه كثره الاجروح
كلبج بهاي انفجع... باقي بدمه مطروح
مات وكلبه ظل حاير... طاح وما اله ناصر

__****___

اجه... علينه... عاشر
اظل... انه... بلا ناصر

باجر اوكع عالترايب
ويمي ما الكه حبايب
مثله لا اخوه وكرايب

وانتي وي رقيه با اه... بنات صغار بالخيمه
يحركون الخيم بالنار...وتركضن باجر بهيمه

باجر تركضن غصب... وبثوبج تره نار
وبس جمر كله الدرب... وانتن كلش ازغار
الجن كرب العاشر...طاح وما اله ناصر

__****___

السبي... الج... ميرهم
الشمر.. ابد... ميرحم

والسبي دروبه بعيده
وي رقيه ياحميده
وثارج المهدي يعيده

باجر للسبي ترحين... واسمعي الخبر من عندي
ثاري وثار ابوج هناك...يظلن دين للمهدي

المهدي باجر لو ظهر... يبدي ويأخذ الثار
يبدي من ثار النحر... ويعرف كل الاخبار
يبدي يحاسب الحافر... طاح وما اله ناصر

__****___

منتظر صالح الكعبي

ظايع انه بلا مجلسك... تدريني يحسين
يل كل حياتي اتنفسك.. تدريني يحسين

__****___

يحسين تدري بمجلسك.... بي راحتي النفسيه
شمحلاتي من اكصد انه... للمجلس ويوميه
مهموم اطب لمجلسك...واطلع مرض مابيه
يعني طبيبي مجلسك... صدكني يابو رقيه

اتشافه اني بهالعزه... تدريني يحسين
مجلسك اكبر معجزه... تدريني يحسين

__****___

اليوم اليمرني بلا عزه... ما ينحسب من عمري
جفي يعاتبني عجب  ... من ما يدك بصدري
بيتي وحياتي مجلسك... يحسين بيه تدري
بطن امي من اني جنت... سلمت بيدك امري

اسمك لفظته اول اسم... تدريني يحسين
خدمتك بس عندي المهم... تدريني يحسين

__****___

خليني دوم بمجلسك... وبخدمتك خليني
خادم لخدامك بعد... وبكيفك تسميني
امسح نعل افرش بسط... ماريدن تعليني
عالصح يمولايه انه.... محتاجك تدليني

ثابت اريد بخدمتك... تدريني يحسين
مغركني انت بنعمتك... تدريني يحسين

__****___

بنتك رقيه محلفك... بالخدمه اثبت رايد
الزلمه مو كول وفعل... بالخدمه وانت الشاهد
نعمه المجالس سيدي... والكلب ناوي يعاهد
الكلب واحد بس يحب.... وهوه انت هذا الواحد

من رحمتك ما انحرم... تدريني يحسين
بهالخدمه رايد التزم... تدريني يحسين

__****___

جم يوم مرني بلا عزه... وبلا لطم لا دمعه
اصبر شلون واحتمل ومحمبوبي منرض ظلعه
الخادم الصدكي بخدمتك.... يوميه مجلس طبعه
اليخدمك عنده طبع... ربع المجالس ربعه

واظح انه عندي طبع.... تدريني يحسين
صدقاني همه احسن ربع... تدريني يحسين

__****___

اتمنه اموت بمجلسك... وبمنبر يشيعوني
محلاها هاي الامنيه... وساداتي الا يحظروني
وشكبره حظي سيدي... شباجك يزوروني
وزيارتك يقروها الي... لو رادو يدفنوني

تحظرني أريدك بالكبر... تدريني يحسين
تعبرني بيدك بالحشر... تدريني يحسين

__****___

منتظر صالح الكعبي

ليلة ام البنين
بعد رجوع الضعن إلى المدينة كأني بمولاتي ام البنين تسأل مولاتي زينب عن الحسين(شلون مات الحسين😭)

شفته من بعيد... من ظل وحيد
محبوبج طايح من مهره
يم الكافل فوك الغبره
شفته بعيني

__****____

اعله حسين شحجيلج انه وحالته ياحال
كسروله ظهره بكافلي ياويلي الانذال
يشمتون بيه ويلي العده جي وحده ظال

باحظانه ذبحوله طفل... وحاله أبد لا مو سهل
متحير اباب الخيم...يا وسفه ينظرله النذل

ودعني وراح... مملي بجراح
ودعته اني بالحسره
يم الكافل فوك الغبره

__****____


ودعني للحومه مشه وعينه اعله الخيام
وبكلبه صابوه بسهم هشمله العظام
ومن مهره طاح اعله الترب من كثر الآلام

طايح يويلي عالترب... والسهم نابت بالكلب
ويتجوه ظل اعله الرمل ... وبحجار وجهه ينضرب

ظربو بحجار.... والغبره نار
وبكلبه استعرت جم جمره
يم الكافل فوك الغبره

__****____

كل هذا بيه اللي جره بس عينه  لينه
يكوم ويطيح من الألم محد يعينه
انظرله من التل كمت وملوعينه

وتلوع حسين اشكثر... وجروحه كثره بكل كتر
من راسه وصلن للجدم... ويفتر عله راسه الشمر

سل سيفه وصاح... جيتك ذباح
حاقد رايد يكطع نحره
يم الكافل فوك الغبره

__****____

ثنه اعله صدره والنحر رايد يكطعه
بغظاً يكله بحيدره ناده ويسمعه
جر لحيته بكل قوته هدمني وضعه

حيل الشمر جر لحيته... وانصبغت بدم شيبته
عنه شسولفلج بعد... آه يا مصيبه مصيبته

بي لو تدرين... عطشان حسين
كطعو نحره وهشمو صدره
يم الكافل فوك الغبره

__****__
خيول اعوجيه حضرو وتوجهو ليه
وخلوهن بعيني شفت من دبچن اعليه
وصدره انهشم من السحگ وشحجيلج اشبيه

وضلوع صدره اتهشمن... جنهن ظلع ام الحسن
وهم مثل ابو فاضل شفت... حتى جفوفه اتكطعن

هواي تغير... گطع المنحر
وجثته اعله الكاع ومتوذره
يم الكافل فوك الغبره

__****____
ظل دامي مرمي ابكربله  مو قصه سهله
لا منحفر كبره ولا واحد يغسله
حد ما حضرله ابنه علي وقرر يحمله

مكسور گلبه وألمّه .. اوصال بيده لملمه
وشاله بحصيره للکبر .. وبگلبه نيران الضمه

ويظل ثاره... وثار انصاره
من يظهر مهدينه اينصره
يم الكافل فوك الغبره
__****____

منتظر صالح الكعبي

(كعديه ) أم البنين.. ع...

عباس أريد أوصيك....يمه بوصيه
الكربله لمن ترحون... يوليدي لا لتقصرون
بالغاظريه

__****____

قبل لا يمشي ظعنكم... مني أسمع يابوفاظل
أنت من قبل الولاده.. منسب الزينبنه كافل
وانه ربيتك ييمه.. الكربله سيد المراجل

من الزغر أني معلمتك... لحسين توفي بخوتك
وهناك أعرف وكفتك... وبالوصيه انت قابل

ماشين وي العيله... بهاي المسيه
من الزغر انت مديون... يوليدي لا لتقصرون
بالغاظريه

__****____

عينك اعله العيله...بهالطريق أني أريدك
ولو ينادي حسين بأسمك ... حطها أعله الراس أيدك
أني أعرف حب أخيك.. يمشي بالدم وي وريدك

شما يأمر تكله نعم... ولتخلي يوصله الالم
وفوكاه رفرف بالعلم... الله يامحله عظيدك

كون العقيله للدوم... متشوف الاذيه
لزينب فياي تصيرون... يوليدي لا لنقصرون
بالغاظريه

__****____

وذيج يايمه العساكر... أنت من طب عليها
كون ترجف كلها تبقه ...وتنسمع صرخه بجيها
كون كالموت انت الاحمر.. هالعساكر تطب ليها

يمه الشمر وي حرمله... تبجيهم انت بكربله
وسوي يوم الزلزله... وصنطه ما تسمع حجيها

مرظعتك اني غيره... يالتدري بيه
العسكر اريد يشردون... يوليدي لا لتقصرون
بالغاظريه

__****____

لو ينادي عليك باجر... الشمر ويكلك خوالك
ابد أنت لا تسمعه... شما عمل وشما حجالك
لا تخلي كبالك احد... حسين بس هوه لكبالك

ونعم من عندك بعد... لحسين صير انت سند
كرب تره يوم الوعد... أروي بجفوفك عيالك

الماي يمه جيبه... لسكنه ورقيه
بس لا هناك يعطشون...يوليدي لا لتقصرون
بالغاظريه

__****____

درس للأجيال تصبح... بوفائك يمه باجر
من تفرحني بوكفتك... وما تخلي حسين حاير
وكلها هالاجيال تندب... يااخو حسين المناصر

من توفي انت بخوتك... تصبح درس ياغيرتك
وللموت تبقه سيرتك... وتبقه تقرأها الظماير


يذكرونك أجيال أجيال بكل عزيه
من غيرتك يدرسون... يوليدي لا لتقصرون
بالغاظريه

__****____

يمه ياعباس باجر... من تطيح اعله الشريعه
السهم يعميهن عيونك... وصعبه هناك الفجيعه
بالعمد راسك تهشم... ويلي جفوفك كطيعه
وحسين ظهره ينكسر
وبعدك وحيده ام الخدر
وبعدك يجي درب أليسر
وعالمتن زينب تنظرب.. وما يرحموها الوديعه

__****____

منتظر صالح الكعبي

ميمر...

ماينوصف ... ذاك الترف
خله الزلم ترجف رجف
وشلون اوصف عباس ... يا هيبته ويا طوله

__****____

ماينوصف عباس لا والعباس
لا بالحلم لا بالصدك لا بحساس
عباس واحد واحد مثله ماكو بهالناس

لا والحسن... وأم الحسن
عباس بس هوه وطن
والوطن يتنومس بي... وعيونه هي مسأوله

__****____

عباس نور المايظيع بظلمه
صاحب علم محد وصل يم علمه
مايهم بالدنيه حبيبه يهمه

أشكد وفي.. وما يكتفي
ولو بزغ كلشي ينطفي
كبش العشيره الوفاي.. حسين وعلي يصيحوله

__****_____

عباس وبعباس مرات يهيم
عباس لو شال ايده توصل للغيم
وزينب تكله لوكفتك الله يديم

كالت اله... المدلله
الله يعلي المنزله
تدعي اله زينب دوم....يادعوه المدلوله

__****_____

هيبه الجسم ماشفت من عده بيوم
بيديها زينب فصلت لاجله هدوم
أفصال الملابس يمها بس ضل معلوم

من فصلت... متحيرت
جابت الكون وكدرت
رهمن هدومه الوفاي... معطرتهن المكفوله

__****_____

عباس من يتنفس الطف يختل
لو جر نفس حته الارض  تتزلزل
عباس مو بس حجيه كله  معدل

يجر النفس... الطف اختلس
واختنك كل ذاك الحرس
خنكه غدت بارض الطف... اطينه إلهوه يكلوله

__****_____

السيف لمن صال ابد ماشاله
بلايه سيف وعجب الخياله
محد كدر منهم يظل اكباله

وبخزرته... وبنظرته
يموت اليشاهد ريشته
خزرتهم الريشه بموت... وعباس ما يدنوله

__****_____

وجه العساكر كلها صاير اصفر
القائد نطق هالموت اجانه الاحمر
واحدنه من عباس خله يتحذر

القائد حجه...الموت اجه
ادركنه من عده ارتجه
يترجه ظل بعباس...والقائد ايتجوله

__****_____

صاحوله ياعباس بسك كافي
يمخلي حته الخوف يركض حافي
يل ذكرك بعز البرد شو دافي

لا مااكو... مثلك اخو
يكولون انت من البدو
لا عربي وسيد اعراب... فدوه اله كل ذوله

__****_____
منتظر صالح الكعبي

(شوط كربلائي)

طلع من الخيم عباس... يستأذن ابو الاكبر
يكله خويه اريد اليوم... أجيب الماي للخدر

__****____

يستأذن كمر زينب...هاللحظه باخوه حسين
يكله رايد بسيفي...اشكن هالعده نصين
فقط أئذنلي ياخويه... وتعرف باخيك زين

واجيبن ماي كلاله
وبقه يسلم عله عياله
هلا بعباس ناداله

هلا بالحشمته اخته... ومنها لا ميتعذر

__****____

خذه اذنه وطلع ليهم... وجربه اعله الجتف شايل
وبس شاهد خياله الجيش... صاحو علي هالنازل
واحد كال عمي لا... اجانه هسه ابوفاظل

تره بس بين خياله
اعتذار الشمر وداله
ومن وصلت الخياله

شك بيده اعتذاره وصاح... اني الموت ياعسكر

__****____

طب عليهم وكالموت... وبده ساعتها كل الشرده
واللي ما كدر يشرد... راح يدور اللبده
اليشرد واللبد ياناس... بيده الكافل يرصده

يرصدهم بقه بسيفه
الحومه ظلت بكيفه
هذا من أمه تكليفه

مكلف هوه من مهده... وبقه لهل يوم يتنطر

__****____

الشمر وحرمله صاحو... نشرد بس لجن ليوين
حيل من الركض ماظل... بعد متعينه الرجلين
كل شي صاحو بعباس ... ما تكدر له اي سبعين

ياهو يدنه للكافل
ياعالم  أبوفاظل
جنه حيدر الكامل

بوصافه طلع عباس... جنه والده حيدر

__****____

عمر بن سعد ظل يصيح... شيريد اطوه وشيأمر
يصعد بقه عالعسكر... وفوك الروس ظل يعبر
القائد هسه ظل صافن... شلون بجيشه يطشر

كلشي شافه ظل حاير
وظل يعاين شصاير
الموت الليله متكاثر

يعاين صولت العباس...اليريد يعبره ما يكدر

__****____

العجب بالحومه شنهو الصار... كلها شردت القاده
بالحومه فقط هوه... سيد صار عالساده
انه حيدر انه الموت.. عليها هسه من ناده

القاده شردت بسرعه
الشمر خاتل وسط ربعه
يتختل وسط جمعه

انقذوني يصيح بصوت... ذاك الجان يتأمر

__****____

صاح الكافل بصوته... وسمعت كلها هالكلمه
الشرد من عندي ياهالناس.. هذا ابد مو زلمه
عيب نعده عالشجعان... وعيب نعده عالحرمه

ومن طبها الكمر ولهان
كلها شردت العدوان
هذا بن كمر عدنان

دنكت كلها ذيج الروس... الشمر بروحه يتحسر

__****____

منتظر صالح الكعبي

(أم البنين)

من ردلي بشر وبيا وضع جان
رحت اني اله وگليبي لهفان
تكابلنه سويه ... لمصاب الغاظريه

__****____

من بشر صوته سمعت... بسرعه أني اركظت... لباب المدينه
عل الجتف جان الفظل..دموعه ودموعي تهل ..واسمع ونينه

من أسمعت ناعي المصيبه من  اجه
اركضتله وشافني ولا ما حجه
وكتله سولفلي على حسين وبجه

سولفلي كلتله وسكت من شاف
عله أولادي أموتن لو حجه خاف
أنه منتظره جيه... لمصاب الغاظريه

__****____

كتله سولف يابشر... ونزلن دموعه حمر... شو بده بعون
كتله ما ريد الولد... رايده حسيني يرد... خل يموتون

كال جعفر عفته طايح عالثره
كتله سولفلي عله حسين شجره
عظم الله اجرج بسبع الكنطره

كلي ومن سمعت بكافل أخته
كتله يا بشر كلبي فطرته
فهمني القضيه... لمصاب الغاظريه

__****____

كتله فدوه تروح اله... ولدي كلها بكربله.. بي شنو صار
بالولي شنهو الحصل.. فدوه لتكلي انجتل ... وبالخيم نار

كلي رد من النهر بس محني رد
أنكسر ظهره كلي وكلبي نمرد
كلي طيح من خيامه العمد

من بعد ابوفاظل سولف هواي
حسينج تره ظل بعازه الماي
بقه بعازه أخيه.. لمصاب الغاظريه

__****____

الدمع احمر يصب... كلي طاح اعله الترب.. ومملي بسهام
وشمر كاعد عالصدر.. والوكت جان الظهر...تحومه ظلام

من الكفه ياوسفه كطعوله النحر
كتله كافي يابشر ظهري انكسر
وبجبهته كلي مطبوع الحجر

كلي الوحّده وتحيطه عدوان
ويرمونه بسهام منين ما جان
فوك الوطنيه.... لمصاب الغاظريه

__****____

انفاسي كلها خلصت... وعشرتي كلها انتهت.. بهاي المصيبه
والمن اتنطر بعد... باقيه اني بس جسد...شكد عجيبه

لجيته حسيني بعد ماانتظر
الجسد راح ونام ويلي بالكبر
وملتقانه يصير باجر بالحشر

يم فاطمه باجر التقي وياه
واصيح بصوت باجر واحسيناه
وي امه الزجيه.... لمصاب الغاظريه

__****____
منتظر صالح الكعبي

ما الكه مثلك وين مااروح
يالعايش أنت بشكل مذبوح
لتبعد كلبي عنك .... أبد لا ماكو منك

١__****____

دورت بالدنيه مثلك ماأكو
مره كلي تصير انت ومره أبو
مره أهلي ومره ناسي ومره أخو
مكتفي اني بحظرتك وكفو

هنيال بيك هواي هنيال
بالباقي ذكرك دوم عالبال
يروحي وروحي جنك .... أبد لا ماكو منك

٢__****____

أنت تتقرب اللي واني بعيد
والحيات بدون شخصك ماتفيد
لخاطري عبدالله صابو بالوريد
اه يسهم الصوبه فرح يزيد

لأجلي أني أبنك دمه مهدور
مو سنه عمره وليدك شهور
رواه الدين أبنك .... أبد لاماكو منك

٣__****____

يلي سويت البناتي أنت ستر
وعالمودي بنتك يطكها الشمر
تركض من الخيمه مدري اليا كتر
سالم أني وهيه داست عالجمر

جرو تراجيها من أذنها
واصياط أميه لوعنها
تنادي وينه حظنك .... أبد لا ماكو منك

٤__****____

طايح أعله الكاع والخيل أعتنت
كلت يسوه الدين من بيك سحكت 
سور فوك الكاع من طشرت
الخاطري يحسين روحك فرفحت


لخاطر أعيش بروح حره
داست عليك خيول عشره
جبير هواي أظنك .... أبد لاماكو منك

٥__****____

حافر كليبك حفر ذاك السهم
سالم اني  وصدرك بخيل أنهشم
وحارك لأخاطرنه مو خيمه خيم
الحمدلله وصرت أني من الخدم

يالأمنه أنت بكلب مجروح
ولخاطري أختك للسبي تروح
وصل للخيمه ونك .... أبد لا ماكو منك

٦__****____

كلها أسرار الخلك يمك بقت
وصوت جم علويه بأسمك ناشدت
بالجثث أختك مشت وتعثرت
بليل طلعت عن خظابك دورت

محنيه ودور أخوها
وصلتك والخياله أجوها
جبير هواي حزنك .... أبد لاماكو منك

__****____

منتظر صالح الكعبي

يوم طب عليها.... حير اللي بيها
عباس عباس

__****_____

عله العسكر ظل يعاين كال مايكفي العدد
ظل يحاجي حسين أخيه خل يزيدوهم بعد
كله خويه بهيده فدوه الموت من عدك شرد

...هالعسكر لا ميكفيني

__****_____

زلم لو نسوان ذوله كل خويه ما عرف
كله متأكد بهايه الزلم ما ترجف رجف
أني تاركهم الهسه هذا من عدي لطف

...  لبسهم الكافل شيله

__****_____

الشمر كله  خوالك والزلم محتاجه خال
كله ياهم انتو منهو بهالروايه منو كال
شنو ياهمه خوالي حسين شاغلي البال

... لحسيني فدوات عيوني

__****_____

شيطلب العباس يطلب كلها تهتفله نعم
سيف ما شايل عليهم سيفه عافه بالخيم
هذا كله وماكو سيف ومن أدي محد سلم

... يعصرهم كلهم بيمينه

__****_____

عله خشوم الزلم كلها ابو فاظل من صعد
محد اليدنه يمه الجيش شو كله لبد
أهتزت الدنيه بركظهم وكفاها بالعمد

... ركظهم كلهم حفايه

__****_____

كربله صارت عجاجه من ركض جيش العده
الشمر كلهم كلها تركض عرف هذا موعده
مدري وين الشرده صارت وهوه بعده مابده

... شردهم الابعد ديره

__****_____

أهتزت السبعه وارضها حين جرأه النفس
عجبه صارت هسه عجبه الموت من عده أختلس
أختنكت الخياله كلها والهوه عنها أحتبس

... خنكتهم خزرات عيونه

__****_____

حير الجيش بجماله شهالجمال الشايله
شيطلع الكافل وزينب هيه ظلت تدعي اله
أحله من الكمر هوه وعجباها كربله

... حيرها عباس الوادم

__****_____

منتظر صالح الكعبي

لسان حال السيده زينب مع مولاتنا الزهراء عن السيده رقيه..ع...

لحكي ل رقيه....يمه الزجيه
يفتر عليها ظل الشمر....هاي المسيه

__****_____

شكد رقيه مدلله...منين اجتها كربله
عالدلال اتعلمت مو عالمصايب
حسين ودعها وطلع...ويا كلبها من انفجع
هواي يجرح يمه توديع الحبايب
عالراس من الطمت..راح ابويه صيحت
جنها تعلم بي وكع فوك الترايب

من بعيد وشافت الشمر اعله صدره
بيده سيف من الكفه يكطعله نحره

فوك الوطيه....جثته رميه
لمن هوه من عالمهر....هاي المسيه

__****_____

من شفتها تحيرت...عل ابو هواي أسالت
واني اصبرها وآكلها هسه يرجع
وهيه متأمله يجي...وتخبره بكل الحجي
واني من اشكيله كالت مني يسمع
كل املها من يرد...هواي هيه تنسعد
ومن يروح النفس كالت مني يطلع

تنهظم لو مايرد تكتلها حسره
عله فراكه الكلب يايمه شيصبره

ظلتله هيه....منتظره جيه
وتحركه شمس الله الظهر....هاي المسيه

__****_____


حركو اعلينه الخيم...ومنها اتجوت جدم
والحرك هالطفله ما شافت فرد يوم
جفوفها هم انجوت...وبالصحاري اشردت
بالفله ظلت رقيه طيح وتكوم
دوس كامت عالجمر...وياوضعها شكد خطر
من التعب ما تكدر وهالكلب مألوم

لون عثرت اني خاف ارقيه تنداس
ساعه تنشد عن ابوهه ساعه عباس

والاعوجيه....بلا حميه
خافن يدوسنها بغدر....هاي المسيه

__****_____

يركض عليها الشمر...وكامت دور ستر
والخيام محركه وبالهيمه ركظت
بيده صوطه شايله..وهيه هامت بالفله
عمت عيني بلهفه ومجويه طلعت
صوط لا ما ينحمل...وهيه ما شافت قبل
من ركض وصوط ها يايمه تعبت


كأم ويدور حسافه بس عليها
وهيه جان حسين بس اليحجي بيها

شكد خطيه....شافت اذيه
مهيوبه جانت بالخدر....هاي المسيه

__****_____

جابو الها اخشن حبل....والحبل لا مو سهل
أيدها مجويه ويلجم حبلهم
ازغيره أصابعها تره...ومن اديها الدم جره
بسكم وكافي ييمه اني اكلهم
ضحكو عليها شكثر...عيونها صارن حمر
ابد لا ما بي رحم يمه نذلهم

رقيه راح تنام باجر بالصحاري
دم أذنها ما نشف ظل لسه جاري

يمه اليتيمه....تنجر هظيمه
بس الله انطاها صبر....هاي المسيه

__****_____

منتظر صالح الكعبي

(لمولاي ابا الفضل العباس)

كومً ياعباس وعوف النهر
حيل ماظلالي وضهري أنكسر

__****_____

كوم عوف النهر وارجع للخيم
حيل ما ظلالي وحيلي نهدم
كوم شيله عل متن خويه العلم
وانظر عليه انكسر مني الظهر

__****_____

سكنه ظلت بالخيم تدمع العين
كوم رد عليها يحزام الحسين
شراح اجاوبها اذا سألتني وين
طفله ما شافت ابد ظيم وقهر

__****_____

كوم هاي اعداك بينه تمشت
كالو العباس طاح وهوست
باقي الوحدك عليه صيحت
كوم ضوي سنيني ياخويه الكمر

__****_____

كوم عبدالله الطفل يسال عليك
كوم حطه خويه انت بين أديك
واني اعرفك ما تردني من اجيك
وراح يحفرله السهم خويه النحر

__****_____

ولون ويايه يخويه ما تعود
راح اطيح خيمتك منها العمود
والاطفال التنتظر تترسها جود
وبفركتك يعكس ويانه الدهر

__****_____

يعني اطيحن بعد ساعه من المهر
بسيفه يظل يفتر عليه الشمر
شلون لو يكعد يخويه عل الصدر
شلون لو عالغظره دمي انهدر

__****_____

بعدك خيامك تره يحركوها
وزينب اعله الهزل يصعدوها
بلا رحم بالحبل لو جروها
عيونها ما تغفه وتظل بالسهر

__****_____

منتظر صالح الكعبي

عندما وصلت الزهراء لمصرع الحسين ورأت الشمر على صدر الحسين بدأت تتكلم مع الشمر...

مو كافي أكطعت نحره....شعدك كاعد بصدره؟

__****_____

بله وخر يا شمر...شعدك أنت أعله الصدر
كافي ما كفاك من اكطعت نحره

وخر وعوف الابن...خله أحطه بالحظن
الترب حار وخايفه تجويه الغبره

بله ما كفاك كطعت منحر أبني
وخر وخليني احظننه بحظني
وخر هواي الظلع هسه لجمني

ظلعي رايد أتكسره...سيفك شيله أوخره


__****_____

كلي هسه وخرت...وخيل عشره حظرت
كلي شوفي شلون أوذره عالوطيه

خَيل واثكيله وزن...الف وميه رطن
وآله أرظه الليله رض ها يالزجيه

كلي شوفي الخيل ابد لا ماترحمه
راح اوذرنه تشوفي انتي أمه
حتى صدره شوفي هسه شلون اهشمه

كلي خَيل اجت عشره..لا مترحمه وتوذره

__****_____


الزلم هدت عالجسم...وشفت صدره ينهشم
وكلي شوفي شلون ابنج وذريناه

هدومه شوفي تسلبن...وعل جسمه تلاعبن
وكلي هال فوك الترب هم طشريناه

والله لا ما خلي شي بحسين سالم
وآله اخلي بخيمته تفرهد الوادم
وأخته ما بين الزلم تشبع شتايم

شوفي شلون الوعنه...بغظن راح اكطعنه

__****_____


اظلوع شوفي تكسرت...بالخيول اتطشرت
كافي وخر عوفه لا تدنه يمه

ماأكو بكلبك رحم...كلشي بابني ماسلم
ليش كالساعه ترد انت وتلجمه

وخر ورد محبس ابني لعد أيده
اسكينه من تشتاك هيه هم تريده
والعليل البلخيم تدري اوليده


فوك الترب اوصاله...خلي اتجمعه اعياله

__****_____


ليش جايبلك رمح...تزيد بكلبي جرح
وليش فوك الرمح رايد تحط راسه

شني ماكفه الذبح...تريد زينب تنجرح
والحسين اعله الترب متوذره ناسه

كلي راسه بالرمح هل راح أخليه
وين عباس الكمر خل يلحك اعليه
يظحك وكلي كطعنه حتى ايديه

خل يلحكله عباسه...هل فوك الرمح راسه

__****_____

منتظر صالح الكعبي