من_یک_پلدختری_ام

#مرغ و #روباه

✍ نورمحمد محمدى نژاد

قرِی مُــــرغ و مِلیچ داشتِم بِهارِی
گُتِم سی نو وِریشت شوم و نهارِی

بِرِه میرَم فِرِختْ سی دِرکِ دونشو
چنو مَس وین قسم حَردِم وِ جونشو

گُتِم، دیر، کُلکُلِه ســـــی خاوِلیشو
بَساز،وِم نَزِنِیه ، بــــــو چُغِلیشو

یِوارِه مــُرغِیـــان کِـــردِم دِ لونه
بِئَستِم کُلکُلَن اومـــام وِ حــــونه

دِ تو جا هِی شِمَردِمشـــو وِفیسه
کِ نیزَه مُرغ سِـر و کَلشیرِی، بیسه

چِهار پَنج جیجه هم داشتــم دِباشو
وِ زُر چـــــینه کِنَن روز دِ نِهاشـو

دِلوفِم بُردْ گِرِی بی حال و هوشِم
کِ یه هو شِرپِ کوت اوما وِگوشِم

وِریسائیم حِراســــوکار همه مـو
رُوا کَلشیـــردِ قَپ جِس زَه وِ قَمو

اُ شو تا روز اِنـــوس نَرَت وِ چَشِم
دِ غُصه کِلِشیر چــــــی کیرَه تَشِم

رُوا کـِردی وِ مِختـــه جیجه وَرمو
سِچار گِل هی چنو آورد وِ سَرمـو

دِشو حَردو دشوکُشت و قِری بُـرد
دِشو هم دِی دِرِوَچیل چنو مُـــرد

گُتِم میـره مگـــر بیســی وِ بَنِش
اگــــــر اومـــا رُوا بُوِری گَنِش

تفنگ بـرنـــوکُله داشتیم وِکار وی
قِرِی شنگ چی طلا هم دِ قِطار وی

پِیا یه شــونِشِس بِرنــو دِ مُشتِش
تِفَنگ پوقِس خیال کردم که کُشتِش

ســـرم رت وادیار وِ قیـــژه وارِه
دُواره بُـــــــــرد رُوا،زَه وه بِنارِه

هِمَن حـَردی رُوا مَنــــی و چَنشو
جُل وجان بُرد پیا ، شُو وَن دِ هَنشو

نِزیک یه هفته تا شوصـــو بیار وی
رُواکَه حاوه مُـــردَن ، نه دیار وی

چنـــی چَن شـــــو نگهبو بیخیاله
وِخوش گو دیه نِدِرنیم مُرغ ،مِحـاله

وِدَســـــه این تفنگ یِ تَسمَه نوئِه
خِوَر نارِی که داشت چه رنگ وبوئِه

بِـرِه وُ نِوِره خــــــــواوِش نگهبو
رُوا یا وِ غــــِرِ دور شیـــــرِ دَبو

دِزیــــــربالِشت پیا تَســـمه دیاره
رُواوِرکَشـــــــه بـرِنــوئِن دِراره

وجو ریتکه اِســــــونه دِش تِفنگِن
گوتم دیه بیا تمومکه نـــــومِ نَنگِن

سِچارمُرغ مَنه بیل دیـئه وِ جــاشو
تِفَنگ کِ بهتــــره دِه خینِـــــواشو

#رادیو_پل
#من_یک_پلدختری_ام
@Man_yek_poldokhtari_am