- مصطفىٰ الفاخري .

نا اللي جفيت ونا اللي خليتك
ونا اللي رخيت الحبل مانك خاطي

ونا اللي بعد ما جيتني رديتك
ونا اللي لروحي جبت هالطواطي

- مصطفى الفاخري

ارضيت بالنصيب و عشت حيل أيامي
ونا نقول عادي كل شي نصيب

اللي لي مقسومه اتجي قدامي
و تعتّا اللي ماهيش لي اتغيب

- مصطفى الفاخري

العين اوهمتني بانعكاس شعورها
و ردّت بعد لوعة افراقك قاست

اقتنعت و كفّت دمعها و اسمورها
ونامت بعد حيل الهموم تناست

وناضت و زادت بند في دستورها
امغير حوّساته من اخطورك حاست

الحايسه اللي مي شورها مي شورها
كونها انهاست من جديد انهاست

ـ مصطفى الفاخري

‏خليتني علي هالحال والله يسامحك
حبيس لوحديّه للسمور رهين

تباعدت لكن ساكنات ملامحك
ل هالوقت في عقلي اغيابك شين

- مصطفى الفاخري

ابقيت اتقول تاجر للاحلام
انبيع انكان تشري فالاماني

فيه كلام عاشق مستهام
و فيه دروس و أفكار ومعاني

تلقى جبر خاطر بالكلام
وتلقى حزن لضياع التماني

واللي بات متهشّم حطام
اتريد دواه عندي والاصلاني

فيه عتاب عندي للخصام
وفي تخميم نا نعاني نعاني

ـ مصطفى الفاخري

امرايف وما نقدر علي نسيانك
تعال غير هالمرة بعدها توبه

تعال ما حنان لقيت كيف حنانك
تعال بينا طالت اليوم الجوبه

عليك كيف هان اللي سعتّه صانك
انظر له أشقا به حالته منكوبه

تعال هاالمرة و ألعنه شيطانك
هو اللي معاك أعلن عليْ حروبه

غلاك في مكانه فيْ كيف مكانك
ومازلت نخبر ف الكنين دروبه

تعال ليش تقفل ع الغلا بيبانك
و تعلن علي كوني اليوم غروبه

نا اللي عشقتك دير في حسبانك
ونا اللي امرايف شيرتي مذهوبه

ـ مصطفى الفاخري

أوقات انهيم ننْظم في أقوال
و ننسى حيل ما ننظم أوقات

وفيه أوقات يضّعضع الحال
علي لسكات يرميني اسكات

و فيه أوقات ياخذني خيال
ويحسب فيْ ميت مالأموات

ونا والله بي الموح طال
ونا والله نطلب ف الثبات

علي الإسلام و الرزق الحلال
زمان اذنوب فيه امستّفات

أوقات انشيل لحمول الثقال
اتبات امعاي لمعاناة ابيات

أوقات الدمع ينزح ع الأطلال
أوقات ادموع عندي واجدات

أوقات ايقول في صعب المنال
العقل أبيات في جرة أبيات

أرياف وحن و عتاب ودلال
أوقات بنات عقلي غايبات

أوقات انفز نجري للوصال
انرد ونا ظنوني خايبات

ـ مصطفى الفاخري

وما لقيت عندي فالقوافي شِي طمع
لكسرة الخاطر غير يبقن جَبره

ايجلّن جضاري من جذوره ينقلع
ويبقن دوا للعقل بيهن يبرا

كلام في كلام ايجيب جاي ومندفع
ايجي عالقلم كيده اينزّح حبره

- مصطفى الفاخري

انقول في علل موزون ساهل ممتنع
انقولك كلام وفيه تلقى عبره

لا هو اللي كي جاك منه تنفجع
ولا هو اللي تلقاه ناقص خبره

انقولك علل مرات منه تنتفع
احساس ترجماته قافيه نعتبره

واضح وضوح الشمس مافيه تنخدع
جاي من امعاناة الانسان الغَبره

ـ مصطفى الفاخري