الناشر مصطفى المياحي

كل العلامـــات. بانــــــت من امس

يالمهدي يايوم اتصلـــــي باالقُدس

اشملنه بدعاء صلاتك.... نلتم تحت عباتك

ياايها المنتقم
★★★★★★★★★★★★

اشتاگينه يبن الطاهره وذابحنه ياالمهدي الشوگ
يـــم باب الحسين وعلي سوينه الگلوب اعلوگ
ابهاي الكرامــــــــه سيدي بسطت وادم باالسوگ
المخنوگ محـــتاج الهـوه وانـت الهــوه للمخنوگ

يامــــــــاي الوجوه..... ويانسمة خَجَل
كل جمعة وانصيح... يالمهدي العجل

وين الله وبحياتك.... نلتم تحت عباتك

★★★★★★★★★★★★

نرفع الك شكوة هظم والمدمع ابــــدم ايسيل
يمته ابابيلك تجــــــي وتمطر عليهــــم سجيل
ابراهيم مايلحگ بعــــــــد واتمردوا اهل الفيل
گاع الله غصت بالجثث قصفت شعبنه اسرائيل

مات الورد مات. برمــــاد الحرب
ومن دم الاطفال... مصبوغ الترب

هذا الخبر مافاتك... نلتم تحت عباتك
★★★★★★★★★★★★

نلبس امرقط بالحرب وامرنا لو دگ انذار
نكشخلك ابهيبة علي وبچفوفك انت الفقار
خيبر رجع يبن الحسن ومتاني چف الكرار
اخسف الگــاع ابجيتك وگلبها فوگ الأشرار

ابكل بني اسرائيل..... نقــلــع خـيبره
وبــــــــيدك تذلهم...... شمرت حيدره

يالمن علي صفاتك.. نلتم تحت عباتك
★★★★★★★★★★★★

كل الفصائـــــل ســـــــيدي وگفت الــــــك بستعداد
جيشك يبن نرجس تره ايدوس اعله خشم ابن زياد
هاي المناحر فــــــــدوه الــــك واموالنــــــه والأولاد
كـل حكـــــــــــــم لازم ينتهي وياخذ جزائه الجلاد

كل هاي القصور.... باچر تنهدم
وهاي الحكومات... بيدك تنعدم

ياسيدي ابنضراتك..... نلتم تحت عباتك
★★★★★★★★★★★★

يوميه محترگه الخيم وحسين راسه اعله ارماح
ويوميه زينب تنسبي وعباس ابــــــــد مامرتاح
ذبحونه يالمهدي تره ويضحك علينه الـــــذباح
وهاي العرب يبن الحسن ماچنهم اسلام اشباح

فرضوا عــقــبوات.... عاليحچي الصدگ
وباب ام الحسين.... بــعــــده محـــترگ

لمن ترف راياتك..... نلتم تحت عباتك
★★★★★★★★★★★★

ياالمهدي طالت غيبتك والجــرح وي بُعدك طـــال
وبعده الشمر يبن الحسن وي حرمله ايذبح اطفال
ياوسفه حكـــــام العـــــــرب يمشـــــــون ويالچتال
تاهــــت يـــبو صــالــح صدگ يوميه يطلع دجـــال

عبدالله مذبوح... ويضحك حرمله
وبغزه مــــــولاي... صارت كـــــربله

من تنطفي خيماتك.... نلتم تحت عباتك
★★★★★★★★★★★★






ــــــــــــــــــــــــــــــــــــــــــــــــــــ
ماجد حبيب الخيكاني
ونسألكم الدعاء





@HxzEU1

#قناه_نشر_القصائد_المنبريه

الى سيد الجنوب
السيد الشهيد ( حسن نصر الله ) اعلى الله مقامه

----------------------------------------

الله وياك نصر الله ويه الحسين

------------------------------------------

يبن الزهره يا ليث الميادين
يمخلي العراق ينوح صوبين
يا كسرة ظهرنه ولچمة البين
بچينه اعليك يمحلي الدواوين


وسفه تموت يا حيد
ولچمة روحنه تزيد

يا سيد حسن يلتارس العين
الله وياك نصر الله ويه الحسين

--------------------------------------------


وياك الممات انريد وياك
هاك ارواحنه وبس رد عدل هاك
يا وسفه التراب شلون غطاك
الكسر ظهر اليهود اتمدد هناك

جوه اتراب مدفون
تعمى اعليك العيون

ما نهوى الحياة وياك ماشين
الله وياك نصر الله ويه الحسين

----------------------------------------


كون الزين يبقى هواي وهواي
حسن يا مرهب العدوان بهداي
مو وكت الگبر يا صاحب الراي
هاي التعمي عين الرادتك هاي

بيك شباقي معروف ؟
ما حصلنه الچفوف

لا ظل خنصرك وندفنه بعدين
الله وياك نصر الله ويه الحسين


--------------------------------------------


هونك يا عجيد الناس الاثگال
تاني شيوخ ذبو حتى الاعگال
صدگ هاي النهيبه اتهد الجبال
چتال الخبر مولانه چتال

مثلك وين موجود
يحرگه بصدر الجنود

يغيرة كل فدائي وناصر الدين
الله وياك نصر الله ويه الحسين

-------------------------------------


يا محله اللطم عليسوى محلاه
ندگ اصدورنه اعله الزين طرواه
مات الچان حلم اعمارنا وياه
نشيعه بصوت خالد يا حسيناه


شهيد وفايز هناك
ربك هيچ علاك

يقربان الامامه وعاشگ حسين
الله وياك نصر الله ويه الحسين



تمت -- رعد الفريجي
29/ ايلول / 2024





@HxzEU1

#قناه_نشر_القصائد_المنبريه

لأستشهاد السيد حسن نصر الله (رضوان الله عليه )
------------------------------------


ما تخلص بچلمة هانت اسم الله
بله شلون نحمل هلخبر بله ؟
مات الخله رجفه بداخل اس رائي ل
الكسره اليوم كسرة حسن نصر الله

كضت الشيعه اظهورهه اعليك
تنگب الماو انجاب طاريك
لو تنشرى بالروح نشريك
ما ظل گلب يحمل وينعيك


يا خبر موتك ما حملناه
راح اليلاوي الموت يمناه
بوكت الشدايد دوم ننخاه
راح ويريت انروح وياه


شبساع بعد الساتر ايريد
سيد حسن والموزمه اتزيد
موتك صعب يلزلمه يلحيد
لامن جسد ونشيعه لا آيد


لا من وداع وشبگة احباب
لا من بچينه بصف التراب
شيعنه اسمك والجسد وين
ذاب المصيبه اتوذر وذاب


شلونك يسيد بآخر انفاس
صحت الحسين واسم عباس
بعد العمامه السوده علراس
يا ناس راح احاه يا ناس


گاع الجنوب اتريد خيال
والضاحيه وكل ذيچ الارجال
لبنان مو وحدهه تنعاك
بچتف العراق اليوم تنشال


بكيفك موت يمبچينه بچفاك
الشهاده اتلوگلك اي ترهم وياك
الما يحزن عليك وناسي ينعاك
بعيد الشام هذا امعيد هناك



تمت ،، رعد الفريجي





@HxzEU1

#قناه_نشر_القصائد_المنبريه

يَــباب اشرح تفاصيل الرزيّه
وراك اشسوّوِ ابضلع الزچيّه
عليمن فـاطمه اتلوع
وابوها ابگبره مفجوع
يَــباب اشرح تفاصيل الرزيه

ــــــــــــــــــــــــــــــــــــــــ

حَــــدِّثْ يَــــباب البتوله ، بعد الرسول وغيابه
عَـــــلزهره ياهو التجاسر من صُحبته المو صحابه
باب ام حسن ظل يسولف ودموعه صبت سحابه
گال ابــــــــحطبهم اجوها ما رعو حگ القرابه

گبل لا يندفن جُـثمان ابوها
ولوها وُ لوعوها وُ روعوها
( وَإنْ ) وحدها مـوضوع
وابوها ابــــگبره مفجوع
يَــباب اشرح تفاصيل الــــرزيه

ــــــــــــــــــــــــــــــــــــــــ

اصعب واشد المواقف من لاذت الزهره بيّه
دفعوني حد ما جذوعي كسرت اضلوع الزچيه
بسماري صــوّب گلبها وانظرها طاحت رميه
محسنها مات وتشوفه فوگ الترايب ضحيه

يَـريته ابگلبي بسمار الفجعها
ولا يلچمها وايهشِّم ضلعها
تون متهشّمه اضلوع
وابوها ابگبره مفجوع
يَــباب اشرح تفاصيل الرزيه

ــــــــــــــــــــــــــــــــــــــــ

كون الله لا ينطي قُنفذ ابلا رحمه بالصوط اجاها
يضرب متنها وُ وجهـها واتسمعه يشتم أباها
خالد شريك الــجريمه بالــــغِــمِد حيل ألماها
والثاني علـــــــ خد صطرها والقُرط شاهد تراها

قسم أقسم وحگ شيبة مُحمد
التعده اعله الطُهر عن دينه مُرتد
زراگ ابـخدها مطبوع
وابوها ابگبره مفجوع
يَــباب اشرح تفاصيل الرزيه

ــــــــــــــــــــــــــــــــــــــــ

من خذو حيدر وليها متگـيِّد اهل الـغوايه
محنيَّـه طلعت تدافع وحدها صـارتله رايه
خلّـو ابن عمي والا ادعي وتكون النهايه
معناها اول مُطالب فاطمه ابـحق الولايه

يَــبت الرحمه سلمان اليگلها
دعائچ يفني هاي الدنيه كلها
بقت بس تذرف ادموع
وابوها ابگبره مفجوع
يَــباب اشرح تفاصيل الرزيه


ــــــــــــــــــــــــــــــــــــــــ

بعد الجره ومر عليها ايام عاشت قليله
مثل الخيال الروايه توصفها صارت نحيله
مَعصُوبَةَ الرَّأسِ حُزناً ، مِنهد ركنها وعليله
بيت الحزن يشهد الها غارگ جفنها ابمسيله

تشم بتراب ابوها العدها غالي
وتگله ايامي من بعدك لـيالي
گلبها ابحسره مصدوع
وابوها ابگبره مفجوع
يَــباب اشرح تفاصيل الرزيه

ــــــــــــــــــــــــــــــــــــــــ

گبل المنيه اعتنوها الغصبو فدك والـخلافه
بالچذب لبسو ندامه واعتذرو بكل صــلافه
ماقبلت الهُم عذرهُم الجاني اشيفيد اعتـرافه
وكلمة الـ ( آسف ) مُحَالاً بيها الضلوع اتّــشافه

يَرب نادت يمن تعلم شجوني
هذوله العذبوني وأغْضُبوني
گـــلبها لهسه موجوع
وابوها ابگبره مفجوع
يَــباب اشرح تفاصيل الرزيه

ــــــــــــــــــــــــــــــــــــــــ
سيد علي عبدالزهره الناجي





@HxzEU1

#قناه_نشر_القصائد_المنبريه

جيت الهلي وفارش شليلي
محد گعد برد دليلي
بالمگبره ،، بالمگبره

------------------------------------------

حاچيتهم من فوگ التراب
طلعولي واحد يحمل عتاب
طابوگ مبني وما يصح باب
ماظن ترد گعدات الاحباب


ونيت بس خلصته حيلي
محد گعد برد دليلي
بالمگبره ،، بالمگبره

-------------------------------

الطم عليكم يهلي معذور
يمكم واظل حسبوني ناطور
مكسور يبچيله اعله مكسور
واحد عدل والثاني بگبور


تحت الرمل نايم خليلي
محد گعد برد دليلي
بالمگبره ،، بالمگبره

-----------------------------------

مرمر گبركم يخنگ اهواي
مكتوبه اساميكم على اچلاي
رشيت ماي وحبكم الماي
ظل يبچي بارض المگبره وياي

كف الدمع يضلوعي سيلي
محد گعد برد دليلي
بالمگبره ،، بالمگبره


---------------------------------

ياهو اليگلهم جتكم ضيوف
چا غير واحد يگعد ايشوف
وجه بوجه وچفوف بچفوف
بلوه المعاتب ياخذ الشوف

تعنيت ياهو اليعتنيلي ؟
محد گعد برد دليلي
بالمگبره ،، بالمگبره


-------------------------------

راحولي وادم تعمي العيون
مثل الحلم من عندي يمشون
عايش لچن بالضيم مدفون
ابچي وانوح وما يگعدون

يخلص امنازع بلوه ليلي
محد گعد برد دليلي
بالمگبره ،، بالمگبره

------------------------------------------


تمت ،،، رعد الفريجي
الجمعة 23 / ربيع الاول/ 1446






@HxzEU1

#قناه_نشر_القصائد_المنبريه

لحن (زلزليتي عروشها)
بصوت
ملا صلاح الدراجي
بغداد

((زلزليتي))


زلزليتي اعروشها الدنيا منچ خايفه
الزهره أم العافيه
زهره .. زهره
"""""""""""""""""""""""""""""""""""''''''''''

فاطمه اعله چفوف اديها
داير بكبره الزمان
التايه الماعنده ديره
بروحها يلگه مكان
رغم بيها جروح كلفه
لكن تنگط حنان
اليلگه مثلج یالزجیه
اعلیمن یدور جنان

المایعرفچ وآهم نبعةّ الله الصافيه
الزهره أم العافيه
زهره .. زهره
"""""""""""""""""""""""""""""""""""''''''''''

شما ارسمچ بالدفاتر
وبالقلم من اختلي
ارسم الظل العباتچ
الگه یمچ ظل علي
توگف أقلام الحقيقه
فكري صاير مو ألي
الماعرف رسمچ خطيه
حزن بي ماينجلي

رسمچ بنص عيني وروحچ شگد دافیه
الزهره أم العافيه
زهره .. زهره

"""""""""""""""""""""""""""""""""""''''''''''

تذبل شفافي واذكرچ
چني بالماي ارتشف
ما نعرفچ بالمعاني
وما نعرفچ بالوصف
ياملاذ الروحه خافت
فاطمه رب العرف
بدمعتي ادري نجاتي
لاچن ابچیلچ اسف

يا قصيدة روحي هوه اسمچ قافیه
الزهره أم العافيه
زهره .. زهره
"""""""""""""""""""""""""""""""""""''''''''''

تنزف أفكاري اعله حبچ
وانفجع بالصوره
وجنتچ جنةّ محمد
حمره اضن مسطوره
ضلعچ الورده وغصنهه
الورده شو مكسوره
أشم عطاب اعله بابچ
وین صار أبخوره

الحمامه شبيها والبلابل غافيه
الزهره أم العافيه
زهره .. زهره

"""""""""""""""""""""""""""""""""""''''''''''

اسمع ابيتچ بواچي
هاي ياهي النايحه
صوت أطفال وهضيمه
والملائك صايحه
اسمع مناشغ زغيره
تگول امي رايحه
فاطمه العاشر تقدم
هذا طف شو طايحه

زادت بنيرانها تركض وشو حافيه
الزهره أم العافيه
زهره .. زهره

عبد زينب
محمدالابراهيمي





@HxzEU1

#قناه_نشر_القصائد_المنبريه

ملا حسن الربيعي

هل انت الحسين...

گتله انه العقيله بصوت مبحــوح
الله يساعـدك شمسويـه الجــروح 
انـه اختـك يبعـد اختـك تعـنيــت
بـس رجعلـي جلمـه وهيـد النـوح

مسلوب كلشي حته اصبعـك
والخيل داست فوگ ضلعـك
دبچت دبـچ ما صايـر عليـك 
حـد ما تغيـر خـويـه وضعـك

غارت خيول ورجعت خيــول
وجسمك يحيلي تارس الجول
ومن خلصت منك يـ الحسيـن
ركضــت علـينـه بثـار مكتــول
༺༺༻༻
هل انته الحسين

تهت والدله اختك جسمك وصال
وصله دلي وصله وشفتـك بحـال
اجذب عيني اگول حسيـن كــواك
ولاچن گلبي يحجي واسمع شگال

يـأمـن يــرد الــروح لــروح
وتـگـوم والخيمـاتنـه نروح
ماهوه بعدك صوتي مذبوح
شيـگعـدك وغطـوك بجروح

بظيـم واضعي شلون شحــالي
اصـرخ يـردلي الصـوت خـالـي
وانا ادري بعـدك شـام وطبـول
بس هلبت يـــرد صـوتي غـالي
༺༺༻༻
هل انته الحسين

يابعـد المن تصيـح تگـلهـا امــــري
امـر الله اعـوفـك مــاهـو أمـــــري 
حنيـن اخـر لـقـاء ابيــن الخــــوان
واحن من كلـشي انتـه هواي ادري

مـا ينفـي المكتــوب مـكتــوب
تخلص حروب وتبدي الحروب
حرب العطـش يحسيـن اشـوه
ضـيـم اللسـن بـالشـام منكوب 

ثـمانيــــن طفلـه وطفـل ويـاي 
وراســــك علينـه مخيـم فيـاي
شما عاينو ضعنك على الروس
صـاحــــو ابـونه ويانـه حمــاي
༺༺༺༻༻
هل انته الحسين

عمت عين الرمات الوچهو سهام
مـا عافـو مچـان بجسمـه وينـام
الشابگته السهـام يگـوم ويطيـح
يكون احضن اخوي بنفس لالـم

مستور ضعنك كلـه مستـور
وضو الشمس فيته النحـور
بـس المصيـه هنـا يحسيـن
حرگو خيمنـه وفـرن خدور

هسه الكفيله التحچـي وياك
حرمه وعيـال وتعـرف عـداك
الطشر شمنه الحادي يحسين
ماخذنـي عنـك وانتـه خـلاك
༺༺༺༻༻༻
     «  عبد ال محمد••••:
                                   :
                منتظر خالد المنصوري)

""تساؤلات""


من يا باب وجاي لبابي من قرآنك لو قرآني
                     
نفرض من باب المعروف     ليش النار ببيتي تطوف               

                       عندك تفسير

............................................................
قبل الموت ووصه بحيدر بعده يكون
بس العايش وي شيطانه طبعه يخون
خـنتو القسم زاده ويـاكم  هـذا يهون


مات وما متأمل منكم ...  إنصاف اليطلع من عدكم

تريد الشيطان الينصركم ... ما معقول

يعرفكم مو كد حجاية ... لا سلمكم سيف وراية

شلون ويحسبكم تجاية ... ما معقول


صحابه ولو ميزكم غير    ليش ومسعاكم مو خير

                          عندك تفسير
.........................................................
علل لو رايد ترضي الله أبدي بهاي
مراضاة الخالق ما سامع  من رضاي
يـم بابي وفتوتكم بيهه حجة ورأي

شتريد توصل من فكره ... لو قرآني انتَ تنكره 

بس الباب البين مكره ... دفعة موت

 يا فتوة الشعلت نيرانك ... يمكن مكتوبة بقرآنك

تدفع بابي ومو بيبانك ... دفعة موت  

نفرض نيتك تدفع باب      جا ليش المحسن ينصاب 

                          عندك تفسير
..........................................................
يا ضلع الــ من عنده تأذه أعظم أنسان
مات وسامع منه حجاية  مو للــ نكران
كـال الآذى الـفاطم يعني يآذيني وهان

مو هينه وضلعين بـيوم ... كاسرهن وببابي تحوم

باجر غصن من الزقوم ... تترجى تصير


ما متوازي من تأذينه ... منك ما ردنه وتنطينه

بالجنة نصير و تلفينه ... تترجى تصير 

دنيا وسولفلي بحاضرهه      ضلع ومو كلمة الكاسرهه
     
                          عندك تفسير 
..........................................................
أمـرك بيـن  أثنين أتخيـر  لا تحتـار
بس حقدك مو درب الجنة بعد الصار
الـفاطم أنه الـحبني تفطـم مـن النار

 جنة وتسمع بس طاريهه ... جنة وتحلم تدخل ليهه

 وجنة وحاكم انه البيهه ... بأمر الرحمن

نار تلوگ لمثل امثالك ... اختاريت وهذا ليحلالك

لا شفع الباجر يبرالك ... بأمر الرحمن
                  
 شنيتك وبحقدك شتريد   أتسائل لو ردت تهيد

                            عندك تفسير


محمد كاظم العقابي ✏️✨

السلام عليك ياسعيد ابن جبير
،،،،،،،،،،،،،،،،،،،،،،،،،،،،،
ياسعيد وگلبك امن الغربه مالوم
بعد ياراحه التعين الحيله مهدوم
عالغريب الماله واحد روحك اتلوم
المات عاري ومابقتله بطيحته هدوم

السلام عليك ياسعيد ابن جبير
،،،،،،،،،،،،،،،،،،،،،،،،،،،،،
عالم وعلمك تخطه عقول الجيال
اشما يمر بيها الزمان اتضل الجبال
لجن نقطت ضعفك الگادوها بحبال
منصدم عالطلعت وما عدها كفال

السلام عليك ياسعيد ابن جبير
،،،،،،،،،،،،،،،،،،،،،،،،،،،،،
ياسعيد المايسعدك كلشي بالكون
شتفرح وتدري بحبيبك عاري مدفون
عالرمح وعياله طلعت بين العيون
والحبل ماخله شبگه فوگ المتون

السلام عليك ياسعيد ابن جبير
،،،،،،،،،،،،،،،،،،،،،،،،،،،،،
انته باب الله الجبير الدومه مفتوح
حضرتك بيها الحنان اليروي الروح
يالوفائك بي اسولف وين ماروح
يامضيف الدمعه حجيك كله مملوح

السلام عليك ياسعيد ابن جبير
،،،،،،،،،،،،،،،،،،،،،،،،،،،،،
حاجه عندي وانه جيت بدمعة العين
اگضيها يامولاي امشي اعليك الحسين
ابدعت الطلعت غريبه امن الصواوين
سيدي بگلبي السوالف مالت اسنين

السلام عليك ياسعيد ابن جبير
العبد ابوفايز الرافضي
الفاتحه على روح والدي






@HxzEU1

#قناه_نشر_القصائد_المنبريه

استشهاد الزهراء  ع

محتاره بخدري ومحتاره ابأبني
اشما ادفع روحي والباب ايردني
       حاولت اشگد
     كل حيلي انهد    
     ++++++++++
قبل ما يلتقي المسمار بضلوعي
محسن والحجاب وستري موضوعي
ابذلت مجهودي كله ونزلت ادموعي
الوع ابسكته ما واحد سمع لوعي

اشد الايد//لچن شيفيد
عالباب ابرفسته ايزيد

تطلع اتمنه وما طلعت روحي
مو عيني وضلعي اكثرها جروحي
     ايسبني اتعمد
     كل حيلي انهد
      ++++++++++
بين العصره والدخانه والخنگه
ادور عالهوى وما تحصل الشهگه
بقت فتره عليه بابي والطبگه
امد ايدي اعله تچوه بصفي ما الگه

ولهيب النار //اعله وجهي وحار.
وين انطي الوجه احتار

بيتي ومحتاره وما اندل دربي
تطلع لحگوني من دگت گلبي
     ماجاني احد
     كل حيلي انهد
     ++++++++++
اكثر من وگعتي اتألم النهضه
بسطرته ادموعي عالجدران تتشضه
اصيح وصوتي من النشغه بي كضه
طلعت گوه بس لحگيني يافضه

تعالي بساع//كسيره اضلاع
  ضاع اوليدي محسن ضاع

مافكني بسوطه هم رد يضربني
انهض بالگوه وللگاع ايذبني
      صحته وما رد
      كل حيلي انهد
     +++++++++
سطرو عيني وبعيني الوكت ظلمه
الخنگه والهوى البالگوه اشتمه
صوت اسمعته وينچ فاطمه يمه
زينب والحسن وحسين اجه ابهمه

شبگ ليدين //عليه حسين
وين ايگلي جرحچ وين

گتله انته اكبرها جروحي وآلامي
يومك عن يومي يفرق يالضامي
      الزينب من صد
      كل حيلي انهد
     +++++++++
عليه التمو اولادي يحاموني
شگف السوط لا يوصل عله متوني
وهگ بيهم ضرب يايمه نادوني
من وگعوا عليه بضلعي لچموني

اون بهداي//جروحي اهواي
   اضمه وما طلبت الماي

اعطش واتحمل واتذكر  خيمه
محترگه وزينب تركض بالهميه
       وكلشي اتفرهد
       كل حيلي انهد

ثائر الربيعي






@HxzEU1

#قناه_نشر_القصائد_المنبريه

السيده زينب والزهراء عليها السلام


بيه الج حسره ...وكلمن وصبره
غربه صارت بالمدينه عيوني مخنوكات
توها جانت عافيتنه وماتت الكلمات
ياهو بعدج يبقه النه ذني هم حسرات   ذني هم حسرات
                             *

والله دارت... اي ييمه وجانت امالي اشكبرها
هسه صارت...الميته امه  يگضي عمره يم كبرها

جنت احسب يمه اشوفج فيء علينه
بسدج اكضي الليل كله يالحنينه
وينه حضنج يمه ذاكَ البي ربينه
والله مشتاكه لكعدتج وال حجينه

ضايع  ابعمره ...الفاكد الزهره
حزنج وفكدج ييمه بينه مرسومات
توها جانت عافيتنه وماتت الكلمات
ياهو بعدج يبقه النه ذني هم حسرات   ذني هم حسرات
____
شحجي يمه ... كلشي يكتل بينه صاير حتى فكدج
وكلشي ضلمه... منين اجيب الوان تشطب بينه حزنج

وحشه صارت كل محاچيها المضايف
الخنگة تفتر چنها واحد صوته خايف
ياهو مثلج من تعزبه تصب سوالف
حتى طير الله اليچهبج كلبه لاهف

بسمج السفره...حيرت فقره
ردت اضم اضلوعج النه تالي مكسورات
توها جانت عافيتنه وماتت الكلمات
ياهو بعدج يبقه النه  ذني هم حسرات   ذني هم حسرات
___
بنيه وحده ...وماتت امها تخيل بهاي المصيبه
ياهو انشده... يكلي اعضم يوم الج يوم الغريبه

يبدي دمعي ،بروحي اسافر كلبي شارد
بيمن التم شنهي اصيرن، وانه واحد
حيره من تكبر، صفنتي ،والمشاهد
ياهو بيكم شاف موته وهو كاعد

ينحفر كبره...المختنك صدره
الحيره تكبر بينه باجر وحنا علويات
توه جانت عافيتنه وماتت الكلمات
ياهو بعدج يبقه النه وذني هم حسرات.   ذني هم حسرات
___

يبدي فكري...من الحزن ياخذ مراحل انتصاره
منهو يدري...الواكف ابحيلين طالع من خساره

بهيبه توكف من يحصدوها السنابل
ماتنزل راس اذا شافت مناجل
زينب انه وهذا حالي بكل مراحل
من حزن امي وهضمها للمحامل

الينكطع عطره...روحه متأسره
باجر التاريخه يكتب ،هيبه، متأسرات
توهه جانت عافيتنه وماتت الكلمات
ياهو بعدج يبقه النه ذني هم حسرات.  ذني هم حسرات


(اللحن موجود للنص )

ليث كريم جحالي






@HxzEU1

#قناه_نشر_القصائد_المنبريه

اما خيبرٌ سنعيدُ فيكم
واما كربلا ستعادُ فينا
ففي الامرينِ يُكْتَبُ انتصارٌ
وللامرينِ نحنُ العاشقينا

الشاعر حسين صادق العقابي

#لبنان_شيعة_الصمود

عراقية عراقية
هاي الفزعه شيعية
كلشي يهون يا لبنان
ابشري الشده مگضية

--------------------------------

علي ويسند علي
المواقف كلهه الي
اثور وانتفض
اذا الفزعه لهلي

انه الكاسر گفه العايل
كلام الذله ما گايل
انه اليعدل حچي المايل
عراقي ورافضي

آنه التاريخ والثايه
اجتكم يا هلي الرايه
فزعتي لاهل الولايه
عراقي ورافضي

بيهه انفاس ثورية
هاي الفزعه شيعية
كلشي يهون يا لبنان
ابشري الشده مگضيه

------------------------------------------


يلبنان السمى
نتشارك بالدمى
اذا جاسچ عطش
يأذيچ الضمى

نمد الماي وجروفه
وتجيچ بحيلهه الكوفه
الفرات بمايه وچفوفه
هلا ومية هلا

عوائلكم تطب داري
واعزب انه وي جاري
اهل ما گلت خطاري
هلا ومية هلا

يأهلآ بالحسينية
هاي الفزعه شيعية
كلشي يهون يا لبنان
ابشري الشده مگضيه

-------------------------------------------

اجيناچ بزلم
تموت وما تهم
تعزب بالنحور
والشروگي الاسم


احط نيشان بالملگه
معلم چفي علتفگه
الشرد من عندي ما الحگه
تعود ينهزم

ما يبقى اليمس گاعي
انه الراعبهم ذراعي
التخاذل ما اله داعي
تعود ينهزم

هذاك الگال شعليه
هاي الفزعه شيعية
كلشي يهون يا لبنان
ابشري الشده مگضية

--------------------------------------------

مواقف للعرب
عجب كل العجب
يوالون اليهود
يجمعون الحطب

قديمة السالفه العدهم
الخيانه التمشي وي دمهم
قطعآ ياهو والدهم
نقارن بالفعل

گبل هم بَخنّ گالوهه
وتالي سوايه سووهه
هايه اليوم عادوهه
نقارن بالفعل

شحچي ونارهم بيه
هاي الفزعه شيعية
كلشي يهون يا لبنان
ابشري الشده مگضية

-------------------------------------------


انتوحد ننتصر
نتفرق ننكسر
بعد كف الكلام
ذبحناه الشمر


چفي بچفك وخلنه
عرفنه الناس التضدنه
(اليذم بينه ) ( اليساعدنه )
وضح كلشي بعد

اليوالي المرتضى وآله
التعرفه بدينه وافعاله
انصره واحفظ اعياله
وضح كلشي بعد

البقيه الروس محنية
هاي الفزعه شيعية
كلشي يهون يا لبنان
ابشري الشده مگضيه


كلمات الشاعر / رعد الفريجي
25/ ايلول / 2024





@HxzEU1

#قناه_نشر_القصائد_المنبريه

@@@@@@@@@@@@
الزهره تنزف خير ما تنزف دمه
الفلك ربك حاطه بجف فاطمه
اتخضر شما فتح بيبانه الضمه
وبس علي اليگدر عله استيعابها
@@@@@@@@@@@
ربك امسويهه صوغه لنبي
ومن وقار الزهره سوهه العبي
ولا فتى لزهره نعلم بس علي
لعلي وطه ربك اصلا جابها
@@@@@@@@@@@@
الرزق ينزل لمن الزهره تفز
لغز ربهه وماكو حلال اللغز
خيط من جلبابها يصبح حرز
وحرز جبرائيل من جلبابها
@@@@@@@@@@@
كون ترضى الزهره يعني الله رضه
وقبل لا تنْدعي يگللها كضه
النبي بسم الزهره يعرج للفضه
والشمس يم الزجيه اغيابها
@@@@@@@@@@@
والنبي ابراهيم يقراها ختام
يقره تسبيحة الزهره النبي كام
واصبحت لنار بردا وسلام
والنبي ابراهيم اضن دك بابها
@@@@@@@@@@@
ربك امفضلهه عن كل النساء
ولذلك يمه ونصاغ الكساء
والكواكب يرتجنهه بالفضاء
انوجدن وينعدن من اسبابها
@@@@@@@@@@@
من تسبح تجل بالباب الطيور
ابابها اضل لا اطير ولا تدور
الشجر يفزع وده من بين الجذور
ويحط فييه ايريد فوك اعتابها
@@@@@@@@@@@@

الاقل خدمه
من فضل ابو الفضل عليه السلام
خالد كشاش الخزعلي

@HxzEU1

لحن(شوگ الرضا)
بصوت
ملا صادق هاشم
بغداد

((شوگ الرضا))


شوگ الرضا ماينحمل نشّدوّني عن شوگه
روحي اعله شباچه بگَت ياناس مخنوگه
وعيـــوني ماتبچي دمع يمكن خيم هلت
دخان احس بحسـرتي وعيوني محروگه

حبيبي وشتــــياقي أله
يغالي يــــاخيم كـــربله
عشگتك ياعذاب الهزل
عفتـــني دربــي مااندله

عشت بروحتك وبردتك حـسره
تنضرلي واحس بنضرتك جمره

حبيبي يالرضا ...

"""""""""""""""""""""""""""""""""""''''''''''

بالـــرغم مـا آنه بعــدم وما استحق حالك
بس انت حاسبني طفل من جُملةّ عيالك
توكلني بيدك سيدي وآنه اصفن بروحك
رازقــــني شـــوفت گبتك ومرتب بجالك

يجـــرحي ابابـــك وانتچي
بدمعتي يحلا بيك الحچي
وابــــــاوع گبــــتك بالسمه
واسمعك هايم اعله البچي

المناره تصيح مــن أتصيح ياعمه
جرحك ينزف حچايات ابو اليمه

حبيبي يالرضا ...

"""""""""""""""""""""""""""""""""""''''''''''

مــــديت اديه بحضرتك رايد جمر خيمه
ورايد اعيــــشن غــــربتك مولاي وبهيمه
يالدمعتك ليل اهدعش ومذعوره ايامك
كل لحضه مجلس للسبي ياسيدي تقيمه

تناشغ والمدامع حــــبل
هيامك صعدن عالـهزل
رقيه خدهه ازرگ غـده
بخدودك تلطم وما تمل

ليلك ينگضي وماتنگضي جروحك
عشت بكربله واعـــله النهر روحك

حبيبي يالرضا ...

"""""""""""""""""""""""""""""""""""''''''''''

نشـــــدوني عن زيارته وعن الكرم بيها
زوار ابــــــو محمد ترى بروحه يغطيها
يابو الجواد برحمتك وكل زاير بخيرك
حتى الحمامه البالصحن انت التداريها

لگيته چلمه مـالت عشگ
وعشگته وبمحبته احترگ
گلـــتله يالرضا الــمرتضى
احبك ياهـــــواي الصدگ

يناموس السمه ومن حيلك انطيني
محـــــرم باچر ورايد تچـــويـــــــني

حبيبي يالرضا ...

"""""""""""""""""""""""""""""""""""''''''''''

ودعـــتك وچــان الدمع يحچيلك اوداعي
وهاجن جروحي سيدي وغطتني اوجاعي
شميـــتك بگلبي الغده مـــن فرگتك هايم
وبعتبتك گمت انحني هاك انشد اضلاعي

خطوتي بيه تمشي وترد
اتاني سيدي اعله الوعد
تردني والضريحك اجي
وامـــــوتن يمك وانسعد

هذآ آخر كلامي ومنيتي اقبـــلها
اريدن روحي يمك سيدي تحلها

حبيبي يالرضا ...

عبد زينب
محمد الابراهيمي





@HxzEU1

#قناه_نشر_القصائد_المنبريه