السلام عليكم ورحمه الله وبركاته كيف حالكم إخوتي في الله؟ بعد زمان ووقت طويل جداً ، وحابة إني احكي ودردش معكم شوي ممكن؟ أنا بدي قدم اعتذار كبير جداً لكل حدا طلب مني مساعدة وما قدرت ساعده - ناهيكم عن نوع المساعدة - بعتذر جداً لكل شخص كان متأمل ومتفائل أنه هو طرق الباب الصح وخذلته .. أنا بعتذر لأن القناة ميتة والتفاعل فيها جداً جداً ضعيف.. العدد عن يزيد صح بس التفاعل بالأرض لا مشاهدات ولا تحويل ولا تفاعل- سابقاً - ، وصرلي وقت طويل جدا عم حاول رجعها ورجع تفاعلها بس كل محاولاتي عم تكون بالأرض حتى اضطريت وقف التفاعلات بعد ما كانوا موجودين من لما نزل التيليجرام هي الميزة كتير عم انقهر وعم اخجل وقت يجي شخص يطلب مساعدة مني وما رد عليه وما اقدر ساعده لأني عرفانة مسبقاً شو رح يصير ، ومقهورة على وضع القناة بعد ماكانت مرافقتني سنين طويلة أسستها بالـ ٢٠١٨ وقت كان عمري ١٤/١٥ ،وهلا أنا عمري ٢١ كبرت معاها والذكريات يلي فيها كتيرة كتير ، وكانت هي أول طريق مشيت فيه لكون داعية في سبيل الله ، وماني عرفانة شو اعمل وكيف رجع التفاعل هل اطلب منكم ما تغادروا القناة؟ هل اطلب منكم تحويل المنشورات وتساعدوني نعلي المشاهدات؟ هل اطلب منكم تتفاعلوا على المنشورات إذا رجعت التفاعل؟ بس أنا مو هدفي هو التفاعل الجامد وبس قد ماهو وجودكم انتوا فيها ومحبتكم وإني اقدر حط أثري جواتكم انكم تستفيدوا من القناة ومن المنشورات وتتغيروا للأحسن ، إني اذا حدا طرق بابي ما رده خايب ونساعده كلنا سوا ، إني إذا اجا يوم وتوفاني الله تتذكروني وتدعولي ونشفع لبعض يوم القيامة ، ومابعرف كيف بدي حقق هادا الهدف ولا كيف بدي امشي من أول وجديد عم حس بالضياع والتشتت وبدي نصيحتكم ومساعدتكم ، وبتمنى من أي شخص زعلان مني او مجروح أو حاقد علي أو بيكرهني أو حامل بقلبه علي يسامحني ويبعتلي حتى اعتذر منه بشكل شخصي ، الدنيا صغيرة وما بتسوى عند رب العالمين جناح بعوضة واليوم نحن هون وبكرة الله اعلم ، ومالازم نضل نحمل بقلبنا على بعض ونفكر بهي القصص في أمور أهم.. الدنيا عم تتغير من حوالينا ولازم نتوحد ونوقف صف واحد ونوحد كلمة الإسلام ونساعد اهلنا في فلسطين والسودان وننصر المستضعفين بمالنا ودعائنا ودراستنا وعملنا وبكل أمر منقدر عليه وندعي رب العالمين يستخدمنا ولا يستبدلنا.. بعرف يمكن حكيت كلام كتير وعشوائي يمكن بس هادا الكلام طالع من جواتي ومن زمان حابة احكيه ويلي بيوصل لهون ، فشكراً كتير على القراءة وبتمنى تدعولي .. ويلي بحب يحكيلي شي أو ينصحني أو يدعيلي فالبوت مفتوح قدامكم 🫂💚 @shahda1_bot